烚足十年（下）

點解研究西洋法律史要到小城作研究？終審法官係話小城仲用緊西洋人係石器時代所訂立的法律，根本連西洋人都唔用好耐，咁如果要研究西洋法律歷史，就梗係要到小城參觀吓呢套石器時代法律可以點運作啦，遲早可以被列入人類非物質世界文化遺產，到時旅遊局又多一個賣點可以推廣自由行去法庭參觀運作。其實幾個世紀以來，小城法院對於大部分庶民嚟講都係只可遠觀、千祈唔好入去，因為入到去大家可能連廁所都唔識搵。幾百年以嚟小城法律只係俾少數識西洋話嘅人睇，庶民要理解除咗搵翻譯之外，就係靠相關輔助人員口傳口咁得到個大概。但係換咗官府十年咁耐，要將西洋話改做白話嘅工作進展緩慢，當中又涉及小城自己立法之後，部分翻譯咗嘅法律又被廢除，因為新立之法律要有翻譯，要廢之法律都要翻譯俾大家睇點解要廢咗佢，結果即係白做不特止，仲阻礙其他仍然生效之法律翻譯進度。情況等於整水喉唔閂大水掣，點整都係漏水。點解小城法律界咁羞家？要追究當然係要問最高負責之政治任命官員「管家婆」。先前提到法律譯完之後廢咗佢嘅狀態，更加係由佢一手搞出嚟，點解？佢身兼小城行政同法務，法律運作之好與壞關乎行政當局資源的配合與否。制訂法律翻譯步驟的同時，有無考慮到條例會否被廢？而唔夠資源培育法律人才更加係責無旁貸。但係以打工仔角度睇「管家婆」，法務既然要行政資源配合，打工仔自然要睇吓邊個出糧俾你，法務部分自然要讓路俾出糧俾佢嘅行政當局。了解其中因由就可以理解小城法律體制點解可以烚烚吓烚足十年。

烚足十年（上）

一年一度小城之司法年度又開始，照例所有官府執法與司法部門都出齊見人，咁當然連知縣同一眾法律相關官員都要俾面出席，向世界表現小城都有司法制度，同埋小城都被法律所保障及限制。但係除咗殺人放火之外，人治先至係小城嘅社會根基。我哋今日喺新聞紙有得寫咁耐，其實看官都根本清楚呢個欄從來都無乜點讚過法律單位，無他者只不過自己人當家之後，小城法律運作一直都無乜表現令庶民讚賞，十年來法庭依然高據庶民頭痛指數的第一位。但係小城法庭亦曾經數次裁決令庶民覺得，除卻人治之後仍然有需要靠法庭幫手解決嘅問題。例如「公共行政總規章」違法事件及剛過去的垃圾會死票復活事件，都表現出法院於小城中立仲裁的地位，亦令在人治勢力過大的情況下庶民有原則性的保護。而今屆司法年度開幕禮上，連終審法官、律師會主席及檢察院長，都罕有地對小城法律體制烚烚吓烚足十年忍無可忍，事關作為資源分配的行政當局在分配不均的情況下，令到司法界嚴重資源不足。大家睇吓南灣舊法院停用之後，小城之法院被安排分拆到不同的商業單位內，幾個一審法院及法庭竟然喺大家返工搭同一部電梯的商廈內，情況同非洲部分法庭喺民居旁邊的木屋內開庭無乜分別，甚至連門口個「石Ｑ」都係同一間公司負責。相反公共行政大樓就好快建好同埋可以運作。但係呢啲都只不過係硬件上之差距，真正令小城法庭效率低下嘅問題，係法律改革步伐仲慢過要國家航天員登陸月球，難怪連終審法官都講將來要研究西洋法律史一定要到小城。

有無新天地？（下）

剛剛官府同六大字花檔傾掂數，未來將所有人都規限於只有廿一歲以上至入得賭場，包括在內工作之員工。過兩日，又爆出其中一間字花檔交還一幅官地新聞，綜合各方資訊，明顯字花檔於海嘯後水喉失靈，原來之計劃被迫放棄，最後只能交還官府另作用途。今次官府能順利將入場門限提高到廿一歲，一般估計都係因為金融海嘯之後字花檔收入大減，變成人手鬆動咗但係請落之人手又唔可以隨便炒咗佢，結果若果將人手年齡提高，就可以簡單咁減少操作人手，就算唔炒人，未來集團擴張都可以請少啲人，甚至調配人手就可以搞掂，結果可以話，反而係官府俾返個台階字花檔落台，救佢一命都未定。經歷數年由字花檔政策所帶動下高速增長之後的小城，人民生活與民生面貌發生巨大變化，令小城庶民、官府以至商家仝人，都終於驚覺到單靠一條「橋」係唔可以走一世嘅，所以呢幾日適逢垃圾會換屆前夕，又將臨知縣亦喺年尾換人，大家都覺得來年即將有新氣象。而現屆官府亦都趁機會與字花檔講數，希望大家能有共識。但係呢次不能否認官府揀咗十分好時間同埋理據，令到事件能夠順利進行，少有地能夠把握最佳時機去處理自己搞落嘅手尾，都叫做做番啲嘢，原本對於現屆官府最後一年都唔會有乜動作嘅情況下，算做為來屆鋪番少少路，等下屆知縣唔使啃咁大舊豬頭骨。雖然係咁，來屆無論知縣定係垃圾會，都要面對更加大的困難，就係後金融海嘯下小城另外的出路將會如何，就要睇執政者有幾大胸襟，去平衡既得利益者同廣大庶民之利益分配。

有無新天地？（上）

本屆會期終於開波，一個完全無驚喜嘅垃圾會其實大家都唔會有乜期待，事關就算所有人都換晒班，但係遊戲規則唔變，幾叻都無用。而家連京城都玩改革開放，根本連鄉公所都係一人一票選代表、同埋選領導。反而今時今日嘅小城，知縣只係靠三百人選出嚟，而呢三百人，又係由一大班社團互選之後得出嘅產物，而呢班社團卻又係靠官府每年批錢俾佢哋營運落去，只要每年交兩三個活動同埋印番三數本刊物，就可以足夠將會內重量級人物、於政治利益交換下送入官府內的委員會、諮詢會、甚至垃圾會，當然最後就有可能做埋知縣都得，呢樣就係小城內政嘅組成部分。呢家嘢全個小城都知，但係又確實真係唔少人鍾意爭逐呢種政治勢力。無他，有咗政治勢力，自然有實際利益，就算唔係直接利益，至少都可以喺政策上作出傾斜而有利自己，即係油水位。以往之政治版圖，從西洋人與京城傾掂數之後，就將部分小城資源分配俾華人代表，以圖平定內部政局不安。到今日經已到咗習以為常咁分配利益，實質政治需要已經改變為利益互換，因為當初之西洋人經已變為自己人當家，已經唔再係被人殖民，所以如果再搵唔到第二條橋去解決內部政治問題的話，根本就唔可能達到京城指示「和諧社會」之目標。事實上要有效宣洩民間不滿，按照今天之遊戲規則就只有垃圾會可以作出適度之功效，但係單憑少數代表發聲就以為可以簡單解決問題就似乎太天真，若果未來官府仍然諗住就咁靠幾個勢力不均之代議士發吓聲，就可以平息內部紛爭，跟住政策依舊的話，唔好講「河蟹」，連「河蝦」都無機會。

反對鐵馬咪錶背後（下）

今次鐵馬咪錶方案最大之反對者梗係一眾鐵馬車主，亦有售車業界代表及交通關注組成員質疑其設置效能。兩位上公仔箱與主持討論今次咪錶事件時就搬出一套理據去質疑官府今次試行之成效：首先泊位不足的狀態下加設分隔欄設置咪錶，反而減少泊位數目。另外鋼架分隔欄會阻礙鐵馬落腳架停泊，亦無後眼睇背後而來之車輛。而咪錶位如果設置鎖位，當發生火警、跳樓事件時，車輛不能搬移引發危險。還有今次咪錶設置五小時及兩小時的咪錶時間不足，唔能夠有足夠時間過關。最後更提議十年驗車期太長，應縮短十年驗車期去淘汰舊車減少小城鐵馬之數量。
　本來車輛泊位喺全世界都係由購買者先去評估自己如何安置車輛後，才決定購買與否。並唔會因為自己買咗部車之後無位泊，走去鬧政府唔俾個車位佢泊，講出嚟都被人笑。至於有無後眼睇從後而來之車輛，就算有無鋼架阻礙鐵馬都係咁泊咗咁耐，點解加上鐵架至有人投訴？而鐵馬鎖在鋼架上如遇火警或跳樓事件，無得拖走鐵馬而造成之危險就更加好笑。跳樓消防要開救生網，消防自然有大力剪開鎖拖車，就算係四輪車輛亦有方法搵拖車拖走，如遇火警就梗係車主自己走嚟開鎖駛走車輛，車主本身都唔出現大家就唯有救火啦！至於咪錶時限問題上集都已經講過唔再講。最後利用縮短驗車年期去減少鐵馬舊車之理由更搞笑，依家小城唔少人都係一部鐵馬一部四輪車，就算縮短鐵馬之驗車年期，亦會再買一部新車取而代之，反而呢個反對理據最受質疑至真。大家都只不過係想官府解決佢自己面對緊嘅問題而唔係解決全體嘅問題，邊會有進步丫。

