點樣保護自己（下）

另一恐怖風化事件，竟然係官府社工涉嫌雞姦男生。作為專業社工兼受聘官府，身分上經已受到一般庶民信賴，何況係一個十多歲嘅男仔。況且大家仲係同性，個男仔更加諗都諗唔到呢位大哥哥會做出啲咁嘅事。我哋都唔係心理學家，唔識得評論呢個「魔鬼社工」精神狀態。但值得關注嘅係呢類受害者於醉酒後被人侵犯，而犯案者多數係熟人甚至係最可信賴嘅人。而呢個「魔鬼社工」被衙差拘捕時，屋內發現不同類型嘅性用品，嫌犯更將施暴過程用相機拍低以便日後「欣賞」。好明顯呢個「魔鬼社工」係有預謀犯案，刻意灌醉受害者後再進行施暴。雖然據報未有跡象顯示同職務有關，但對於「官府社工」呢個身分，喺外界經已有一定程度上嘅象徵意義，就算同職務無關，都對整個行業帶嚟極大影響。上一單小學生付費非禮係由駐校社工揭發，呢一單就係官府社工親身犯案，令到大家對呢個職業身分有種「天使魔鬼共同體」感覺。當然「魔鬼社工」係個別事件，相信大部分嘅社工都係有愛心嘅專業社工，問題係大家點樣識別同埋如何保護自己。飲醉酒相信唔少人都試過，事件中嘅男生只係做錯咗單獨上嫌犯屋企飲酒，就經已鑄成大錯。事件反映今時今日到處都可以係陷阱，而且不分性別、身分同年齡，就算係最親密同可信嘅人，都可以係施暴者，要小心保護自己，就只能盡量小心應約，唔好單獨喺私人地方會面，減少出事機會。至於對方是否信得過，根本就無樣睇。