黃膠鴨錯覺(下)

早輪小城一夜雨、正確嚟講只不過兩小時暴雨，全城變為澤國。網上直頭有班死仔，趁住雨勢強勁又有採訪隊拍攝，索性喺「深水界」表演四式混合，搞到連攝製隊都無晒符，笑到拍唔落手。不過呢次兩小時嘅暴雨，純粹係為咗小城進入雨季進行預演，只要簡單一試就試出小城嘅去水能力有幾差。除咗「深水界試水事件」之外，最多網友一致推薦嘅，莫過如「黃膠鴨過大海」游到金利達。小城庶民無機會喺小城親眼目睹「黃膠鴨」巡遊，只能趁暴雨襲城期間「併圖」以表心意。「黃膠鴨」予小城其實有多重意義，就算無乜人同佢有過「親密接觸」，但係亦都好希望「黃膠鴨」能夠喺鄰埠演出完，順道過嚟小城「巡游」一下，以幫助小城實踐「陽光政府」及「產業多元化」嘅目標。
　首先「黃膠鴨」巡遊小城，至少有助大三巴可以休息一下，等強國客人走晒去海邊掛住睇鴨，小則可以令聯合國嚟查世遺時無咁礙眼，大則可以令準備打「考古地段」主意嘅交通局放棄喺上址建造停車場，文化部就唔使被迫表態支持定反對咁辛苦。第二，當膠鴨遊到去政府總部，當有大批旅客湧至「政總」門口，衙差都唔得閒「選擇團體執法」阻住青年團體向官府遞信，更加唔會被人投訴濫權咁失禮。第三，當「黃膠鴨」去到西環湖對開海面，就可以證實一旦展開西環湖夜市，對於小城環境有幾大影響，就連官府嘅所謂諮詢都可以慳番，至少可以慳番幾百萬搵外面人作諮詢。當然，最重要嘅係幫助向外界推廣，小城嘅「黃色事業」除咗「雞」特別多之外，亦都有「鴨」，貫徹小城「就係與別不同」嘅旅遊特色。

黃膠鴨錯覺(上)

一隻巨大黃膠鴨引發全城發花癲，日日喺面書洗版。媒體無嘢好做，一隻軟膠公仔竟然可以上A1頭條，腦殘嘅似乎唔係憤青宅男專利，剃人頭者從來都唔會反省自己終有一天被剃頭。「殘媒」美其名巨鴨幫人帶嚟快樂，細路仔時伴浴玩意化身幾層樓高，勾起大家童年美麗回憶。雖然隻巨鴨走去鄰埠根本唔關我哋事，不過老實講句早年鄰埠究竟有幾多人擁有過呢隻鴨仔伴浴？事關要有鴨仔伴浴，需要有一個先決條件，就係浴室要有浴缸。鄰埠同小城嘅人口密度不遑多讓，住屋條件比小城更擠逼，家中浴室能容納浴缸者非富則貴外，最多就係鬍鬚口中「飲咖啡睇法蘭西影畫」嘅「中產」。鄰埠一般庶民有邊個有本事有個浴缸放喺屋企呢？至少本人嘅鄰埠親友以至兒時玩伴，都無一個人表明自己曾經擁有過一隻黃膠鴨。嘅無集體回憶又無童年陰影，何解巨鴨會搞到全城發花癲？有人直頭專登為咗隻黃膠鴨過大海，幾廿歲大男人學口靚妹仔擺V手扮Q同隻鴨影相，仲要擺上面書公告天下「成功爭取同隻黃膠鴨合照」。當然個人喜好呢味嘢邊個敢亂咁批評，只不過呢隻完全同大部分人無交集過嘅鴨可以引到咁多人發癲，除咗係網絡年代人有我有個個趁高興嘅活動之外，更重要嘅係，呢種文化入侵嘅軟實力，成功將「盲搶鹽」改造成「盲影鴨」。因為大家知道有呢隻黃膠鴨存在，全部都係拜荷里活電影所賜，所謂嘅童年回憶純粹係睇戲睇得多而被植入腦內，以為自己都「曾經擁有過」咁解而已。難怪小城官府年年都派錢，其實都係學咗黃膠鴨錯覺手法，想庶民以為自己真係擁有一個關心自己嘅「父母官」。

身份問題(下)

有位女教授級嘅教師，評論兩教師事件時，特別指出咗教師都係人，可以有多重身份。而事件中兩位「主角」除卻教師之外不約而同都擁有多重身份，而且仲係天壤之別添。除咗性別不同以外，政治派別、職位高低、已婚未婚、年齡收入同社會地位等。而現今社會一個男人係唔可以輕易咁去評論一個女人，至少要有充足嘅理據同埋事實證明，先至可以有說服力，否則好容易會跌入兩性關係嘅陷阱裏面，輕則叫「性別歧視」重則叫做「性騷擾」。不過呢啲其實都係十分相對性，例如就算真係被掂到重要部位，段估都應該唔會有女士告一個三歲小孩非禮罪。同樣地一個律師輕言對一位女士講句「肥婆」，咁好大機會被人告佢人身攻擊。其實我都唔係太贊同落班之後就唔同咗身份呢種睇法，始終教師就係教師，唔通佢落咗班之後劈酒劈天光大家都認為無問題咩？但問題係呢位女教師既無犯法、亦無不雅，只不過係著短褲都被人話，咁大家就好懷疑呢位男老師嘅言論。最弊嘅係點樣解釋其他咁多人都唔覺女教師有問題，偏偏係佢至發覺係「性感暴露」呢？而「少布衫」又以乜嘢程度先至叫做「少布」？而最後嘅「唔擔遮濕身感冒女神」，基本上茶餐廳內一班成年雄性動物都知道係諗緊乜啦，呢位女教師無告性騷擾都經已十分好彩。簡單講句唔尊重自己、都尊重吓教師呢個身份同行業丫，話晒讀咗咁多年書至可以教人，對唔對得住將小朋友負託給教師一班家長們呢？

身份問題(上)

一次遊行，一條短褲，一個身份，引發遊行過後另一個小城熱話。年輕女教師走上前線表達訴求，引嚟同行男教師喺「臉書」呢種公開場合提出六大批評，結果雙方嘅「支持者」就喺「臉書」呢個「宇宙空間」展開罵戰。原本諗住兩幫人馬有排爭拗，準備擔定凳仔睇好戲，點知輿論竟然一面倒咁滯，唔使睇其真實過程淨係睇評語，大家就知道「誰是受害者」。因為事發兩日後，事件直頭放到去鄰埠最出名嘅討論區，個個直插男教師思想骯髒。更有報張連續兩日走訪同屬教師範疇嘅女性，而且仲係更高級嘅教授級，問下佢地對事件嘅睇法。唔使問當然梗係企喺女教師嘅角度，維護女性尊嚴。本來「出得行預咗要捱」，任何人都有權表達意見。但係呢位男教師最大嘅問題，係竟然用「條裙太短（實情係條褲）」去批評女教師嘅行為。淨係呢一點，男教師嘅思維就經已令人諗起清朝要紮腳呢種非人性嘅所謂道德觀。最好笑嘅係一班所謂支持者，無理據之下兩三下就被對方搞到要轉話題都轉唔切。原本其他「市井麻甩」用「下半身思維」去評女教師，我估大家應該都唔會反應咁大。話晒一句話裏面有咁多性器官，話佢都有失自己身份啦！但係這次竟然同屬教師身份，甚至係校長助理，用同類身份去批評唔同性別嘅人，除咗係性別歧視之外，更加侮辱自身所背負同一個身份。