反對鐵馬咪錶背後（上）

執筆日鐵馬咪錶尚未實行，而坊間經已鬧哄哄，支持及反對意見各有立場，唯獨反對一方之人數似乎具壓倒性。官方今次試行咪錶制，亦不失為絕橋一道。從用者自付之理念角度出發，但凡道路使用者都應該付費去安置其個人車輛。呢樣嘢只要向所有駕駛者詢問，就不難發現連死硬派反對者，都只能支吾以對不敢宣之於口話「以前不嬲都唔使錢，點解依家要俾錢？」。事關今日只要唔係行動不便者，小城所有人都有過坐鐵馬的經驗，甚至細如手抱嬰兒亦要被母親抱在手中乘坐父親駕駛之鐵馬一同出行的鏡頭日日見到。基本上早前通過咗但係又被大力反彈的「道路安全法」經已形同虛設，都唔記得幾耐無見過人執法。今次官府試驗之鐵馬咪錶設於關閘附近，公仔箱於上址附近進行街頭訪問時，十個有九個駕駛者都話我如果過關咁點返嚟入錶？咁就印證咗一樣嘢，大部分鐵馬駕駛者根本就無意識「付費去安置其個人車輛」，即係唔會理附近有一個大型停車場提供大量鐵馬泊位呢個現實。四輪車主自然有咁嘅經驗：只要泊入關閘停車場，就會發現所有車輛都會泊在最近出口的走佬位置，包括二輪及四輪，而兩層闊落的泊車空間又只會有底層之停泊位有近八成之入座率，當中混集四輪及少量二輪車，而大部分二輪車則全停在底層的行人道位置阻礙出口，四輪車即又停泊於原本設置給二輪車用之泊位上，結果該停車場的所謂停泊規則根本無人會理。當然啦，連地面官府之管理都咁差，私人公司之收費處又點敢跟足規矩罰人錢丫，只要大家交足泊車費就算，即係只要你夠惡就無人敢話你。

選舉抹黑埋單

全城興奮過度之後，終於都到左賽後報告時間，選贏選輸乃屆屆都有，唔會有乜野特別。況且今屆結果最冇癮之處，係竟然各固有勢力真係唔係玩玩下，只要一出手應有之鐵票自自然過落去新上台之代表，足夠送人入局有餘，至於後選人當初政綱如何究竟有冇人睇過，都已經唔係問題，等於某候選人曾於論壇中，清楚表明小城係選人唔係選政綱。不過呢樣已經唔係新聞，全體庶民都清楚。最抵死既係未開跑就俾人估中晒十一席既賽果，即係大部分人都估倒，新勢力根本唔駛諗同呢班友爭。不過最後埋單計數，今次其中一個固有勢力出現損失一席，似乎新自由派好似有所增長，但係只要細閱背後數字上的變化，可以睇得出小城整體各勢力版圖出現左微妙變化。另外今次「大蘇」最矚目的仍然係新登場之強力抹黑行動，記得最精彩的是竟然有人用最原始同埋耗費人力之白抄抹黑事件，而對象又竟然係冇人相信之關大姐，除左係全城笑料之外，更有陰謀論者話白抄事件係內鬼造勢之手段之一。不過呢樣唔洗理，因為咁唔相信庶民之雪亮眼睛之舉措根本唔會起倒作用。當然，另外網絡討論區上大批打手出動洗版策略去抹黑自己認為之對手，更加冇可能動搖倒實力派團體，而打手們除左玩抹黑之外，自然同時要負責埋唱好自己友之工作。只要係咁，有經驗之網民自然一眼識穿邊個係打手、邊個係有見地之網友。但係最離奇及最不幸者，乃小城之文字傳媒亦都參與其中，充作部分參選隊伍之打手一職，不分晝夜地去抹黑其立場不同之參選者，最後搞倒要收選委會轉交之投訴信，唔好講央央大報，直情有辱傳媒之中立性，根本就唔配講新聞自由呢個口號。

「大蘇」擾民

小城做完「大蘇」，輪到京城做「大蘇」，唔知乜嘢概念國人會覺得「甲子」係好重要嘅一回事。如果係對人，大家自然會明白一般人之壽命週歲，去到一個「甲子」就等於進入人生下半場，而以過去「甲子」之標準，已經係由人生最高峰開始退下火線之代表，所以大家都會大肆慶祝開始準備唔使做。但係今次嘅對象係國家，一個有能力、為國為民之政權根本都唔應該點慶祝，因為所有資源都係來自庶民所出，有責任之官府應該將資源投放於有需要的階層，而唔係為咗大部分人開心而浪費公帑。今次京城封城閱兵、戒備慶祝，除咗京城庶民要受生活的不便之外，一般遊客更加係一肚火。因為大家都估唔到京城會喺國家生日上面，會出動「戒備」呢一招，去確保電視畫面上有個體面嘅閱兵儀式。結果大部分一般上京之遊客除咗喺京城搵唔到酒店住之外，仲要連食都冇啖好食，因為閱兵廣場周邊所有店舖關門。好彩京城商戶人品好，甘願配合當局的安檢安排，肯關門唔做生意以保過程順利。若果事件發生於鄰埠，結果就會完全唔同。至於喺小城，祖國生日除咗多咗兩日假之外，亦都多咗好多因為放假而逃到小城度假之黃金自由行。到咗我哋呢啲同市場反應冇直接關係之人士，自然覺得今次咁大肆鋪張去慶祝，除咗勞民傷財之外，都唔會有乜嘢正面嘅評語，要睇閱兵打開公仔箱就可以。至於什麼花火匯演，對於我哋每年有十次八次煙花睇嘅地方，更加唔係乜嘢新鮮事物，所以吾等心中暗忖，玩還玩，千祈唔好搞到勞民傷財變成擾民就好。

「屈」夾「賴」精品（下）

今次呢鋪搞到咁大，除咗對搏奕雙方同埋參與之庶民唔公平之外，最被不公平對待者其實係當晚全體之點票工作人員。因為今次連投注額嘅數字都唔能夠即日公佈，最後連賽果都要兩日之後先可以公佈，簡直係前無古人。本來今次選用高科技投注，大部份投注站都唔使點排隊，吸個印就搞掂簡單快捷，好快就能夠完成投注，公平啲講句今屆安排得幾好，而且在場工作人員各方面配合亦都非常貼合投注者，老老嫩嫩照顧周到，令到在場人士都十分舒適。但係當大家舒舒服服咁投完注後，大家都估唔到要等兩日至可以知道個派彩。因為到咗差唔多投注完畢兩個鐘頭，所有工作人員都身水身汗咁交報告後，「鬍鬚官」發覺唔啱數埋唔到尾，所以連總投注額都唔肯交代，只係講電腦統計數字而唔係總投注額。當晚各大媒體自然追住唔放問點解咁耐都冇最終投注額？「鬍鬚官」就同大家講今次投票用咗電腦，而在場嘅工作人員唔記得按「Enter」掣，所以條數唔夾，要再等所有錢返晒嚟至知有幾多投注額。大家就想問點解所有人投注都要入卡，仲要個工作人員按掣至算數咁落後？試想下如果大家係當值之工作人員，聽完「鬍鬚官」咁講法仲有乜心機做落去呢？大家由朝做到深夜啦！到深夜公佈總投注額之後，又輪到投注作廢個案太多，結果又唔能夠對外公佈法定數字，最後竟然要玩無限復活去掩飾制度上之過失。「鬍鬚官」又話各投注站嘅投注標準唔統一，所以要全部投注番晒嚟總部至可以向外公佈派彩。一班喺投注站瞓身搞成晚嘅同事被人屈完再屈，你認為會發生乜嘢事？唔通大家都唔識廣東話？定係大家都唔聽你講自把自為？咁無承擔學乜人做官！

「屈」夾「賴」精品（上）

一入餐室，即刻聽聞茶客大聲議論：「四年至一次全城賭鋪勁嘅，但係個莊到揭盅時發現唔對路，竟然發難渣話唔算，同細路哥輸咗猜大王之後改口話其實係三盤兩勝制一樣，就算個結果冇變，都只不過係個細路連續輸晒兩鋪，所以至係咁，若果結果改變俾個細路贏番兩鋪，你估下次仲有冇人肯入嚟玩呢？真係離晒譜XYZ@%#……（下刪數百包含不雅用語及三級字句）」。事實上今次嘅莊荷「鬍鬚官」本來係處理整鋪大細嘅時候都十分稱職壓到個場，點知到最後竟然爆出單唔啱數事件。唔啱數都算啦咪衰衰地認自己做得唔好囉，點知又因為唔肯認衰，驚被人質疑佢嘅公正性，竟然喺佢認為合理嘅條件下面改變有份定落嘅遊戲規則，執住一句「清晰顯示其意願」，大玩無限復活功能，搞到全世界媽媽聲影響市容。本來買大細莊閒係各有所好，派牌開盅者只不過係打份工，冇理由要介入呢淌混水，今次咁搞法同賭場唔俾人識記牌一樣只有佢玩晒，所以話佢其實唔係乜嘢法官，直頭係判官冇人可以提出異議。今次有人遞信表示會法律追究，茶客亦覺得無可厚非，事關就算冇改變個結果，可以咁隨便地改變個遊戲規則，直頭係唔尊重博弈雙方同埋有份參與嘅全體庶民。其實每屆之投注方式都有少少唔同，而亦都出現唔大唔細嘅問題，亦都係咁過咗咁多屆，「鬍鬚官」亦都做咗咁多屆，大家都應該好有經驗，點解今次出現咁多投注無效嘅情況，其實係應該喺賽後報告度向大家講解，而唔係為咗個賽制唔妥就要即刻改變個遊戲規則，去做俾人睇個賽制冇問題，結果證實最差嘅係成個委員會。

自由波地（下）

本來塔石球場，係公眾地方，任何人只要有興趣都可以入內踢波，所以稱之為自由波地。但係自從被人發現可以吸引到好多人嚟玩，就出現有組織地去保護自我利益嘅霸場行動，除咗以人多「蝦」人少，大「蝦」細之外，更曾經出現過不法分子利用場地進行非法行為。由此證明只要有利益，就會出現有組織地去霸佔，再進行分配公眾利益嘅行為。球場係咁，垃圾會都係咁。為咗既得利益，唔少人都用盡方法希望晉身垃圾會，諗住由自己制訂出對自己最保障之遊戲規則，確保原來之利益唔會受損之外，甚至擴大自身利益範圍。而各利益集團亦會因為共同利益而進行圍堵反對者之政策，情況等同有「場霸」唔俾其他人入球場輪隊一樣，至於有否利益輸送，其實庶民眼睛雪亮心裡有數，唔使講到出口都知，因為小城從來都冇秘密，同以前嘅塔石球場一樣四面通風，球場內發生乜嘢事大把路人甲乙丙睇到。原本球場係應該有管理員負責球場嘅秩序，但係當時之球場從來唔會見到有人出嚟管理，而球場的管理權經已落入一班有資格落場踢波的堅實既得利益者手中，就算管理員現身都無甚作為。雖然執筆日新一屆垃圾會仲未進行投票，但係單睇參選隊伍之勢力分佈圖，就知道未來幾年有幾多位代議士係真正幫到庶民，實力懸殊之下未來四年都唔會對垃圾會有所期望。但係如果就咁就認命，個城市就唔會有進步，敬告各位有心為庶民做事之落選隊伍，就算今屆唔得亦可以等下一屆。等於今天再唔會見到有「場霸」嘅出現一樣，未來嘅庶民會更文明更重視大眾權利，將來仍然有希望。

