校巴公交

新巴載客入油，庶民笑到反肚。管理層解釋事件屬人為錯誤，正在積極尋找解決辦法。當然單嘢創咗小城開埠先河，過往從未發生過。話就話人為錯誤，但係司機其實都為咗乘客好，唔通大家都希望部車行行吓無油，又要落車搵站然後再等多一次巴士咩！但係咁就犯咗規。不過事件係反映咗綠巴到而家為止，都未設有獨立專屬油缸配合運營，暫時只能夠每日早晚一次入油補給。但係成架巴士走足一日，加少少塞車就經已唔夠油行，遲早都會出現行到無晒油然後跪低阻塞交通，司機嘅做法雖然違規但情有可原。巴士唔夠油其實證明咗一樣嘢，就係巴士公司喺運營上根本就未有安排好，點解以往從未發生過咁嘅事，會發生喺新巴上？除咗係唔夠經驗之外，更重要嘅好可能係新巴買錯咗一隻唔啱小城行走嘅車。大家都知道呢隻綠巴大部分車型其實係用嚟做學童巴士，只係改裝咗部分設備以適應小城用作巴士之用，但係就算點改都係校巴，要用呢部車嚟走足小城全日接載乘客，辛苦咗部車之餘亦辛苦咗司機。事前發牌當局點解會無視新公司用校巴做巴士，順利咁發個牌俾佢呢？再者試運作咗咁耐，大家都唔發覺校巴條樓級咁高，唔方便上落咩？但係新巴剛剛至入咗咁多部校巴嚟做巴士，要佢換車根本就唔可能。造成今日既成事實嘅局面，發牌當局無得推卸責任。但係而家唯一嘅解決辦法，就只好責成新巴買多幾部車入定油作替換，如果唔係大家可能有排都仲要幫手推車都未定。