親疏有別(下)

「五一遊行」中一班後生仔沿途抗議，周圍點火頭。首先係全城唯一賺大錢傳媒，被暱稱「愛瞞」嘅友報。無他嘅，搵咗塊地起成十幾廿層，咁大幢大樓除咗出報紙，仲有好多空間可以租俾人收管理費，又賣車又賣酒，一版彩色紙就收十幾萬，仲好過官府印銀紙。你有本事賺到錢梗係無人話你，不過嚴重嘅傾向性始終唔係現代傳媒應有嘅態度，管你係邊個嘅喉舌都係咁話，庶民一定唔會賣你賬。至於扮官台嘅所謂電子傳媒，除咗本身唔係「根正苗紅」只想擦鞋之外，想扮「黨喉舌」但係連「指導思想」都唔明係乜，況且「憂」同「喜」都唔識報，條數唔掂就搵個「數佬」嚟睇住盤數，「咳筆直」就淨係識「咳」最多人睇嘅節目，早啲摺埋對大家都好。
　呢班後生仔揀選嘅路線十分精彩，除傳統起點同終點之外，中間路過嘅「景點」全部有的放矢出問題所在，街坊們見到之後，其實有好多人都唔為意「景點」引發出咁多問題。不過好戲在後頭，「傳統終點」早就上報衙差，不過就係差嗰幾十米唔夠，衙差話唔俾過就唔俾過。官府咁樣呃班後生仔，係唔係做得太肉酸呢！唔理你係唔係「羅生門」，淨係睇早兩日「雞腫」帶住班「扇瘋」二百幾隻鴨仔遊到你大門口就得，今日百零隻「落湯雞」行多幾廿米就唔得。正所謂有片有真相，面對鏡頭完全唔識答，除咗係EQ唔夠之外只怪你上堂無留心聽書，老頂講咗話點都唔可以俾佢哋行，你咪講句「老頂唔俾」就收工啦，做得你老頂就梗係要幫你頂而唔係叫你自己去頂啦，況且就算你頂咗都係「親疏有別」，唔會升你口架傻仔。

代表(上)

每年一度專門為打工仔而設嘅假期，叫做無事無幹咁就過去咗。每逢呢個日子，唔少人都好期待有日假，不過各行各業對呢個假期就有唔同睇法，就算同為打工仔都係咁話。一般白領就行街睇戲食飯，叫做放吓假，北上過海各有喜好。而藍領工友梗係飲茶郊遊親子樂，始終日捱夜捱都係為家人。不過最辛苦莫過於服務業工友，即係包括7/24嘅字花檔工友，佢哋除咗No play之外仲係No say。用老闆嘅講法，就係「食得鹹魚抵得渴」，想改善條件唯一辦法係轉行。但係有部分人會揀除咗放假休息之外嘅活動，就係借住呢日假去表達心聲，而遊行就係重頭戲。尤其係小城嘅「五一遊行」因為幾度登上國際頭版，對於小城打工仔嚟講，更加係特別有意義嘅日子。不過自從早幾年遊行大軍加入咗年青人之後，佢哋對官府嘅不滿就更全面更廣泛，甚至連傳媒生態都係佢哋嘅訴求之一。喺茶餐廳就有老街坊講「點解班細路咁得閒？讀多兩本書讀多兩個字仲好啦！」對於阿伯嘅意見，茶餐廳全體以噴啡噴茶作回應。扮晒「十八樓周老闆」嘅中坑就話「呢班後生仔咪就係讀得書多，所以至唔鍾意被人呃囉，人哋俾八千你你就收聲，第日俾多八千你，拆埋你祖屋山墳添呀！」好明顯呢位「疑似周老闆」對「堅定不疑發展落去、人人都破壞環境唔係得我一個」十分不滿，再加埋「桃花崗忽然私家地」等種種暴力強拆身同感受。呢班後生仔嘅最佳示範，就係你越唔出聲就唔會有人再幫你出聲。佢哋代表咗唔少「疑似周老闆」呢類不滿現狀但係唔敢、又或者係無能力表達嘅庶民，行出嚟發表意見。

超級大古惑(下)

今次「寮仔部部長」對外放風，話發展商走唔甩責任，一洗以往閃縮格調，而且口風平靜得嚟訊息清楚，突然之間喺庶民口中得返唔少分數。過往「寮仔部」管理小城嘅大小工程，一直都被人垢弊黑箱作業私相授受，而且亦都同時與各發展商關係密切。如果唔係呢種特殊關係，當年又點會爆出「走資司長」呢單震驚全球嘅貪腐事件呢！所以多年來小城呢種「官商」嘅文化，喺「寮仔部」直情係恆常發生，咁耐以嚟都得唔到庶民們嘅信任就係咁解。今次阿「部長」突然調轉槍頭，直指發展商有責任要負，係一次好難得嘅洗底翻身機會，可以挽回公眾嘅部分信心。事實上呢次危樓事件發生之後無耐，官方嘅臨時報告就經已指出，石屎密度嚴重不足，以致令主力柱出現爆裂情況。而臨時報告係官府專登過隔籬埠，情商對方最高學府嘅技術部門作出檢測之後得出之結果。所以就算詳細嘅報告將來發表，呢類咁表面嘅成因點都唔能夠改變。所以基本上，「部長」亦只不過係重覆學者專家所講過嘅嘢，承建商就算唔同意唔高興，其實亦都動唔到「部長」啲乜嘢。亦即係話今次「部長」其實根本乜都無做過，最多只係負責將個報告對外公開咁解。指示要交報告對外公開嘅，係知縣發指示要求咁做。而統領調查報告進行嘅，係佢老頂做統籌。「部長」充其量只不過係執行上級命令，但係咁樣俾咗個位佢「靚抽」一次。

有嘢揸手(上)

「寮仔部部長」早輪被媒體追問幾時有「報告」睇，無得答之下唯有話好努力做緊，到咗埋尾階段。不過轉頭就被人插佢拖咗一倍時間有多，都仲未交得出份「報告」，質疑佢受到發展商壓力，唔敢貿貿然咁公開份「報告」。卒之早兩日再度被追問之下，答案雖然仍然係未做起要謹慎，但係對白中忽然爆出一句「石屎強度問題，發展商唔可以話唔關佢事」。嘩！突然間咁峰迴路轉，開晒口話發展商難逃責任，苦主們似乎有機會見到一片曙光，至少報告內或多或少都應該有啲作用，唔係以前咁成日話係天災意外，搞到等一輪都係得疊廢紙。不過阿「部長」今次清兵上身勇字掛心口，即時招惹發展商大反撲。發言翌日即時刊登跨版廣告，直指「部長」發表報告內容片面，言論不負責任對其聲譽造成損害。不過今次「部長」似乎係有備而來，面對傳媒追問，對答頭頭是道，甚至有傳媒問佢怕唔怕被人告，佢直頭答「大家都係基於一個學術理論，而且都係同一個理論」。「部長」咁答，即係表示喺專業界別內大家都係用同一個基準，係對係錯其實無得走雞。有記者問佢有無被人屈嘅感覺，今次答得仲妙「把口喺人哋度，我阻止唔到佢哋講啲乜！」。按照推算，今次「寮仔部」嘅報告應該掌握咗唔少證據，係對發展商不利，所以「部長」先至會咁高調去評論事件，一改以往閃閃縮縮嘅態度。況且今次仲唔止佢本人一個，甚至連頂頭老大都出面撐佢，話個報告只會基於學術觀點作出總結，唔會受外來壓力所影響。難怪今次「部長」可以清晰咁講，份報告最快可以喺月底公布，明顯係佢已經「有嘢才查手」。