自由波地（下）

本來塔石球場，係公眾地方，任何人只要有興趣都可以入內踢波，所以稱之為自由波地。但係自從被人發現可以吸引到好多人嚟玩，就出現有組織地去保護自我利益嘅霸場行動，除咗以人多「蝦」人少，大「蝦」細之外，更曾經出現過不法分子利用場地進行非法行為。由此證明只要有利益，就會出現有組織地去霸佔，再進行分配公眾利益嘅行為。球場係咁，垃圾會都係咁。為咗既得利益，唔少人都用盡方法希望晉身垃圾會，諗住由自己制訂出對自己最保障之遊戲規則，確保原來之利益唔會受損之外，甚至擴大自身利益範圍。而各利益集團亦會因為共同利益而進行圍堵反對者之政策，情況等同有「場霸」唔俾其他人入球場輪隊一樣，至於有否利益輸送，其實庶民眼睛雪亮心裡有數，唔使講到出口都知，因為小城從來都冇秘密，同以前嘅塔石球場一樣四面通風，球場內發生乜嘢事大把路人甲乙丙睇到。原本球場係應該有管理員負責球場嘅秩序，但係當時之球場從來唔會見到有人出嚟管理，而球場的管理權經已落入一班有資格落場踢波的堅實既得利益者手中，就算管理員現身都無甚作為。雖然執筆日新一屆垃圾會仲未進行投票，但係單睇參選隊伍之勢力分佈圖，就知道未來幾年有幾多位代議士係真正幫到庶民，實力懸殊之下未來四年都唔會對垃圾會有所期望。但係如果就咁就認命，個城市就唔會有進步，敬告各位有心為庶民做事之落選隊伍，就算今屆唔得亦可以等下一屆。等於今天再唔會見到有「場霸」嘅出現一樣，未來嘅庶民會更文明更重視大眾權利，將來仍然有希望。

自由波地（上）

上個禮拜去咗塔石廣場，踢咗半場自由波地，唔曬但係撞正打風前夕所以搞到身水身汗，由於冇諗過可以喺塔石踢波，終於有機會踢到半場都叫做過足癮。猶記得當年死口靚仔時期，除非閣下隸屬下半松山之數間名校，否則其他學生仔唔好話落場輪隊，差啲連旁觀球賽都有機會被人打。點解咁誇？事關當年學生功課壓力冇今日咁大，放學後都喜好聯群結黨，遊玩一番至肯返屋企做功課，再加上部份和尚學校係全男班，淨係一級人落嚟輪隊，輪到你都已經要到天黑至有得掂個波，所以基本上外來校生根本唔可能有機會落到場。而和尚校生踢波通常又會吸引師姑校友到場觀賽，以達致兩性溝通之聯誼關係。既然係咁，即係話球場旁邊都有唔少女觀眾做啦啦隊，所以觀眾席上根本想搵個位坐都難，要等一班冇腳法嘅死口靚仔入到一球輪到下一隊都要有排等。所以有得坐低輪隊之隊伍大部分有另一餘慶節目，就係睇波之餘同師姑女校聯誼之追女仔遊戲。既然有咁多節目喺球場上面發生，當然吸引到唔少其他學校之學生希望參與其中，至於裡面大家希望參與邊部份就人人唔同，有人可能想踢波、有人可能只係想睇波，又或者有人只不過係想搞聯誼都得。
　既然個球場之戲碼咁豐富，但係地方又有限，自然會有好多矛盾造成分黨分派。結果搞到外來學生要入場睇波或者踢波，都要過五關斬六將至有機會入到場，所以當年有段時期每個禮拜六下午，都有唔同學校不同派別之學生，於松山集結講數較量，成為游離學生無聊觀戰的節目之一，大家認為似唔似今日嘅垃圾會？

「發水會議」贈「慶」（下）

「發水會議」係由「掌櫃部」引發出嚟，而「掌櫃部」係官府嘅「管數」機關，即係話裏面嘅人已經係非一般數佬，數口之精直頭係獨步武林。但係今次「掌櫃部」遇著另一個數口精明之「查數部」，乜嘢牛鬼蛇神都被人扯晒出嚟。今次大家高手過招，大家係好難明白點解「掌櫃部」咁精於造數，都竟然會造得啲數咁誇張，連口靚仔都知道佢喺度造緊數。況且今次同屬官府機關之「查數部」，大家都係數字人兼同袍，本來都互相俾面唔會想搞大佢，但係該委員會之主席竟然提供錯漏百出之理由，以圖將「發水會議」之數量合理化，更話委員會之運作成本相對所收稅項只係零點幾個百分點，直情係低成本高效率咁話，迫得「查數部」罕有地使用「遺憾」咁去形容對方之回應。若果以茶餐廳庶民去評論，早就送咗佢兩親上天堂，而我哋就有一句「厚顏無恥」送俾該主席當係中秋大禮，事關按「查數部」之調查報告內容，委員會利用拆細會議紀錄嚟「發大」會議次數根本就證據確鑿，可以用「斷正」嚟形容，仲有乜嘢可以俾佢「死撐」呢？事件發展至今據報「老廉」都話會插手事件，而司長亦表示極度關注，提起咗內部紀律調查，相信事件有機會越搞越大，話唔定又走多個「走資局長」出嚟都未定。呢單嘢可謂「掌櫃部」今年雙慶而向庶民贈「慶」之代表作。

「發水會議」贈「慶」（上）

正當每日街上之廣播車日嘈夜嘈之際，官府竟然爆出「一日開會八次」之天文「筋數」，以圖收取更多開會費之事件，而相關官員已接受內部紀律調查。全城嘩然！今次「查數部」揭發之四輪估價會之筋數事件，證實有公職人員同時擔任多個不同會議之成員，一年間開會之總數就達九百六十七次，即係差唔多每日開兩個幾會，仲要係年中無休，而單係一年之開會收入就有五十幾萬，人工之高更加超過法定上限達七成，即係話開會費仲好搵過份人工。事關官府規定若出席類似委員會之會議，公職人員每次可獲得十點薪俸之報酬，一點五十九乘十就有五百九，一日開兩次都已經千幾銀，不過係工作時間以外至有錢收，而且更出現全體正選同候補委員一齊開會之笑料，點解有正選委員開會都仲要叫埋個後補嘅出嚟？莫非係請食飯大家交流下，等個正選知道自己唔得閒時係邊個頂自己個位？查數部亦表明「掌櫃部」屬下呢個委員會處理之開會報告，已經去到隨心所欲嘅地步，事關最離譜嘅係有一次會竟然只係傾將一個file close唔close咁大把。由於相關委員會包含公職人員同埋業界代表，有相關業界人士指未聽過日日都要開會咁誇張，最多都係每個禮拜開一次。咁講即係話會議紀錄有可能被人無限「發水」，先至會有一年開會開九百幾次咁駭人聽聞嘅事出現。當中亦發現部分會議中，係審批車輛稅項時，有利益衝突之相關業界代表並無執行迴避機制，即係自己有份評自己代理之車稅，咁咪好著數！？最終只可以用一個字嚟總括呢單「發水會議」事件，就係「亂」。

防疫

「甲豬感」終於出現首例死亡個案，所有官方發表都稱患者病情變化快，最後死因並非「甲豬感」而係併發症，當中並無人為疏忽。但係自從年中「甲豬感」全球爆發以嚟，外地及鄰近周邊地區的死亡個案統計，都集中於老人家、兒童、長期病患者的階層，與今次小城的首例死亡個案明顯背道而馳。事關今次患者乃中年女士，並非長期病患者，亦未有吸煙等不良習慣。所以官方在公佈患者詳細發病至死亡過程後，刻意表示當中並無發現有人為疏忽之情況。但係隨著「甲豬感」在小城擴散，好多人自己或身邊都有受感染者。
　例子一：某人早上發燒身體不適往私家醫院診治，經快速測試證實陰性反應，簡單配藥後自行回家。及後至翌日早上臨上班前數分鐘，突然接到公立醫院來電證實測驗報告呈陽性中咗招，急忙連同親密接觸者一同前往公立醫院接受治療。最後患者自然係配藥後回巢自行家居隔離，問題係同行之親密接觸者被派去一個集中房內等候檢驗期間，院方並無特別措施協助房內人士避免交差感染，事關房內各人唔知邊個中招與否，若果係房內有人中咗招，結果可能入咗家中患者數，就算親密接觸者並無出現病徵叫兩人自行回家，都有機會途中感染其他人。例子二：一人發燒前往私家醫院接受治療，快速測試呈陽性唯院方缺藥，公立醫院遂派車前往接候診者，到來的竟然是全套保護人員之防疫車，到達醫院候診室等足八小時後始獲配發特敏福，由於等候時間太長，患者曾一度離開候診室到櫃檯詢問，結果被指受感染者不能離開候診室，被推回房內後把門鎖上，最後房內病患於房內致電院方投訴後始獲治療。
　未來數月的流感高峰期，小城醫療系統仍然係咁的話，實在令人擔心。