小城嘅發展商(下)

官府遲遲唔出善豐危樓報告，除咗擔心會引發訴訟（呢個差唔多係必然發生嘅事），最大問題係負責嘅發展商，喺事發之後一直唔認數。仲要擘大眼講大話，明明大廈大門外大大塊雲石寫到清清楚楚，夠膽話幢大廈唔係佢哋負責起咁都講得出。再加上發展商嘅老闆，到今日經已貴為「大代表」，同京城有密切聯繫，小城呢位地方官，唔多唔少要避忌吓，喺未諗到有乜方法解決問題時，都唔敢茂茂然公開呢份官方報告。近年唔少小城嘅發展商，都紛紛參與國內嘅紅色事業，大部分都唔係「大袋」就係「正脅」，當中亦包括「桃花崗事件」中嘅發展商。呢位發展商雖然唔係一手引發事件嘅主要人物，講深入啲可能佢都係「受害者」之一。喺事件爆出之初，呢位發展商亦曾經現身公仔箱，同受影響商戶當面商討解決辦法同研究成因，而且仲當住鏡頭前應承等待檢察當局得出最後結論，先至處理塊地嘅問題。不過早兩日呢位發展商就向攤販發出咗律師信，向攤販追討過百萬嘅賠償。其理據就係因為官府到現在就事件進展緩慢，發信追討除咗有助推動官府快啲處理事件，而且亦避免將來檢察若證實發展商合理，可避免日後再花時間重新提出追討。況且需要保障自身利益，所以向法院提出民事追討，以助事件加快處理。再者發展商更加大大聲聲話，追討嘅一百萬其實唔算係乜嘢，主要係為咗加快事件嘅處理先至會同步進行追討。但係失驚無神發封律師信俾班商販，除咗係出爾反爾涉嫌以大蝦細，採取法律手段恐嚇商販迫令搬出，亦可以收取一石二鳥之效，呢啲就係小城嘅發展商。

早有結論(上)

危樓報告過咗半年都未見影，與當初官方承諾嘅三個月作最終報告，距離足足過咗一倍時間，到依家都未有聲氣。傳媒記者當然唔會放過追問負責官員，到底份調查報告進展成點。負責嘅官員面對鏡頭支吾以對，口窒窒咁話份報告仲有好多專家跟緊，又話好有機會要上法庭，所以要非常謹慎咁處理份報告。我哋唔知呢位官員點解咁緊張，做任何事情小心謹慎啲當然係好啦。但係作為官方正式報告，就無乜理由要驚呢樣驚嗰樣。首先，官府作為小城管理人，就有責任作出中肯有力嘅判斷。而且作為官府最大嘅責任係保護市民生命財產嘅安全，根本就唔應該因為怕咗有官司，就遲遲都唔公布事件嘅官方報告。其實份報告根本就好簡單，負責調查嘅專家學者，只需用正當物理邏輯，將事件發生嘅成因同始末寫成報。交俾負責嘅官員就經已完成任務。但作為官方對事件嘅調查報告，官府除咗要判斷事件對錯之外，仲要負起政治責任。因為事件發生後，最大損失就係居住於上址嘅庶民。面對財產損失固然係最大嘅問題之一，更重要嘅係同時失去咗棲身之所，部分原本正係每月供款中嘅住戶，無得住之餘更要另覓暫居地，再多一重負擔。官員口口聲聲話幢大廈無即時危險，居民可以放心住。但係講就梗係天下無敵啦，官員有本事就喺度住番三幾個月，體驗吓住喺上址嘅心理壓力，包保佢塊面更加瘦同無生產力。所以官府可以預期當報告一出，受影響住戶一定會根據報告作出民事控訴追討賠償，因為事實好明顯，一幢正常起出嚟嘅樓，邊會無端端爆主力柱，根本唔使官府出報告，庶民普遍都有咗結論。

如果有得揀(下)

礙於通關時間之長短，需要兩地合作磋商先至會成立，並非小城一己之力就可以話延長縮短。所以就算你官府點樣爭取，內地只要唔高興你點努力都無符。雖然話京城叫兩地融合，通關便利「打造一小時生活圈」。只係城際鐵路經已通車，延長通關時間未必對鄰近嘅珠海有更大利益。相反關口要增加人手應付需求，但係就會益咗更內陸嘅省城、甚或前往京城嘅人士。事關就算交通如何便利，點都需要時間。延長關口開放，對於庶民嚟講只會方便佢哋更加「深入內地」，以致有足夠時間返屋企，反而留喺珠海嘅機會仲低。而內地旅客，可以揀到小城旅遊時，唔使租住物不所值嘅小城星級酒店，有更多時間等佢哋玩夠之後返回珠海，進住更抵更便宜嘅酒店，第二日則可以唔使「享用」可能不太安全嘅「酒店早餐」，只要提早些少過返嚟小城呢邊食，點都叫做安心些少。再者內地唔少旅行團都係先遊鄰埠，然後再到小城觀光，而且唔少人更加唔係第一次到訪小城，業界想增加佢哋逗留嘅時間可謂出盡法寶。但係今次只要稍加一兩個鐘開放通關，內地旅客必然會選擇珠海嘅收費合理而價錢公道之酒店投宿，根本就無需要喺小城用「海鮮價」嚟「貼錢買難受」。
　不過據報「金光區」喺未來幾年，仲有萬四間客房陸續落成，屆時客房競爭定會更加激烈，而出名又口碑好嘅五星酒店，大時大節必定繼續爆滿，反而係兩三星嘅酒店仔即將面對劇烈競爭，到時就算下調房價，呢類低星酒店嘅服務猶如民宿旅館，有得揀梗係情願進近關口附近嘅酒店，至少都有個溫暖浴池幫你消除疲勞。

實際情況(上)

春祭期間官府突然同內地「傾掂數」，將關口開放時間延長兩粒鐘，早晚各加開一粒鐘，意謂方便庶民祭祖之餘，又叫做試行運作好等大家適應。但係過多幾日就會回復舊時一樣，實情邊個部門出乜野報告黎評估呢？

實情今次加開兩粒鐘，根本就唔會有太多實效，就算有做個報告，基本上唔會有乜分別。春節期間「爆關事件」純粹係乜人都諗住走黎小城，試下發新年財攞頭彩，根本甚少有本地庶民受到影響（上去食晚飯番唔切黎小城既唔計）。再者部分移居內地既本地庶民，早就習慣左現今既通關時間，早開遲收一個鐘，可謂完全唔覺有乜分別。最多係商業人要深入內陸，但係又希望趕番黎見家人，先至會有多少幫助。問題係只係前後兩粒鐘，深入左內陸既商家根本就唔夠時間番出黎。再者商家們遊起內陸咁耐，早有兩手準備，必定唔會令自己出現淪落街頭既情況。所以呢次所謂延長開放時間，成效肯定令人質疑。其實呢種前後各一粒鐘頂多只會救倒一班「喜愛夜蒲」一族，可以玩盡些少唔駛趕得咁辛苦。至於前往祭祖既庶民，試問有幾多位真係會同先人談心，傾到唔捨得走以至要趕衝關咁誇張呢？而且今次試行只針對旅客，反而最重要既物流業爭取左廿四小時通關咁耐，到而家乜野聲氣都冇，好難理解內地同小城官府傾左咁耐，究竟清唔清楚小城既通關需求係邊一方面呢？若果只增加旅客通關時間，只會方便又客帶更多奶粉北上，令兩地關稅損失更大。相反分秒必爭既物流業，早多一兩個鐘，分分鐘影響司機們每日可以走多一轉，令市況更旺。相關負責人其實有冇清楚理解實際情況呢？

淪為陪襯(下)

「工會派」雖然不斷為其他行業員工爭取權益，但係一直欠缺全城最大行業「公務員」呢個板塊。「工會派」同公務員嘅對立有其歷史原因，而且「工會派」早就被「統戰」，思維角度仲係保持住幾廿年前西洋人官府同庶民兩個概念，認為階級有別要互相鬥死為止，根本就不屑與「公務員」為鄰。但係依家政權回歸，官府又係自己人做返，「工會派」其實可以擴大發展，爭取公務員成為其中一份子。可惜嘅係今時今日「工會派」早已慣於安逸，加上除咗「工會派」被「統戰」之外，全城大部分商界都變成「愛國商人」一同被「統戰」，喺閉門一家親嘅狀態底下，「工會派」一直只因應「勞動關係法」，向官府爭取勞工階層嘅最大空間，完全無視依家大部分公務員都係本地庶民一份子。再者「工會派」不得不同意舉手贊成，其實都係完全因為議案係涉及全體打工仔嘅權利，若果唔係佢哋都可能反對埋一份。今時今日嘅「工會派」喺議事堂內係第一大黨派，而黨代表更貴為「垃圾會」主席，「工會派」若果真係為咗工人權益幫手「硬推」，其實成數應該不小。不過近年「工會派」同商界其實「大和解」咗好耐，「工會派」不時收到商業贊助表現「河蟹社會」，以至「工會法」下所屬代議士只能「夾硬贊成」而不能「硬推」，再加上若果真係通過到，到時功勞只會歸土生代議士，作為「工人代表」嘅「工會派」不單面目無光，而且偷雞唔到更加損害「統戰」下同商界嘅「河蟹」關係，所以面對呢個法案「工會派」只能就住就住，失去先機及主導權，淪為陪襯一份子。

無主動爭取(上)

早幾日有土生代議士，繼續每屆會期都要嘗試一次，向垃圾會提出「工會團體基本權利法」。由零五年至今呢位土生代議士，經歷八年四次提出該法案，而且每次都由佢獨立提出，可惜都係失敗收場。呢個簡稱「工會法」嘅法案，主要係希望能夠明確賦予工會的法律地位。大家都好奇怪，點解呢位土生代議士由有公職人員唔做走去做代議士不特止，仲要搶人飯碗唔怕得罪「工會派」，次次都由佢一個獨立提出「工會法」，明知不可為都要玩「硬撐」。事關呢位代議士多年從事公職，一直參與前線低中層公務員工運工作，加上本身土生身分熟悉西洋話，對官府運作模式可謂瞭如指掌。本來以佢咁嘅背景要上到高官位置一啲都唔難，只要泊碼頭埋堆就搞掂。不過佢選擇咗為前線公務員發聲呢條路，要上位自然無佢份。呢四次都由佢提出「工會法」，表面上好似同「工會派」爭飯食，實則佢都係代表低中層工務員，爭取公務員工會嘅合法地位。大家可能覺得公務員都要搞工會？喺小城打「官府工」表面上好似鐵飯碗，好似無老闆咁。實則內部門戶派閥甚多，唔玩擦鞋埋堆無得升不特止，隨時調你「守水塘」。五六十等退休嘅就話算數啫，三十未夠就要守一世水塘就梗係條氣唔順啦！喺呢個時候若果公務員有「工會」協助，就可以解決上司無理要求及制度不公平等問題，情況等同老闆無理解僱打工仔一樣，所以出發點並無同「工會派」爭飯食。反而係「工會派」次次都唔會自己提出要人哋提出，淨係識得舉手贊成，完全無主動爭取過。

業餘行古惑(下)

同日小城最大報嘅頭版，竟然出現咗令人咋舌嘅全版廣告，大字標題打正旗號「高價收購龍蛇混鈔」，全城嘩然！網民紛紛轉載該份頭版全版廣告。然而同一時間，各人手機亦不約而同地響起訊息音頻，提示大家該公司會高價收購龍蛇鈔，叫大家要留意呢版廣告。網民起哄謂究竟最大報刊登呢段廣告有無觸犯法例呢？有意見謂就算唔犯法，但係都算鼓吹炒賣行為有失報格。不過根據過往經驗，就算想賣廣告嘅公司唔知道有問題，「最大報」都好應該清楚明白「份廣告唔係幾妥」。事關刊登者都要負上最終責任，否則點解要發牌俾你而唔俾第二個呢？雖然話登個頭版全彩廣告，可以賺到十六萬，條數真係幾和味。但係叫得「最大報」根本啲錢多到「使唔晒」，又使乜為咗貪嗰小小十幾萬，要賠上大報聲譽呢？當然「向錢看」係大勢所趨，如果唔係都唔使租層樓俾「非牟利機構」，收其「管理費」牟利啦。不過事態發展確實令人關注，小城嘅財金部門、刑偵衙差、甚至連私隱辦都對事件展開調查。事實上該公司嘅宣傳手法確實備受爭議。首先刊登廣告高調宣傳，明目張膽咁宣示高價炒收流通貨幣，就經已令人懷疑是否犯咗金融法例。再者發出大量手提電話訊息廣告，當中好可能涉及小城最大電訊商有否出賣客戶資料。咁高調咁出個疑似犯法嘅廣告，似唔似內地數仔報警求助案件一樣「業餘行古惑」？但係咁專業嘅「最大報」，今次竟然亦犯上呢種咁業餘嘅錯誤先至令人最錯愕，難怪有網友戲言，京官新上場都唔及十六萬咁吸引。

業餘行古惑(上)

早兩日嘅頭版頭條報道，兩名內地數仔發現自己可能中咗「千后」計被人呃咗成四百萬咁多，結果向賭場外衙差報案，點知衙差查查吓發現兩人涉嫌放貴利，卒之拉咗兩人並追緝疑似「千后」及另一名同黨。
正所謂世事如棋局局新，數仔唔知放貴利係犯法經已係一絕，更加用「過程中從來未有在對方身上獲取任何利益」做抗辯理據。無攞過著數所以未算犯法，咁嘅邏輯思維走去放數，唔怪得會自投羅網，真係想問吓佢哋買包白粉返嚟但係又未賣得出，未曾真正獲利咁又算唔算犯法。報道指嫌犯同疑似「千后」雙方並無簽下借據，兩條友只靠對方聲稱賭術了得，就咁相信對方而借出幾百萬俾人去搏殺，足證兩人智商問題甚大。就算兩人皆虎背熊腰「好打得」，都無理由精明到「放鳳歸山」被人走咗去，而且仲要大聲夾無準咁向衙差表示自己受騙。今時今日太多業餘走精面嘅人學人行古惑，結果搞到自己身陷囹圄之餘，就連衰咗都未知道自己衰乜。做乜嘢生意都有風險，點樣評估則各施各法。但係好似呢兩位內地數仔咁天真，以為內地潛規則喺小城可以通到上地面，用埋晒民國年代街邊賭檔嘅方式去學人放數，唔單止白痴兼無腦，更反映出喺佢哋心目中，小城嘅字花檔就等如以前街邊賭檔，場外規則會有衙差幫手睇住，而且其「利益」更加會被合法保護。兩位「笨忍」被人退蝦籠咁羞家，早就應該投河自盡一死以謝天下，仲竟然夠膽當自己係正當商人無辜被騙，報官報衙差追討損失，莫非佢哋以為借貴利俾人等如買錯迷債，可以搵對「兄弟」陪返俾自己？其實佢哋先至係做緊鄰埠對「唔信兄弟」嘅角色，不過被人偷到雞咁解。