鬚根法官的態度

垃圾會競選出現之偷雞宣傳一如既往，到今日都未有當選人因違規宣傳而要接受刑罰，甚至連管理當局都可話為咗唔益犯規者變相協助宣傳，連受警告的組別名都唔會公開，亦可以繼續選落去。今次鬚根法官喺記招被人發難渣，即刻「包公」上身公開斥責投訴者叫佢收聲，由法官變咗做判官，明顯忘記自己唔係喺法庭而係喺記招會場內，同時亦都冇人要被佢審而係要佢交代。事實上一直以來鬚根法官喺鏡頭前面都係態度傲慢，面對媒體記者的詢問以一貫最高權力下達判詞之口吻，大家冇得質疑及反對，甚至唔可以有想像的空間。鬚根法官可能由於長期職業病之關係，有咁嘅態度本來唔應該怪佢。不過佢本人已經唔係初哥且久經戰陣，佢做呢個位都做足幾屆，有機會面對鏡頭都係因為呢個位，經過咁多年態度依然都係咁。雖然話佢呢個位係要俾人公正無私嘅形象，不過公正無私並唔等於擺官威就係，而佢咁多年戲路都冇進步過，一直都係學校訓導主任之面孔及語調同記者交代。需知道面對鏡頭，公職人員及公眾人士都要有應有之禮儀，就算傳媒嘅問題幾咁白痴，都應該耐心地去解釋而唔係一味擺官威，況且鬚根法官每次有所發表之時，語句用詞往往習慣加上「即係話即係話」咁去延續佢嘅解釋，表示佢一開始就當大家聽唔明佢講緊嘅嘢，呢種表達方式等同大家見工時，人事部經理向你條新仔講解入嚟做嘅規矩一模一樣。咁樣又邊會認同你所講嘅嘢呢？建議鬚根法官若要挽回其不良判官形象，不如就喺今次選戰中搵個犯規候選人，唔好再等佢哋選完晒之後再慢慢查，即刻釘佢牌等佢連選都冇得繼續選，以表佢自己真係公正無私。

偷步宣傳的後遺症

圖片來源：澳廣視
傳統勢力偷步宣傳，終於被人擺咗上枱，咁當然又係用官府習慣嗰句去回應「我哋係公平公正、依法宣傳」。而且仲有官府俾錢支持，如果唔合法佢哋又點會俾錢呢？咁即係話又要入官府數。當然選舉宣傳限制之法規係當局定出，只要唔干犯法規之任何一條，就唔係叫做犯法，而能夠俾佢哋偷步宣傳，就只能夠怪官府條例立得唔好，至會有位被人偷雞，又或者怪你哋啲小單位冇咁嘅財力研究法律漏洞，被人快咗一步諗到條好橋偷步成功。不過法律歸法律，遊戲規則就係以規範之大方向作為認知。傳統勢力呢次以咁樣嘅方式去偷步，連部分支持開嘅街坊都睇唔過眼，雖然單嘢係被對頭踢爆，但係份資訊根本每間大廈都起碼有幾份喺信箱，而且又唔包好就咁寄出，你想話俾人聽唔係偷步宣傳都冇人信啦。而且以傳統勢力一路以嚟做嘅嘢，亦都唔愁今屆唔夠票，何苦要做到被人話呢！況且呢幾年小城庶民對於選票之重視已經有長足進步，投俾邊個根本就係睇你有冇能力幫到庶民，而唔係睇你宣傳得有幾好，如果單靠宣傳就可以成功，咁一開始就搵間廣告公司同你哋搵個「口靚模」代言人搞包裝宣傳，就可以打抵嗰兩個「天線低低Ｂ」，其他人根本連選嘅機會都冇。其實只要做好本份用心去服務庶民，根本就唔使搞埋晒啲咁低莊嘅手法，庶民自然會睇你哋係唔係做到嘢。而傳統勢力今次搞單咁嘅嘢出嚟，喺選民心目中已經造成一個唔好嘅影響，就係被人覺得今次大換血係一個好大膽嘅決定，佢哋根本就冇信心能夠保持兩席，所以至會出到呢種招數，反而成為後遺症。

掘路工程冇監管

中區爛路經已持續一段日子，當局公佈月底將會完成整治工程。呢個宣佈根本唔使佢做，事關全城庶民都知道，官府每年到咗暑假，就會借意修掘路面，搞到全城馬路總有一段「與別不同」。當然，當局之做法都係刻意咁避開平日上班上學的混亂狀態，減少工程對庶民之影響實在係無可厚非。但係小城如今已經係活力之城，即係話就算唔使返學，暑假又特別多人外遊（包括所有高官同中高層管理人員），小城出行的人口減少咗，但係交通之壓力並無因此而減少。反而進入暑假旅遊黃金檔期，一車車的祖國遊客陸續殺到，加上鄰埠自由行大軍，中區交通比平日更為擠擁，而幾條主要幹道都被當局掘到只剩三分之一的交通能力，冇能力外遊之庶民就只好日日以步行出門代替交通公具，免得只係等車同塞車時間已足夠去到目的地。本來每年暑假都掘路大家都習以為常，不過唔知係唔係趁今年「傷損」同「雙慶」搞大佢，偏偏今年就玩擴大規模，集中喺幾大名門中學前的路段、搞重鋪電纜或者係擴闊路面之工程，而且工程規模唔細，挖掘深度足夠成架鐵馬填平，到今日仲未有車跌落此等陷阱已經係奇蹟。而且唔知係咪官府落咗命令要暑假完結前起貨，相關道路工程進行到中段嘅時候，竟然有幾日係冇人開工。係咪個工程仲有成半個月至到交貨期，就可以唔使咁趕？早啲起貨冇著數？事實上環顧其他大城市，主要幹道的修整工程都係二十四小時不停趕工，務求以最短的時間完成，減少對交通的壓力同市民之影響，偏偏小城從來都未見過有人通宵整路，係工程技術未夠班？抑或係銀碼唔夠？定係當局根本冇監管過工程之進度？

數零你識唔識？（下）

圖片來源：澳門新聞局
【內部員工通知】獎券管理局代表冬叔今日宣佈，當局經過九個月時間的嚴格查核、科學論政、備受爭議嘅32,000,000.00獎金得獎者係合情合法合理地去中獎，當中完全搵唔到邊條法例可以告得入我哋獎券管理局，而局方根據高人指點，利用「麥提爽」提供之合理化煙幕橋段，已經喺發佈消息時將個得獎日期改早咗差唔多成年咁滯，夠晒俾老廉可以大大聲聲同人講「成年都冇被人投訴過，你叫我做乜好呀！」。另外，我哋用咗現今世上最高嘅LCD同PLASMA科技無邊無際咁去支持中獎幸運兒，淨係呢樣都值得佢哋中千四萬獎啦。況且各位同事要對我哋老頂有信心，佢本人經過多年浸淫亦學得一身好武功，喺光明頂上運用佢哋絕招乾坤大羅移，已經將全城視線移去候選人同中獎者關係之中，對局方進行攪珠與否根本已經冇人關心，所以根本唔會有人知道部攪珠機係一開始就係壞嘅，咁多年以嚟從來都冇運作過，亦都唔會有人知道佢哋見到嘅都係六四級電腦科技一滴汗都冇流過。所以局方可以向各位同事保證，一定唔會有人好似寶島班官咁傻，被人插兩嘢就話要度頸，又學人哋日本仔九十度鞠躬致歉，因為冇位俾佢哋入。仲有，小城呢度邊個唔係我哋睇口架！？要做獎券管理局嘅受惠機構就同我收聲唔好亂講！就算唔做受惠機構我都可以唔發個牌俾你等你冇得做。咁多瓣夾埋一齊邊個夠我哋揍？所以喺呢個局裡面各同事一定要口徑一致，千祈唔好穿崩！咁樣就可以保證社會河蟹、有風都無浪！

數零你識唔識？（上）

圖片來源：澳廣視
32,000,000.00看官有冇數錯過呢？當中嘅零唔係人人都數得出正確嘅數字，事關你見唔慣咁嘅數，又或者你見都未見過，所以唔好怪人哋只好怪自己。
　三千二百萬唔係今期六合彩，但係就好多人講緊中咗呢份錢嘅幸運兒，無他者因為大家都認為幸運兒，唔使經過攪珠過程就收到派彩，茶客直頭研究緊呢位幸運兒究竟有冇落過注去買張彩票，因為如果唔係咁大家又點解會見唔到攪珠過程呢？派彩機構早前出嚟向公眾解釋話佢哋都唔想，事關佢哋做過調查，發現好多人都唔適合中呢張彩票，佢哋竟然發現大部分人都有情緒問題、妄想症、精神病、發錢寒，當局擔心冇經驗又冇番咁上下身家之人，一下子俾佢哋中成三千幾萬獎，佢哋會頂唔順自己真係中咗獎，搞到精神錯亂，當局為免呢三千二百萬害咗無辜嘅人，自然要搵一個有中獎經驗家底又有番咁上下嘅人去中啦，事關若果冇番咁上下家底數慣咁多零，點頂得順先？結果又被佢哋搵到唯一一個合適嘅人中獎既然係咁唔通仲要去執行攪珠過程再使多幾個零！但係你班友就話唔玩攪珠就唔公平，人哋為你好都唔知，你班窮鬼根本就虛不受補，數零都未識數，俾你啃到盞累咗你咁又何必呢！況且今次獎金派發地點並唔喺小城，而係喺京城，各位識唔識唱京腔？如果各位唔識京腔又點樣上京呢？上到京連問路都唔識又點去領獎呢？再者今次領獎其實係要用一批好高科技嘅電子儀器去核實得獎者嘅身份，如果你連高科技都搞唔掂，咁點樣可以去證實你有資格領呢份獎先？事關大拿拿三千幾萬，應該會有好多人想博懵去領獎，但係大家唔知道咁樣其實係會害咗佢哋（有辦大家睇得獎者領咗獎即刻失蹤到而家）。所以大家都係唔好再嘈啦，要明白當局嘅苦心！