無得接軌(下)

時代進步小城需要同「國際接軌」，呢樣嘢似乎無可厚非。就正如「街坊經濟部長」話齋，當經濟發展咗之後又要限制發展返轉頭，咁樣係無可能嘅事，亦都接受唔到。當然庶民都唔係輸打贏要，但係發展都要各方同步，方可叫做發展。簡單嚟講庶民一直期待衙差能夠做到整體與「國際接軌」，可惜嘅係小城「一哥」咁耐以嚟，一直都無試圖或企圖同「國際」去接軌。最簡單就係當年「抽水」哥事件中竟然容許衙差無危險情況下鳴槍示警誤中平民，最後不了了之下文都無埋。之後當然係一直被人詬病嘅打擊黑工不力，由一齊出動每次都拉唔到人，到最後出動完至通知傳媒，引伸出嚟嘅就係各種打壓言論自由、限制消息流通等，連同不定期無目的嘅入境黑名單事件，「巡捕部」唔單止無向「國際」靠攏，反而係背道而馳。今次京官出巡衙差拉人封艇，「一哥」雖然表面道歉，但係說話內容字字珠璣。過往「一哥」都喜好用市井對白去表達自己意思，句句「保安仔」呢類咁嘅街市對話庶民想唔明都幾難。不過得閒佢又學人拋吓書包話俾人知佢識《紅樓夢》名句，只係到最後都係改唔到「黑道化用語」，當住咁多傳媒講「大家都係出嚟行走江湖」。唔好玩啦！如果大家都係「出嚟行」，咁「一哥」有無「預咗要還先」？無就唔好學人亂用「成語」，咁樣點同國際接軌先？

生人霸死地(上)

巡捕司長一句：「大家都係出嚟行走江湖」，真係嚇親街坊。話時話就算茶餐廳吹水客，都未敢咁大聲講「大家都係出嚟行」，司長嘅呢一句果然盡顯大佬本色。原本，經鄰埠喪報嘅傻警一役，一眾庶民「同仇敵愾」槍口一致對外，阿鐵馬巡警咁辛苦幫婆婆推車上斜、建立出嚟嘅警隊良好形象，就係咁樣被「一哥」一句「出嚟行」破壞晒。庶民平時雖然唔多出聲，但係唔等於乜都唔理，官府衙差嘅所有表現都一一記喺心裡面，而且亦會因應不同時間嘅表現作出評鑑，如果唔係點會有民意調查評分呢！
　京官出巡事件中，前線衙差日做夜做無啖好食，都係為咗幫老闆保存顏面唔使衰俾上面睇，處理得好與壞其實都係同上頭老頂點樣管治有直接關係。但係老頂點樣出嚟頂、點樣出嚟拆就真係好大學問。當然小城呢個「軍事化人員」組織入面，主要係用「年資」嚟計算功能大家都知道。但係若果當老頂嘅表現仲差過散仔十分一功能嘅時候，知縣是否係時候考慮要換人呢？強如鄰埠財金老頂、曾掌管千億美金資產嘅環球財經一哥，到佢退休之時都曾經講過一句：「鐵打嘅衙門流水嘅官」。意謂最重要嘅係組織架構而並唔係人，有完善嘅制度系統，無咗邊個都唔會出問題。不過小城而家出現嘅問題係，制度唔完善之餘，仲出現咗部分唔應該再存在嘅人。要完善制度係需要時間去經營，呢樣嘢庶民都十分理解。但係經歷咗十三年都未能完善個制度，作為管理層係唔係應該反省下，唔好再縱容前朝餘孽繼續生人霸死地呢？

落錯鞋油

京官南巡，大人物駕到，周圍封路自不然會，但係今次高官走嚟小城玩足三日，民生有幾大影響可想而知。事關過去京官最高層到訪小城，就算玩足三日，最多都係出席各大會議主要官府重地，相對影響民生較少。加上最高級官員重大視察小城，經已係十年前嘅事，正所謂十年人事幾番新今時唔同往日，小城今日經已係國際級休閒旅遊城市，京官就算要視察，都應該適可而止。雖然今次話就話最高領導到訪，但係首次踏足小城，要仔細了解小城嘅心態，大家都可以理解，不過喺安排上知縣就真係要查找不足。首先淨係揀日子都唔太好，新十五都未過，唔少人經已上班，但係亦有唔少遊客趁呢段時間到訪小城，雙重夾擊，喺小城交通壓力本來就唔細嘅情況之下，首長級一到主要路段左封右封，最大忍耐力嘅人都頂唔順啦！況且官府為咗爭取面子表現政績工程，封路不特止，就連人都封埋。本來領導到訪，理應為咗政績顏面，應該開放更多本地及海內外媒體，將首長訪問小城嘅過程宣揚開去，好證明自己嘅管治做得幾好。但係今次官府唔單止無開放俾更多媒體進行採訪，反而以所謂保安理由，拒絕唔單止海外媒體，就連本地媒體都被人誤會為搞事者，四腳朝天咁連人帶器材一併抬走，最後受到業界一致指責，最後要道歉收場，咁又何必呢！原本要擦鞋都無辦法，搵啖飯食啫無乜唔妥。不過就連救護車都無情講，咁就真係過意唔去，況且首長應該都好關注小城民生，若果俾佢知道，小城官府用咁嘅態度對待庶民，首長又會有乜反應、官府又究竟有無落錯鞋油呢？

快閃局長

危樓事件又有新進展，負責小城主要收地拆樓行動嘅局長如是說：幢樓拆定唔拆，唔係官府話事，係業主同發展商嘅問題，仲話技術上可以恢復樓宇結構嘅安全，只係居民無信心再返入去住佢都理解咁話。阿假局長講到呢度，好明顯話緊俾大家聽，官府嘅責任只係做到呢度，各相關人士大家好自為之。本來呢種看似涉及消費爭議嘅事件，好似應該係搵「燒毀會」。但係今次唔係死人都「差唔多塌樓」，唔單止係產品質量問題，更加係重大公共安全事故，若果局長咁都話無問題，不如就叫將自己部愛車長期泊喺幢大廈門口，睇吓局長精神壓力有幾大。其實知縣喺呢單嘢發生之後，可以做到咁快速反應，都係證明咗件事唔係一般問題咁簡單，若果只係涉及業主同發展商咁簡單，搵「燒毀會」搞掂就得啦！今次商家同業主都搵緊責任誰屬，但係官府嘅報告就一拖再拖。無他嘅，作為小城第一拆樓人，只要佢一句話要拆，根本就無人反抗。但係今次若果話要拆就關係到要賠償，賠幾多？邊個賠？都係局長唔肯孭飛之故。作為收地拆樓行動大隊長，竟然安全與否咁嘅專業判斷都唔敢落，好難怪業主們咁不滿。既然局長講到幢樓可以恢復結構安全，咁就更加要由佢指定做修復嘅品質監控，再由佢寫包單保證安全，咁先至係負責任嘅官員嘛，業主們應該無得Say No。可惜嘅係局長今次玩快閃，盡可能都唔想事件上身，照計以局長嘅條件有晒理據話拆就拆，點解今次咁多顧忌？莫非經佢嘅專業判斷下，要孭飛嘅係「正怯毀完」嘅發展商，所以想盡快甩身？

查找不足(下)

幾千人迫爆關口造成嘅事件，媒體不斷採訪關口遊客況狀，唔少「自由人」表示迫咗幾粒鐘至過到嚟，唔知點解小城嘅接待能力咁差下次都唔嚟咁話。此話一出相信有唔少「自由人政策」下嘅受害者即時拍晒手掌，順道贈番句「好行夾唔送」。「自由人政策」實施咗十多年，小城都唔係未試過被迫爆，數最經典者梗係迫爆字花檔大門，直頭上埋國際頭條添。無他嘅國人體質天生嗜賭，若果唔係祖國又點會明令禁賭，反之小城係全國唯一合法賭區，唔嚟見識下就執輸啦！結果千算萬算之下全世界同一時間撳掣，結果梗係所有人都塞晒喺關前郁都唔郁得啦。
　今次塞爆闖關，除咗為小城嘅「自由人政策」敲響警號之外，亦引發出小城天價房嘅問題。小城既然旅客咁爆旺，客棧自然水漲船高即日海鮮價。想住有規模而又名氣充足嘅五粒星，客房早幾個月前就預訂爆滿。豪無準備諗住小城只不過係得閒路過可以瞓番晚嘅人，一係就捱貴租六星級價錢三星級享受。再唔係走返轉頭衝返珠海，睇下仲有冇一兩間平房可以借宿。但係排咗幾粒鐘至過到關，又要捱多幾粒鐘返上去過一晚夜，玩唔到兩手又話要走，唔通聽日又再排多一次過嚟「玩咩」！就係咁樣「自由人」旅客最終不情不願之下，唯有搵間非法旅館暫時棲息，就算官府點樣所謂「大力打擊」，到頭來都係因為政策驅使迫人犯罪。試想下一間三星級「酒店」初三要價係五千八個大洋，「半島」價錢「綠島」服務，唔用貼錢買難受之外都唔識得用乜嘢嚟形容好。究竟「自由人」係冇諗過喺度住番晚只係嚟玩兩手就走，定係總之批咗就可以去玩就算瞓街都唔理呢？真係值得旅遊官細心研究查找不足。

攞彩(上)

剛剛放完嘅新年假期，大部分由年頭做到年尾、捱到殘散爛嘅打工仔，都選擇趁難得長假外遊充電，慰勞一下長期作戰嘅驅殼。當然，有假期亦都唔少得要關顧下鄉親父佬，話晒成年冇見過面，回鄉度歲亦都係唔少人嘅選擇。其實小城多年以嚟，農曆新年呢個咁傳統嘅大節日，口岸嘅疏導壓力不嬲都唔係人咁品。多年來重災區關閘不斷擴建，由牌樓一塊建到今日咁大幢建築物，規模早就超其他海關設施，成為小城人流量最大嘅地方。但係經過早幾日迫爆關口之後，即時嚇壞唔少人。好多人會問點解咁大個關口都疏導唔倒人潮，反而兩個局長都話小城嘅承受能力冇問題，仲話早有預算添！
　大家都知道今次「引爆關口」嘅並唔係本地庶民或者係經常往反嘅外勞，而係大家日日都見唔少嘅「自由人」。係小城嘅大小官員、外內資商家、以及一眾業界大力打造之下，小城迅速成為內地居民經常幫襯嘅遊樂熱點之一。加上國人傳統新年要發財攞意頭，字花檔林立嘅小城就更加吸引唔少本來有冇乜興趣嘅人，都諗住走嚟小城一試來年運程，玩兩手貪意頭好。卒之未見官先打八十，就連關口都未到到，先要排隊三粒鐘，結果大小朋友齊齊體能同耐力盡失，關都唔過即刻走去醫肚否則命仔凍過水。其實兩位局長真係冇講錯，按照每年近三千萬遊客數字，平均每日都係七八萬人到，再唔係俾多二三十個巴仙你，頂多都唔夠十萬人，點計小城都受得起。而來客太多咪閂門囉，就係關長個招拉閘唔放狗，有排隊但係入唔到境嘅就係你地唔好彩。所以要攞彩首先都要識揀時候，排隊排到火晒玩衝閘，頭彩就冇掛彩就有分。

乜都搶(下)

兩地奶粉荒，搞到將奶粉變做「戰略性商品」、又「澳人澳奶」咁，依家直情有個罐都要搶咗先講。記得早一兩年就有「盲搶鹽」，再早兩年沙士時期就搶「醋」同「板藍根」，都唔好計口包同埋探熱針呢類嘢，總之呢十幾年嚟每隔一年半載就有嘢需要搶吓。但係要「搶」嘅物品幾乎都係「無厘頭」唔知點解都搶嘅。最經典嘅「盲搶鹽」係大家都估唔到，呢種咁平價而周圍都有嘅天然物品，都會「被搶」一番。而今次終於引起鄰埠同小城都恐慌嘅「搶奶粉」事件，簡單啲講就係「受害人」係未來嘅下一代，而且話唔到俾大家聽佢有乜唔妥，只會用行動去表達，但係當行動表達咗之後就係出事之時，所以至會引嚟父母家長們咁大反應。
　睇返奶粉呢家嘢，其實只係發明咗幾十年，咁幾千年嚟人類究竟食乜嘢大呢？而且全世界而家仲有好多人唔知乜嘢係奶粉，咁呢班人又點樣養育下一代呢？白話中有句「有奶便是娘」，我哋細路嗰陣都未必個個食得起奶粉，最終都係靠「媽媽奶」養大，而且依然身心健康。況且近兩年所謂現代醫學，又再主張人奶更勝奶粉，其實正好借呢次事件，改變下現代媽咪依靠啲牛去養自己嘅下一代，靠自己咪更加好！首先唔怕被人「搶」奶，再者又無「被加價」嘅壓力，當然更加唔存在「唔夠碘」嘅情況。當然有部分母親因為體質問題未能餵哺母乳，咁佢哋可能需要反璞歸真，要請個奶媽返嚟幫手都未定。但係若果真係咁樣落去，可能遲下大家唔止係搶奶粉，連奶媽都搶埋。反正強國同胞只對外地商品有信心，肯定會搶走唔少「天然奶媽」。不過第二時若果有研究發現「童子尿」有助抗衰老，大家就要小心啲唔好喺車站內幫小朋友「便便」，否則一樣有機會被人搶 。

手法問題(上)