砌生豬肉（下）

圖片來源：蘋果日報

近期熱炒當然就係官府又玩唔使開標，判咗三千二百萬合同俾某間公司搞十年展呢單嘢。過往官府同類事件根本係經常發生，仲要係大大聲聲講係依法批給根本就見慣不怪。但今次又係衰在受益公司負責人竟然係剛剛先至幫未來知縣搞完競選獨腳戲，唔被人插到飛起至奇。雖則受益公司一直做開官府大騷，論經驗同實力外界一般公司根本唔可能同佢競爭，但係官府一句因為佢嘅經驗夠又有實力就咁就批咗，唯一可以講嘅係官府批給部門實在太懶。事關據熟悉行內人士透露，該公司一向以主理官府大騷之實力出名，就算公開招標以其實力亦無懼競爭，有可能批給部門根本就諗住唔使煩直接批給就算，反正都唔會有第二間公司會投，但係今次同估領袖遊戲一樣，就係欠缺咗一場儀式同埋展覽嘅內容。但係單嘢最騎呢乃係由鄰埠之生果報所爆出嚟，當然話明係爆出嚟就梗係唔慌會寫好唱好，不過為求增加力度求其搵個二百萬嘅數去做對比就唔應該。事關所謂的二百萬同實使一千萬就真係差好遠，係六合彩頭獎同二獎嘅分別。再講鄰埠同小城係兩個地區大家點做根本就唔可以比，唔一定要做到你咁寒酸，況且鄰埠對小城近年比對方更豪一直耿耿於懷，只要有位入自然插你一刀。加上生果報出名之報道手法係起晒人物嘅底，可惜今次都漏咗其中一個背景，就係該公司主政人物曾經早年得過專業領域嘅荷蘭水蓋，不過呢種漏自然係有心遺漏，要砌你唔通仲幫你加分？所以砌生豬肉就係有齊物料炒作後，再刻意收起部分訊息先至係高一班嘅砌，小城代表之所謂「喉舌」根本未入流。

砌生豬肉（上）

圖片來源：澳門日報

面對雙慶及傷損年，坊間奇形怪招層出不窮。最近於垃圾會激烈討論的「白衣天使薪俸」一役，到表決的臨門一腳，罕有地被主席取消表決壓後再審。原因之一乃代議士中一位對官府運作極為熟悉的土生代議士，反對加人工法案中部分人士無端端比第一次官府提出的加人工方案更低。另外亦有代議士對於部分條文中的可追溯與否而引申出的合約公平原則產生重大分歧，主席自然要壓後待大家冷靜後再進行討論表決，主席更在結束前向在場旁聽的白衣天使幽了一默說：「如果通過唔到，你哋就冇人工加」。翌日某大媒體即刻以「土生代議士反對白衣天使加人工」為題，作為議會報道之頭條新聞。報道中並沒有提及土生代議士何以反對加人工法內的附件，其他都係引用另一位議員同主席之說話。土生代議士自然不甘被白白「砌生豬肉」，即時發聲明指「喉舌」斷章取義，言明自身反對加人工法的範圍及理據。事關當天小城「公仔箱」亦有報道該議事堂新聞片段，「公仔箱」以報道多位議員對於條文中的不可追溯出現之不公平而反對令到討論要壓後為重心，報道取向完全一百八十度唔一樣。「喉舌」呢舊「生豬肉」可謂size唔細，事關終於表決通過後「喉舌」又出招，以「天使會指土生代議士唔尊重前線」繼續追擊土生代議士，又出現整段引述他人言論的以偏概全作結。當然我哋唔清楚佢兩家有乜恩怨，但係砌咁大件生豬肉俾人就一啲都唔似係有社會責任之企業應有之道，更加打擊媒體的公信力。

因乜放棄強制隔離？（下）

估官府因乜解究決定放棄強制隔離可以有幾大原因，第一可能因為負責開之主要官員，走咗去選知縣而要現任知縣做埋佢嗰份，而現任知縣咁多嘢做又唔具備專業知識，淨係睇佢早排一日走幾場剪綵就知佢有幾忙啦，結果冇時間又覺得煩就乜都跟晒鄰埠就算。再者官府心諗，眼見鄰埠由最初嚴陣以待見一個捉一個，有事冇事都隔離咗先講，到最後都係失守長城，連死亡個案都出埋，以小城咁嘅醫療系統根本就冇得同鄰埠比，唯有放棄慳番啲資源好過。最後加埋流感活躍期過咗但係又進入暑假人流的高峰期，要繼續維持隔離措施可能要徵用晒小城所有酒店都未定，再加上到今日官府都冇表示，若果係全球最大之字花檔內發生人傳人感染個案，會否封鎖所有字花枱及酒店嚟確保疫情唔會蔓延，即係佢負擔唔起當日嘅損失，亦負擔唔起對小城龍頭產業之打擊也。官府今天已經冇心機抗疫另一個最大象徵，就係公仔箱之宣傳片。話說某日喺茶餐廳食食下飯，老闆睇完港聞自然要關心埋本地消息啦，點知轉完台又播番剛剛播完鄰埠官府呼籲預防流感大流行嘅宣傳片，正想投訴老闆按錯掣之時，駭然發現宣傳片尾竟打出衛生當局借用鄰埠官方宣傳片之字幕。話晒都係官府嘢莫非衛生當局窮到自己拍番條片都冇錢？抑或小城冇人識拍嘢？定係乜都唔使做照搬鄰埠做法就得？如果係咁使乜借人條片呢？索性將小城公仔台摺埋，向鄰埠買時間播小城新聞就仲加慳啦。豪使三千幾萬搞十年展就得，拍條宣傳片俾自己人就唔肯，呢個究竟係乜嘢官府？

因乜放棄強制隔離？（上）

自從「甲豬感」殺到埋身之後，小城之防衛機制終於棄守長城，改為主打發病後之診治及護理，惹唔惹到結果只靠庶民自己執生，最後導致庶民防衛意識低下。今日小城已經取消咗強制隔離措施，亦都唔會再照顧確認病患但未有發病之密切接觸者，要自己家居隔離搞掂自行求診。大家梗係唔明官府用乜嘢理據去決定唔再係實行強制隔離政策，係因為死亡率唔高定係鄰近地區都咁做，所以大家都咁做？抑或時間耐咗戰線拉長，最終覺得花費太大所以決定取消守城行動？話晒世衛都定咗佢係六星級頂晒錶喎！咁都值得官府去博一鋪放棄強制隔離？咁多理由話分唔到邊個係外地傳入同本地個案，係根本唔夠資源繼續做落去，定係主事人覺得煩加上鄰埠都係咁做，所以佢又多咗個藉口唔使做？當然取消強制隔離都係因為鄰近周邊地區同樣咁做，而且「甲豬感」死亡率唔高冇咁大殺傷力，所以可以唔使咁大陣仗。官府唯一係若有第一個死亡個案，先至再會有新措施出台。小城咁細要對抗外來病毒入侵其實十分容易，要追縱來源所需資源及時間相對於鄰近周邊城市，等於兩房單位與花園洋房的保安規模之差距，再加上庶民大部分都係「河蟹」族，絕對配合官府政策指導要佢哋做乜都得，所以更加唔會花費監察當局太多人力物力。就咁就放棄咗強制隔離的防衛機會，是否太過求其及有樣學樣？既然現今全球疫苗生產仍未到位，有類似有效之特效藥又唔夠貨，咁究竟放棄強制隔離是否又係明智之舉呢？官府咁樣處理防疫似乎係話咗俾大家聽唔使擔心，病你唔死係有得醫，結果同普通感冒一樣大家都會忽視防疫衛生之重要性。

麻生與吹水（下）

小城自古開始就係固有利益集團瓜分利益之地，從開埠歷史起計古來就是外力入侵、梟雄爭逐之地，為的就是爭奪小城話事權之後，可再次奪得控制之後的利益。而庶民幾百年都只不過係習慣屈服於權貴以保安享生活，咁樣就係小城多年以嚟「河蟹」社會的形成。事實上小城除咗四十多年前的一次激烈反抗之外，數十年來都未發生過乜嘢民暴事件，然而過去幾年官府為咗發展小城所製造的利益分配不均，引發嘅示威抗爭亦係幾十年來首次。
　小城同太陽旗國最相似的地方，就係知縣即將換代之際，迎來的候任人選竟然同上任一樣，都係傳統利益的第二代繼承人。現在的麻生與吹水同樣係政治世家的後代，在政治協商同人脈關係上較一般人優勝，只是政治世家並不代表其個人擁有一定的管治能力同政治理念。一路以嚟唔理係傾生意定係傾政策，小城都流行著檯底拆掂佢嘅風氣，亦冇乜人反對呢種做法，結果種下今天社會資源集中於部分階層作出分配的惡果。無可否認吹水幾代生活於小城，要發表意見同建議，其他一般人唔容易作出批判，但係作為傳統家族後裔又有過多人脈關係要照顧，很難想像吹水能作出獨特而又有前瞻性的領導，充其量亦只可以由各方推動去形成一個較為可以接受的環境，即係話大家對佢都應該唔會有太大期望。情況同麻生一樣，上台咁耐大家都預咗佢冇乜大作為，但係正因為呢種妥協政治，結果令佢所謂揀選的內閣不斷爆出醜聞，成為即將下台的主要原因。在相同之背景之下吹水同麻生同樣係冇能力改變社會的現狀，只能在有限的妥協中令庶民唔好咁多嘢講，所以兩位都係充其量只可以叫做合同公務員，連政治人物都講唔上，結果係小城未來五或十年都唔會有乜改善。

麻生與吹水（上）

合成圖片
在一片冇癮聲中「估領袖」遊戲咁就曲終人散，唔單止反高潮，直情係鴉雀無聲，全世界都唔會有領袖選舉會好似小城咁，根本冇人關心。唯一有相類同嘅地區就係太陽旗國。點解咁講？大家問太陽旗國內唔係為咗爭議席爭到頭崩額裂咩？冇錯，太陽旗國作為亞洲大國而且百年沿襲西方議會制度，基本十分民主自由，但係點樣選出首相就同一般國民完全無關，國民係選咗一個黨之後個黨搵個人出嚟做首相領導國家就得，呢樣嘢同花旗國嘅玩法又好唔同，事關花旗國係搵咗個候選人代表黨去選總統，然之後國民揀邊個黨咁解，所以太陽旗國首相同吹水一樣，都係屬於小圈子選舉的典範，個人代表性根本唔高，只差咗吹水連黨支持嘅背景都冇，呢樣與佢無關，係祖國嘅問題。雖然話大家都係小圈子選出嚟，但係佢哋亦代表咗部分人企出嚟話事。事關太陽旗國同小城一樣屬於金權政治，所謂政治人物都係由一班大財團及既得利益階層，各自支持政黨或人物出去參政，以達至維持固有利益及擴大影響力的慾望遊戲。既然喺咁樣，各政治人物自然喺勢力範圍內爭取最大資源去擴大實力，同時各政客之間又會因為利益分配要互相協調。既然各大政客都其實係代表一個財閥集團，點講都好，政客點都唔可以喺大庭廣眾傾利益分配嘅嘢，結果水面之下好多時除咗係利益分配同條件交易之外，連政策取捨都變成交易條件之一。久而久之太陽旗國的國家政策全都決定於赤漀的高級俱樂部，或都喺偏遠隱蔽山中的高級溫泉酒店內，而並非國會的議事堂，從而引出太陽旗國的「赤坂政治」這個名詞。

問題家庭與小城外展工作（下）

圖片來源：新生命團契
小城大部分人都唔太清楚乜嘢係外展工作，大家一聽到社工兩個字，一般都會聯想到社會福利，例如養老金、失業救濟金、老人院等福利救濟事業，與協助偏差家庭重回正軌的印象相距甚遠，而官府亦同樣將問題混淆。原本小城官府將社會工作事業升格為局，本意是將社會工作由官府主導領軍，改善小城的社會問題。可惜小城同樣有另一個奇怪的跨領域局級部門「教育暨青年局」，唔少人都發現青少年較成人容易出現偏差行為，事實上今天困擾小城最大的社會問題，無不與青少年有關，亦係全城庶民最心痛及最為關切。當大家仍然認為青少年出現問題，以教育手段去解決乃最佳方法的時候，無人發覺其實各位都唔係太清楚問題根源及處理的切入點。而更大鑊嘅係，由官府主導之社會工作局，將資源集中喺宣傳方面，未有真正從問題根源入手。青少年出現行為偏差問題，是由於周遭環境改變而未能適應，部分發展成心理問題，其徵狀亦出現在行為上，只要周邊人能細心觀察亦不難發現問題。只不過這種微妙的變化並非一般家庭成員能夠發現，這個時候有經驗之外展社工就成為偏差行為青少年的救助者。事關今時今日青少年面對的問題已非一般學業及家庭般簡單，經已早熟的Ｙ世代更要面對感情生活、兩性關係甚至兒子養育般的成人問題，要合適地切入問題要點，必須要有成熟而有耐心的智者從旁協助才能度過難關。只是專業的前線外展社工數目到今日仍未能滿足小城社會的需要，結果小城只能白白面對經驗社工的流失而問題越演越烈，最後造成大牢爆滿的局面。

問題家庭與小城外展工作（上）

圖片來源：澳門日報
城市隱患中，多次入獄者除了已被庶民列入慣犯及被放棄一類之外，要回到社會正常一族幾乎不甚可能。早前發生的女囚犯疑似牢中上吊事件中，除了被揭發多次入獄服刑之外，其兒子亦正在囚役中同時被媒體所報道。縱觀兩大傳媒報道，由於事主四十五歲相信兒子亦差不多廿歲，否則不用在獄中接受母親之死訊。另外家人中仍然有父母及丈夫等親人，從外人看來，很難想像家族齊全的情況下竟然可以出現母子同時入獄的狀況。雖說案件仍在調查中，不過大部分茶客都了解，這個就是典型小城的問題家庭。原本類似的問題家庭一直都存在於小城，只是從來小城都是以奇怪的密切關係，親眼目睹卻又唔會宣之於口，習慣將問題收收埋埋，但係到咗出事嘅時候，又即刻同身邊人講自己一早發現問題，更預言遲早出事等等。其實漁村般的小城一直發展落後，就算近年所謂的經濟起飛，庶民關係仍未有一步登天的改變，就算家庭中有人出現問題，依舊保持家醜不出外傳之類的心態，同時慣性的逆來順受使大部分出現偏差的家庭一直向牛角尖走，最終造成無法挽回的局面。本來小城庶民的精神面貌過去幾十年一直保持純樸，只是社會中存在字花事業，自然不離相關的社會代價，伴隨的周邊負面及地下生意揮之不去，間或出現問題賭徒及字花周邊利益而爭地盤的地下世界之武力爭鬥。可惜由過去到今天，官府一直未有正視及努力改善問題，只靠民間機構默默處理及嘗試解決問題，最後形成今日的問題賭徒及青少年吸毒去到泛濫的地步。

小城未來「水」世界（下）

圖片來源：澳廣視
小城未來成為水世界又何止水浸同吹水咁簡單？官府至少仲有唔少「抽水」同埋「水腫」特質，「抽水」事件咁大單，就算過咗咁耐大家依然記憶猶新，事關單嘢到而家官府都唔肯認錯，喺不了了之底下仲未解決，但係亦無人再追問，若果新知縣上任被追問事件，唔使講都會再出其殺手鐧，將問題吹到任期完結都仲得。另一笑料就係統計報告到而家都未有將其水分減低而變成「水腫」報告，早前官府順應民意做過條數，將旅客同小城常駐外地人口分開嚟計，結果旅客條數竟然少咗差唔多三成，驚嚇程度仲厲害過納斯達克種金事件，因為連官方數字都發水咁多，試問大家又可以用乜嘢標準去為小城制訂長遠之發展目標？所以數目唔清自然彈票有理，就算應承咗公共房屋將來有幾多間，大家都係等起好晒之後慢慢逐層清楚。雖然未來官府屬水，但係民間亦不遑多讓屬水泛濫。剛結束垃圾會報名期之後所公佈之參賽隊伍中，除咗傳統次次都見嘅面孔、同埋綠葉王的慣常陪跑者之外，竟然連「水記」關係都嚟玩埋一份。雖然過去亦有外省會眾成功進入議事堂發聲，但係水記今次撐支旗出嚟相信亦同自身利益受威脅有關。但係縱觀今次參賽隊伍比上屆少咗，除咗係代表小城內部各勢力平均咗之外，亦即係話經過各山頭協商埋堆後，少咗人亂咁撐支旗周圍拉票，但係由於選民比以前多咗，亦表示各勢力版塊爭奪選票將會更加激烈，而「放水」「吹水」等指定動作將會喺選戰期間發揮到極限，到時外地媒介都會隔岸觀火般，睇吓小城點樣變成「水」世界，而全城庶民見到出線隊伍之後分分鐘已經水浸眼眉。

小城未來「水」世界

圖片來源：維基百科
最近洪峰又殺到，一眾低漥地帶居民每日提心吊膽，唔知幾時天文台會話俾大家知「你今晚會被沒頂」，又或者送你幾餐免費海鮮。小城幾十年來只要一遇大水回潮，屋企滿目瘡痍都經已成為習慣，就算官府做過幾多改善工程，最後都總有理由同大家講呢個係死症，每年都會發生避免唔到。因為今年官府最新借口竟然係同地球暖化有關，想話俾人聽全球發生之問題以一介知縣根本改變唔到現狀，一貫官府作風根本信唔過。但係官府高官個個都住喺半山，就連部分低級官僚都係住喺郊外高樓，根本唔能夠體會低水地帶之居民苦況，所以只會用全球暖化水位上升來向大家表示無能為力。但係同樣位處低窪地帶鄰埠之上環，人家官府就動用強力的後備力量，建立巨型地底水庫貯蓄雨水，待大雨過後才用抽水機將暴雨時所貯之雨水抽出大海，避免同一時間海水及雨水倒流民居造成損失。不過小城有關當局卻表示本地未有條件仿效，原因之一乃沒有類似空間作大型地下水庫。無空間等於乜？等於無地囉！但係點解無地大家卻又十分清楚，所以官府同你講呢個係死症就係死症，然後最近未來知縣到舊區視察，同意上任後活化舊區刺激經濟，不過同場聽發表者大家心裡有數，大概未來知縣任內都唔能夠解決問題，事關若果任內簡單地將問題解決，咁即係話小城首任知縣根本無盡力解決過問題，加上未來知縣有個眾所周知的外號，咁佢咁吹大家就咁聽啦，千祈唔好當真，而且過往知縣的彈票履歷十分強，喺可見嘅未來小城即將成為「水」嘅世界。

傾斜政策下的專營企業（下）

以往小城一直依靠祖國政策傾斜之奶水供應下長大，市場競爭力根本不足，例子比比皆是。除咗最基本的水電、糧油等必需品之外，今天龍頭產業的賭業、官府主打之會展業，全部都離不開內地的優惠政策，相對於外國企業要進入以上行業根本唔係有冇競爭力嘅問題，而係大家是否自己友。基本上若不是近年小城部份產業作出市場開放而又有政策之傾斜，今天的小城係唔會有咁多外資公司進駐。即係話若果唔開放市場，小城庶民根本都唔知外國嘅公司點樣可以咁有辦法到處東征西討，可以將版圖擴大到世界各地，學習就係由咁樣係情況下開始。國人傳統都係喜歡用家長式教導子女，唔好俾機會佢地走錯路，結果搞到子女們幾十歲都唔識自立，做事畏首畏尾，最終一事無成結束一生。同樣道理若果小城事事要靠祖國政策傾斜才能成立，又點樣可以成為國際活力都市？又如何能對統一祖國事業、實踐一國兩制作出貢獻及回饋？當然祖國對小城之厚待，城中各人都應感激，只是正如鄰埠魔童所講：「我地唔可以事事都靠阿爺，有事冇事都搵阿爺求救」。「蓮花」就係一直都冇理過政策傾斜有朝一日會消失，就算唔用長貧難顧嚟形容，用咁大個仔自己搞掂啦！去講都應該唔過份掛？所以今次「蓮花」被「西洋航空」鎖死喺政策困局上，除咗要好肉酸咁干預法律決定外，都好難幫到祖國的最大股東，除非大股東肯梗咗呢批已經唔值錢嘅股票，然後就塘水滾塘魚自己玩晒，咁樣對各方其實都唔係一件好事，因為唔排除蓮花會好似小城某國有企業咁樣，最後蝕足幾十億而要國家補貼救亡，情況等同花旗的國際級銀行一樣。