近日最震撼小城新聞，莫過如「幼兒饑荒」事件。全城一罐難求日子持續之下，官府急推「本地嬰兒專屬奶粉」計劃，將「幼兒饑荒」定性為「突發性公共衛生事件」，確保小城有身分證之一歲嬰兒至少個個都有得食，事件先至稍為平息。
　今次造成全城奶粉荒主因，都係強國同胞大舉南下掃貨，加上水客帶動令小城市面缺貨所形成。
　其實強國同胞早就於世界各地奶粉主要原產地進行搜購，搞到成為世界問題。繼而於不久前攻陷鄰埠，搞到鄰埠父母日日叫救命，而一水之隔嘅小城自然難逃厄運，市面貨源瞬間蒸發。今次官府嘅迅速反應，小城父母們大都一致讚好，相反鄰埠到而家都仲未有實際措施處理問題，搞到連鄰埠新聞都叫官方學吓小城點樣處理。但係今次官府用突發性公共衛生事件去處理奶粉問題，雖然只不過係暫時性，但係亦都開咗一個好壞嘅先例，就係乜都唔理先用行政手段處理，只係治標唔治本。反而鄰埠對於問題嘅根本處理，坊間有好多唔同嘅建議俾官府，差在對方官府做唔做咁解。例如有人提出制度內有「法定儲備商品」呢條法例，只要將奶粉歸入此法例成為項目之一，就算商家要賣俾強國同胞，都要留返一定數量喺個倉度等本地人亦有得買，而且官府亦有權限制售價同禁止出口。呢種做法若果鄰埠官府決定，將會係由鄰埠知縣同行會成員通過，就可立法即時生效。而呢種處理方式同小城嘅行政命令最大嘅分別，就係處理方式屬永久性，唔使擔心搞搞吓又要再改，而且更加有法律效力，將來就算有乜唔妥，都唔使由知縣一個人攬晒。

敵我矛盾(下)

氣象問題只可預測無可防避，同官府實施字花檔禁煙一樣。官府今年開始實施嘅「字花檔禁煙措施」，意謂全城禁煙嘅步驟之一。不過實行咗三個禮拜，場內越禁越大煙。官府嘅五十巴仙面積禁煙只係用純粹面積計算，而從來都無理過賭檯可以有好大彈性。禁煙區賭檯唔開，要賭嘅唯有去吸煙區賭，而返工者更加無得揀，張檯唔開老闆又邊會叫你去張檯度企呢！結果就梗係越禁越大煙，越禁越大鑊，就連唔賭但係想食煙嘅，都走埋去吸煙區張檯度食，先至唔會犯法。官府算唔算好心做壞事就好難講，事關要禁煙係大趨勢唔輪到官府話唔做。但係政策會令到官府最大嘅老闆「有可能影響生意」，結果急就章咁做啲唔做啲，諗住過得面子過得人就算，而推出呢種「政策」好明顯係同「大老闆」們協議訂立下嘅產物。就算有老闆玩鬥氣講要全面禁煙，都係明知早有協定無得改變，先至會咁大聲講出嚟，明顯同現實不符。再者淨係得字花檔仲可以實施「吸煙區」政策，明顯就係大細超。就算強國人有幾咁橫蠻無理，大家都無見過佢哋喺飛機上面食煙，而且仲要係長途機添。咁即係話唔會有人因為十幾個鐘頭唔食煙就會出事，用「禁煙有可能影響生意」呢種理據根本就唔成立。況且按照鄰近地區經驗，就算全面禁煙初期多少生意受到影響，到最後大家適應過後生意就會陸續回復正常。同時亦能夠重回官府原意「減少吸煙令醫療負擔有所下降」，而官府呢鋪越禁越大鑊嘅爛攤子，若果再唔實行全面禁煙，恐怕好快就會演變成近期大熱嘅「搶奶粉」事件嘅翻版，由內部矛盾變為敵我矛盾，到時仲點樣成為世界休閒娛樂城市呢！

符合國情(上)

曾經數年前「有幸」上京公幹兼旅遊，雖然是破紀錄之攝氏零下十幾廿度，但能夠首次踏足京城，就算唔上長城，都當咗自己係好漢。冰點下之京城除咗夠凍之外，最重要嘅係連街外都一片平靜，唔似得小城終日人踩人嘅喧嘩，而零下十幾廿度亦都為京城多添一份莊嚴肅目。
　但係上星期新聞報道話，京城首次發出「橙色霧霾」警示，講到好嚴重咁話。雖然係「氣象問題」，但係「霧霾」呢家嘢庶民唔係點明，仲加個「橙色」即係點呢？「霧」就對於庶民嚟講係家常便飯，每年總有幾個月好大霧。但係何謂「霾」就真係連讀都未知點讀，更何況了解內裏意思呢！最後經過偉大嘅「央視」說明之下，霧同霾係分開兩個級別同型態嘅代表，霧分黃橙紅三級、霾就只分黃橙兩級，而今次嘅「霾橙色預警」就話咗俾大家聽，大沙塵大到好危險咁解。但係問題又再出現，最危險嘅「霾」再加上「霧」又係乜嘢狀況呢？搵勻晒所有資料都無答案，但係齋睇公仔箱片段就真係差啲伸手不見五指，大霧加大塵而形成嘅「霧霾」，即係唔止令你睇唔穿，仲嚴重危及身體健康添！小城庶民一直都好奇怪，點解以京城咁重要嘅地方、過往帝王居住地、今日全國最重要嘅人物喺度生活，竟然都會發生呢種咁嘅氣象事件？原來京城嘅特別地區有特別嘅設備令到重要人物免受災害，而「天子腳下」之凡民則只好各安天命自求多福。就算係外國使節都唔例外，反正氣象問題係大自然定律，就算「花旗使節」用自己一套預警制度去警告當地國人，對於整體京城人嚟講依然係工照開課照上，最多唔上戶外體育堂，咁呢樣嘢又似乎好切合國情喎！同字花檔禁煙同一套運作邏輯。

無人性(下)

對於官府思維似乎真係非一般人能夠明白，坦白直接講句就係「無人性」。若果唔係點會官府嘅用意大部分人都唔明呢？抑或「官府」嘅理解同「常人」係有分別，所以庶民係「無能力」去理解「官府」嘅作為呢？
　按照今日「國人」解讀，照理應該官府係「為人民服務」，因為國家早就突破舊制度無咗「 父母官」好耐啦！咁作為服務人民嘅「官」，係唔係好應該聽民眾嘅訴求先至推行政策或者係「建設」呢？例如官府做緊乜其實有幾多人知？一個諗法唔聲唔聲，就同人講要將星星公園下面個海（下面曾經係個海，唔係湖甚或「水體」呢種語言偽術），改造成為「生態池」。環境變遷滄海桑田，無人可以或者希望個城市唔發展落去。問題係今時今日大部分人都知道，好多嘢「破壞咗就無得返轉頭」。依家國內官員時興將下一代與及家人，全數送出國以求確保下一代能夠有更好嘅生存環境，而官員們所付出嘅係國內未來嘅生存環境，呢班人以為只要一走了之甚或自我犧牲予家人，就可以俾下一代可以有更理想之生存環境。但係佢哋無諗過就算花旗總統都重提佢出身，去到「千島國」都要不忘其養育之恩。即係話所有人都唔可能將自己嘅出身抹去，只要該地無乜對佢唔住，應該無乜理由要大肆破壞自己嘅出生地。不過小城官員似乎對呢個小城極之「憎恨」，竟然連所剩無幾嘅生態環境都要破壞到體無完膚至安樂，將一個天然嘅生態樣本放入「實驗室」裡面，最終製成標本，令到下一代只能用甚麼「唉瘋」等虛擬媒體去認識消失了的小城。

無人性(上)