傾斜政策下的專營企業（上）

小城航空業面對近年經濟及油價等經營危機，唯一本地航權持有者「蓮花」蝕到入肉，足足唔見咗註冊資本嘅一半。面對全球航空業困境，本來冇乜好講，但係該公司之另一股東「西洋航空」卻入稟法院阻止最大股東注資入其公司，恐股份會被攤薄損害自身利益。並於入稟狀中指摘「蓮花」根本不想為生存而改變經營策略，事關西洋人早就關注到國內對小城的傾斜政策改變，會直接影響「蓮花」的生存空間，而「蓮花」長久以來只享受著政策的供養，並沒有真正對外開拓過市場，而機場本身亦除了少量海外航班之外，單靠兩岸的航線就佔了百分之八十以上，簡直枉為國際機場。觀乎機場與「蓮花」開業至今十多年，除了機場於開業之初曾吸引過部分海外航空公司進駐後，不足兩年多就全部停辦，航線只有小城與國內航空公司會飛小城。而「蓮花」多年一直只開拓國內航線，近年才增加部分東亞航點，收入自然不像傾斜政策時的安穩。何解小城航空業會搞到今時今日的局面？原因十分簡單，包括機場與航空公司，當年都係「政策」下的產物，並不是因為市場需要而成立。即喺話有政策保護根本包冇蝕本，情況等同高等學府遷校橫琴一樣，出發點並非運營效益。到西洋人陸續離開小城，最後就連股東之「西洋航空」亦拒絕再飛小城，反而保留泰國航班，好明顯航空公司及官府對於小城航空的推廣根本未盡過力，以致長期使用量低，而且太著重單一市場，根本就唔係經營緊航空公司，而係徹頭徹尾的專利事業。可惜航空業並非供電供水的必需品，加上傾斜政策的消失，週邊可供選擇的航線及航班都比小城多而且價格更平，航空公司根本捱唔捱得過年尾都成問題。

遷校背後（下）

圖片來源：澳門日報
學府遷校擴校仍存懸念之際，校長於記招表現直頭不堪入目，竟然會用婆仔式抓爛塊面般向外界展示其合理性。若然以校長所言校內環境如此擠迫，搞到咁嘅款校長好應該引咎辭職，好向一眾教職員同學生們有所交代。事關據校長所講兩年前已向官府提出另覓新地再建校園，不過到今天才成事。但係原本學校營運理念與發展，應該早就有所規劃，而並唔係好似賭場賭檯咁，多人嚟玩就開到一街都係，少人玩就摺埋佢。況且，學校人多人少，都係可以控制嘅，入學學額有所限制下，就算再多學生想入學，都要從學額限制的競爭中，交出好成績來爭取一個學位。另外，學校本身若希望擴大收生，早就應該有一個完善規劃，例如十年後要收生一萬，五年後就應該著手興建可以容納一萬學生的設施，否則規劃就要改變，呢Ｄ咁簡單嘅規劃，就連一般夫婦都會為未來下一代作出買屋或換屋的決定，但係作為大學竟然冇計劃到咁嘅地步，校長係唔係應該辭職以謝天下呢？再者學校一直拋出以國際知名學府予大家作參考，什麼哈佛牛津如何如何，我地都係學人地咁做，所以要有咁大地方咁樣規劃。咁大家就想問下，如果學校面積或設備能夠有世界名校咁嘅規模，是否就可以成為世界名校呢？有六星級嘅校園規模同設備，係唔係就可以創造出世界一流之學府呢？答案當然唔係啦，否則周街都係哈佛同牛津劍橋啦，使乜咁辛苦去到老遠考試同埋俾咁貴學費呢？所以好明顯根本就係官府政策主導，要擴校遷校都並非學府本身需要，只不過官府用學府嚟過橋咁解。

遷校背後（上）

圖片來源：澳門日報
小城終於獲京官首肯，蓮花福地得以向外擴張，以租借形式額外獲得超過一平方公里的土地，用作興建小城一級學府的新校園。當天由知縣帶領官府領導、連同學府校長等人出席新聞發佈會，向外界發佈這個消息。獲此額外厚禮，相信小城無不歡迎，同時能夠加速與省城的融合，對小城未來發展將更大得益。只是，一直被外界質疑原校址的用途如何處置，記招過程中官府一直迴避，只表明原校址不會改變用途，仍然會用作教學之用。
　觀乎記招過程，校長從發言開始，一直強調學府地方太細，未能提供足夠宿位予海外學生寄宿，只能在附近租借私人住宅。另外課室不足令同學們沒有足夠學習空間，連同教學員工都因為沒有足夠地方，來訪者只能在教員室內站著與教員對話。貴為最高學府校長，講到間學校同難民營差唔多，佢本人究竟知唔知自己係度做緊乜？究竟係向外界加強今次擴校之合法性，定係同學校倒米，向全世界外地學子講「我地呢間學校只比難民營好少少，就係有冷氣」咁話？本來為官府政策護航係無可厚非，但係都唔使咁肉酸硬係要話到自己間學校，好似鄰埠籠屋咁大家都係用緊板間房。而且貴為高等學府校長，係唔係應該要有番一D學者風範，科學理據去向外界更加清晰地交代事件的因由，而唔係不斷抹黑自己校園空間來達致合理化之目的。事實上就算空間如何不足，大學各師生一路走來，都繼續努力教學與學習，空間的大小並不直接影響其教學水平，況且大學更不像隔離埠之正生書院情況咁惡劣，想學校水平更上一層樓，加強改善教學方式將會更為有效。

點樣保護兒童？（下）

圖片來源：新浪網

鄰埠世紀爭產官司案，一直吸引各大小傳媒瘋狂追擊，當中除咗因為涉及整個上市皇國之利益之外，更主要係因為無厘頭殺出一個除咗幫人睇風水之外，仲會幫人按摩之所謂風水師，直言與死者早就超越一般人際關係，仲手執另一與其家人所持不同內容之遺囑，呢位當事人出現之後經已引發多方忖測此人與死者之間的關係。近日當事人正式上庭作供，自爆其風水佈局同埋燒銀紙都屬於「兩公婆間遊戲」，又不斷抽死人之水，說死者拜神求見證兩人關係，繼而又推諉認自己並不懂基本風水同埋唔識睇羅庚，總之不停地在法庭上營造曾與死者有不尋常關係，以證明其手持遺囑之真確性，但亦同時向外界證實其本人之人格，總之每晚的新聞報導直頭好睇過連續劇。就我們所認知新聞報導必然是合家歡的時段播出，若按早國向外界宣稱強制安裝「綠霸」，乃對網上低俗訊息的打擊，保護兒童不被低俗訊息所污染，似乎呢段新聞更應該禁止報導，事關當事人的不擇手段過程全公開，而且更加毫無廉恥地向世人表明佢根本有心乘人之危。若繼續報導落去就算官司邊個贏輸，都可能會破壞青少年之道德價值觀，而每天報導當事人的回答，簡直令人有想死之衝動，唔係想自殺而係想佢死。當然呢單新聞本身亦有唔少警世作用，就係叫人帶眼識人啦，尤其一眾有心準備出外滾之男男女女，咪以為咁簡單就有飛來艷福，加上而家人人都利字當頭，對得你咁好自然會向你攞返咁上下嘢，總之大家好自為之，咁大個人唔使搵「綠霸」幫你過濾啦！

點樣保護兒童？（上）

祖國下月規定所有國內組裝或發售之個人電腦，需預先安裝國產「綠霸」過濾軟件，以圖保護未成年人士之電腦用戶，避免誤闖「色情網站」等有害內容。此舉乃新一波國內反「低俗」網絡運動的措施，官方強調旨在保護兒童免受不良訊息污染，而軟件生產商則稱成人可免受規範，即可選擇不安裝。但係自從五月中官方公佈通知以來，唔少國內外用戶、專家及發燒友都指出，該軟件存在唔少缺陷，最大鑊就梗係裝咗上部電腦之後，係唔可以拆走，或者應該叫做拆極都唔走，令到唔少用戶覺得十分唔方便。而其內部缺陷在於主打的過濾色情網站功能中，圖片認知率十分低而經常誤判國家主席及偉人之大頭照為色情圖片，直頭笑死國際IT界。當然任何過濾軟件都有一個最大的缺陷就係上網慢到出奇，而這個國產軟件亦唔例外，加上用電腦上得網多之人都清楚，要用詞彙去過濾不良訊息基本上唔可能，有心搵就點都搵倒。不過最好笑者，乃學生用的版本原來係容許用戶將軟件關閉，更令部分媒體質疑強制安裝軟件背後之意圖。事實上唔少報告都指出，該軟件存在唔少安全漏洞，足以讓網絡黑客盜取用戶的私隱訊息或安裝電腦病毒。不過咁都未算大鑊，最大鑊其實係被一間海外軟件公司指「綠霸」抄襲其用戶介面及超連結，就連更新時都要走訪該公司的網站，該公司已計劃提出訴訟。最後連花旗國之華裔商務部長亦向當局敦促撤消強制安裝之政策，同時不排除向世貿投訴，而事實上該政策被傳招標過程僅以八日完成，而價格卻高達四千萬元，內裏引發多方揣測。而且除卻視窗版本之外，暫未發現其他系統之版本出現。不過最後向大家交代一下，該公司之主網頁已進入系統提升的維護狀態達數日之久，大家可以唔上去搵料。