無嗱嗱一個公仔箱節目，竟然突然停播。官方消息話人手唔夠所以停辦，鄰埠就有數碼台停播事件，不過唔係人手唔夠只係錢唔夠，所以個官方消息係好有問題，傻仔都知道錢唔夠先至有「做唔住」嘅問題，家下官台咁疊水，點會「唔夠錢請人做嘢」呢？結論只係得一個，就係「有人唔想個節目繼續做落去」。事實上對於商業頻道，收入唔好就會將節目停播，呢類正常嘅商業行為，觀眾、聽眾等早就習慣咗。不過對於官台嚟講就「唔存在」節目質素唔好、「收益」唔夠要摺埋呢樣嘢。官台一直以嚟，鮮有節目會被庶民所討論，但係亦做足咗咁多年，完全無理過合唔合乎經濟效益，而且開台咁耐蝕足咁耐，仲蝕到連賭王都驚咗你，乜都唔要送晒官府，免得每年都要泵水救亡。依家由官府「全資」擁有，用「唔夠數」呢條橋呃人根本就係搵庶民笨。況且該節目經歷咗幾次變革，由室內走向戶外、由自閉走向群眾，先至有得出今日咁多人討論呢次停播事件，甚至有人遊行抗議官台中止節目。雖然庶民咁耐以嚟對官台好感唔大，認知之中淨係知道佢十分「燒銀紙」。但係一旦消失咗，好多庶民又覺得唔捨得，覺得小城應該有個自己嘅電視台。尤其是今次所停播嘅節目基本上係唯一一個現場互動，雖然未至於能夠令官府真正同庶民直接溝通對話，但係對於協助社會和諧有一定推動力作用，事關今日小城官府咁多唔妥嘅政策，迫到庶民死死吓，若果連呢個多少都可以為庶民大眾「消消氣」嘅節目都無埋，官府注定下次要面對更激烈嘅抗爭。

身分認同(下)

最近有人將「野火教授」受訪事件，加埋《小明過大海》同「衙差太傻太得閒」，去評論兩地關係緊張的狀況令人擔憂。但係個人認為，作者只以三件「影響兩地關係」嘅事件一併討論，似乎並未全面。反而對早前「保釣英雄」回歸時，被同船鄰埠「兄弟」問候高堂一幕隻字不提實在有欠公允。當然每個作者都有其背後目的同取態，呢度唔作出評論。只不過兩地人之間從來都無所謂對等與否嘅問題，因為大家都唔能夠以偏概全。但係被人戲謔幾句就群起反擊，足以證明庶民好多人本身有太多不快回憶，但係又無能為力，而且內心其實有唔少缺乏自信，從而由自悲引發出自大，加上唔少人喺度穿插搞事，令到事件似乎變到一發不可收拾咁。但係最近公仔箱討論呢個話題時，就有目擊者親述事發經過，指出當日交警實情喺度執勤中，由於要盡快清場封路交吉，所以幫助阿婆推紙皮車，而唔係單單因為人情味而作出以上舉措。不過就算事實越嚟越清晰，臉書上發起之《要求該報道歉》嘅運動似乎仍未停止，當中有唔少人依然係用「對方無人性」呢種角度去批評，更加反映到大部分人根本就唔需要或者係唔想知道個事實係乜嘢，只求有得發洩就繼續鬧，完全脫離理性討論，而所謂嘅「人情味係核心價值」之論據，唔該請不要加諸於我身上。「人情味」只可以係「有」或者「冇」，絕對唔係「核心價值」。若果再用似是而非嘅一大堆花言巧語，意圖或企圖喺小城網民中挑起民粹主義，離間兩地平民間嘅感情，係絕對改善唔到本土意識同小城身分認同。

身分認同(上)

新年伊始，首先祝大家新一年更進一步！小城亦都更進一步！尤其係元旦開始，大家就可以換番張添附永久號碼新版回鄉證，回鄉省親退休養老，個號碼都會跟你一世，正正式式有番個永久嘅身分。而祖國嘅新年賀禮又唔單止送個永久編號俾大家咁簡單，而係有好多人經已第一時間體驗過嘅省城城際輕軌，唔使一句鐘，只要行兩步過關轉左，就可以即時上車直達省城邊緣，再轉乘地鐵的話唔使半句鐘就可抵舊城區。當然有大志者更加會二話不說直奔高鐵轉乘，合計最快九小時之後，就可以同京城同學或愛人共進晚餐。呢條堪稱地上最長之國內高鐵，今年正式抵達小城邊緣，庶民只要一出關，就可直達省城轉乘全國最快速距離最長之高速運輸網絡，對於以後要「大地任我行」之背包客，自然係最大喜訊。然而回想起大家「細蚊仔」時候要過渡頭開上車嘅日子、行路上廣州嘅笑料，就好容易發現城同鎮嘅地域開始模糊，不出幾日就發覺好多大家聽唔明嘅方言，出現喺各位身邊。作為「世界休閒旅遊城市」定位嘅小城，如何喺呢種咁多唔同方言嘅環境中，表現出作為小城庶民一員嘅身分，係庶民現今急切需要解決嘅問題。喺鄰埠報道小城衙差一役當中，小城網民唔少都表現出激動憤慨，高度團結反對外地干預小城內部事件，但同時亦引發小城庶民身分認同嘅問題。有人從鄰埠同小城兩個兄弟城市邊個係兄邊個係弟出發，伸延到城市實力同人文質素關係。當中唔少意見都係以小城「人情味」作出發點去批評對方，用以小城身分認同作結。若果真係咁簡單，官府管治理應好順利，只要乜嘢都講人情味就搞掂，唔使乜嘢專業意見。

上山頂倒數(下)

　不過勢估唔到經已有人成立群組活動，要求「境外媒體」公開道歉，仲有成三千幾人聯署。大家真係唔好低估網上力量，事關單嘢只不過仲係初期階段，未有人肉起底、未有示威遊行、更加未演變成暴動（以上乃撩事鬥非者背後目的）。但就因為件咁小嘅事，令人開始感到小城嘅身分認同亦都發生咗好大嘅變化。事實上鄰埠同小城整個歷史背景睇落相似但其實唔似，然而過去幾十年間，鄰埠一直處於經濟優勢，令部分人面對小城人大鼻無禮。而「大鄰埠主義」其實亦一直存在於部分人心中，尤其自恃見識廣博嘅人更容易睇低一般小城嘅庶民。不過基於近年小城經濟逆轉，反而鄰埠回歸後經濟民生都處理得唔係咁好，兩地經濟實力拉近之下，吸引咗唔少鄰埠人過埠到小城搵食，當年揭發被捕嘅鄰埠黑工面對鏡頭前的不屑嘴臉依然歷歷在目，而且唔少過埠嚟搵食嘅人，都係入職小城公司嘅管理階層，兩地文化加上管與被管都起咗唔少衝突。潛藏喺庶民心目中被壓迫嘅仇視心理逐步浮現，加上有撩事鬥非者刻意進行挑撥，事態發展明顯會繼續擴大落去。其實該篇報道所用嘅低級反諷伎倆唔單止係反諷，小城網民最唔高興嘅係該文直情係搵小城衙差「墊屍底」，兩地衙差都諷刺晒，所以至會激起咁大民憤。但係小城網民亦有唔少憤青代表，動不動就出粗口鬧咗至算，並無好好認真咁睇晒全段文字就即時作出反應。鄰埠人嘅刻薄抵死係一個問題，但係小城衙差有幾多個好人大家心中有數，只要大家留心睇清楚幅圖，就會明白位交警其實係進行緊封路，幫位阿婆推車未必係佢好心，更大可能係佢想阿婆快啲推走架車，以免阻礙其他工作甚至係阻佢收工。所以兩地腦殘者唔該除夕夜全體上任何山頂進行倒數，冷靜番吓先啦唔該！