環球笑料的無冕選舉（下）

圖片來源：時新網
今次「吹水」咁驚見人（事實上除咗宣佈參選當日的記招之外，遞表當日竟然搵幾個G4圍住唔俾人埋身，連記者都一樣），除咗一直以嚟「吹水」都唔係好適應面對公眾傳媒之外，另外亦因為記招當天被混水摸魚人士偷襲成功，再加網上反對民意強烈，連同發生有人於鄰埠登報公開反對佢本人登位，面對眾多反對壓力更加嚇窒「吹水」唔識得點樣反應好，結果好明顯「吹水」根本未有足夠準備參加「估領袖」遊戲。首先咁冇準備其實應該係佢本人太天真太傻，冇諗過自己民望咁差，另外亦估唔到佢老友做完呢十年之後竟然會有咁多人開咗開竅、會努力發聲爭取權益，而佢本人之最大皇牌就只不過係制度同埋個三百位鄉親。佢亦明白反壓之大當自己未有足夠支持時，倒不如龜至當選日當天，讓既成事實大家無奈接受之後可以逃過當選前的猛烈追擊。但係避得一時唔避得一世，如果佢真係有心做好小城領導人，應早有準備面對群眾，同時應該有更清晰的管治理念讓大眾知道佢本人將如何承擔小城之管理責任。不過今天除佢一人冇人敢出嚟同佢爭，其實對佢都好大壓力，因為佢好清楚只有佢一人面對所有嘢，群眾認受性不足加上本身並非如奧巴馬般能言善辯，未來的日子根本就唔好過。同時今次連阿爺之態度亦都唔清唔楚，更加令佢覺得自己孤軍上路，始終級數所限，阿爺對於新一代之培育未完成之際，轉眼已經要搵人接手新一任期，可以預期未來幾年小城仲有排煩，雖然大家都預期佢即將「高票」當選，但係咁是否代表佢本人有民意基礎可以帶領群眾面對未來的挑戰，難怪今次的無冕選戰被笑兒戲成為環球笑料一宗。

環球笑料的無冕選舉（上）

圖片來源：中新網

只有「吹水」一枝獨大的現實，終於變成事實。任何人講乜做乜，都改變唔到小城同「高麗參」官府冇乜分別，只容許幾百人維持固有得益者階層繼續掌管小城之各項利益分配。原本對於未來抱有希望的人，結果都只能眼白白睇住呢幾百人操控小城的未來，話晒小城都係與別不同，咁樣至叫做「河蟹」社會。不過話時話，過去十年小城都經歷咗唔少變化，雖然話小城官府幾百年來都冇乜民意，但係作為小城一份子，見證近年小城庶民追求民主民生、為小城未來而發聲的行動每日趨增，數千過萬人的示威遊行，原來最後都唔及三百位特權階級咁有力而且比例咁懸殊。
　其實早於起跑前的「估領袖」遊戲中，「吹水」一早就被視為上盤大熱，即係估中都冇肉食。但係總有包頂頸之士搏大霧，以為會有一個半個可以出嚟夾份做下「騷」，相信佢本人都係咁諗，希望有多個人出嚟夾下計，好等自己可以贏得得體D，冇而家咁肉酸。不過可惜事與願違，竟然連做場戲嘅對手都搵唔倒，呢樣嘢足以顯示「吹水」人緣唔太好，而且政治觸覺同手腕都不足。事關若果佢本人早就希望執掌小城最高權力，應該早就判斷到今天的情況，而且準備好無間道的競爭者以完成大「騷」，令自己之獲選更有認受性。可惜正如早幾期本欄所指，「吹水」的智囊水平之低，真係仲差過鄰埠嘅經理人公司，而且仲好學唔學，學咗「淫照藝人」出席記招之態度，即係上咗台自己講完就走人，大家冇機會發問，咁佢不如發張新聞稿就算啦，駛鬼Call晒人地出嚟幫你影相又浪費時間同埋交通？

趁你病攞你命（下）

圖片來源：澳門日報
官府民望沉底的狀態持續好一段時間，大家都趁官府病就攞佢命，全世界都對小城上下其手，都唔使扮盜墓者羅拉只需混水摸魚。尋寶遊戲開始以嚟，最大冒險家除咗係花旗賭王之外，竟然第一個以身犯險嘅係走資司長，觀其貪大洗大之背景，佢嘅原動力好明顯係小城今天最值錢之地皮也，原因係乜大家都明白，但係正正因為地皮最值錢，竟然亦係小城官府監管最混亂、最冇規劃、最受人垢弊嘅政策之一。多年來議事堂內代議士不斷質疑官府究竟點樣管理土地，被海外大鱷炒家插旗之後，一向見識少嘅庶民，其實到今日都仲未清楚發生緊乜嘢事。但係作為管理者自然好清楚小城地皮會有幾大作用，同埋點樣可以利用法律之漏洞去取得個人最大的利益，司長之所以玩走資就係其中一個代表。但係點解咁容易就可以比人偷到雞，莫過於小城法例之滯後。時至今日小城仲沿用緊一百幾十年前之咸豐法例，其實就係方便各方牛鬼蛇神出術之最佳途徑，當中除咗造就海外大鱷之外，仲有負責把關之相關官員，另外就梗係業界最清楚有乜窿罅可以捐。咁大家就會奇怪何解時至今日，點解有關當局都未能修正大家都睇到嘅漏洞？因為當全世界都睇到嘅時候，佢地都唔肯改嘅原因其實只得一個，就係佢地至係最大嘅得益者。事關由政策制訂以至資源分配完全掌管喺呢班人手中，而且更操批與唔批之生殺大權，所以根本就唔駛寄望佢地會加快法律法規之修正或修改。而當全世界都睇倒小城法律之漏洞、又睇住各人都出盡方法去捐其法律罅嘅時候，只要有膽有力就梗係用盡辦法博矇，即係話不法分子將會陸續有嚟，大家真係要放長雙眼至得。

趁你病攞你命（上）

圖片來源：新聞局
官府無能加上弱勢管治，竟然被不法分子公然搶地，趁住官府忙於應付大小議員的各樣質詢、「傷選雙慶」等大日子忙個不停的時候，當住全城幾十萬人面前破擗石，偷偷在路環山嶺進行挖掘平整，企圖製造既定事實的假象，去達到霸佔原本屬於全城庶民的自然生態，同時亦把小城唯一僅有的自然島嶼破壞得體無完膚。自從報導出現之後，多名專業人士紛紛指摘監管機構管理不足。事實上近年小城各處大興土木，小城三島各處都可見到大大小小的工程在進行中，當中包括一向甚少被發展的路環島。只是相對上路環島人煙亦比較稀少，官府監察亦沒有其餘發展得火紅的兩島般嚴密。但是經常穿梭各島的重型開發機械卻正好成為犯罪分子的屏障，使一般庶民不易發覺其非法活動。其實近年小城的不動產業火速發展，加上官府的公共房屋政策，小城各處都發生過土地糾紛，非法的山體開發活動亦不只發生一次，而故有土地的不法爭奪亦同時存在，最明顯的就是由官府宣佈發展的時候，企圖以租住者的名義向官府索取賠償，另外亦有部分不法分子企圖以過去沙紙契的歷史問題混淆視聽，企圖以大家不大清楚的法律盲點，以為可以混水摸魚向全城庶民打荷包、掠奪公共資源。加上過往發生土地糾紛、或者係非法開山等事件中，被指違法人士一直以官迫民反，指責官府莫視沙紙契持有人的權益，而官府亦只用行政角度指出對方違犯法律，至今有誰被起訴或被定案一直都未有對外公佈，令人有錯覺官府的執法未有確切的法律理據，所以引來多個有組織的不法分子繼續挑戰官威。

燒車陷阱的出現（下）

衙差當局曾經表示燒車案將成為小城之風土病，即係話會陸續有嚟。當然有人大罵衙差捕快根本就係卸責縮骨，要加大力度去防止罪案發生先至係負責任嘅態度。又有受害街區建議官府增設天眼，增加衙差巡邏以保障庶民之生命安全。冇錯衙差係負責保護庶民生命安全，但係庶民都同官府合作唔理自己嘅生命安全，衙差又點樣保護得晒所有人之安全呢？按照官府規定所有機動車輛都要停泊在合法的車位上。雖然官府未能從規管鐵馬的方面入手去處理問題，但係規管上官府都其實喺法例上做咗唔少功夫，因為本身講明唔會限制鐵馬之增長之後，喺法例方面落咗唔少功夫，事關條例連點樣停車傾電話都話埋俾你聽，如果仲話唔明嘅人唔該檢討下自己嘅理解能力係咪有問題，定係理解不過唔鍾意守法咁解？本來今日周街都係綿羊，應該要怪官府冇作規管，但係規管不足嘅時候，庶民都冇守過規矩，亦都冇尊重過其他喺身邊嘅大眾，例如樓大廈走廊都放部車就唔止係阻住人地亦都阻住自己，根本就唔理好醜、擺得落就係。大家可能話小弟針對鐵馬，不過大家只要睇下天然條件，就可以發覺根本最大問題係出喺鐵馬唔受泊位規管。事關小城過去從來都冇鐵馬或綿羊需要搵位泊嘅概念，反而過去一直泊在大廈門口係因為保安防盜問題，而並非街邊冇位泊。到咗官府要規管泊位嘅時候，鐵馬綿羊之車主自然無所適從，事關佢地發現自己所挑選之交通公具並非如想像中般方便。結果，令到已經滿瀉的綿羊仔毋視官府的規定，泊滿所有大廈公眾地方同埋掘頭巷，形成現有的社會危機，其實官府要解決問題好簡單，只要加大力度執法，就可以減少大部份嘅問題，問題係官府有冇咁嘅膽量。

燒車陷阱的出現（上）

冷血狂徒罔顧人命，深夜在民居放火燒車，連累旁邊的酒店亦要逃生走火警。狂徒的冷血當然令人髮指，衙差的無能亦一直無乜改善，事發至今仍只能夠懸紅通緝，即係冇晒乎。但係最冇乎嘅係，根本問題係由官府搞出嚟。點解咁講？因為最重要係兇器「鐵馬」出現嘅原因，係要追究官府完全冇盡到應有的責任。
　眾所週知小城乜都細過人，街細屋細但係人就鬼死咁多，居住密度世界第一，呢個環境只要係小城長大嘅人都知道。自從小城開始生活步伐變得急速之後，原本人已經夠多再加上車都開始增多嘅時候，問題老早就出現咗，只不過係至今都仲未解決咁解。儘管早年官府拋出一份十分強硬的法例，列明庶民唔俾亂擺車，但係呢個根本已經挽救唔到本來泛濫咗嘅鐵馬。因為喺官府規範之前鐵馬已經多到冇地方放，就算後期追加唔少地底停車位，不過最後都唔夠安排泊位。本身小城幾年經歷，已經破壞晒從前西洋人交落嘅城市規劃，即係以教堂堂區作為的城市規劃，搞到小城半島根本就冇足夠空間安排地方擺車，而可以安排作地底車庫的公共空間亦有限，要解決問題唔係一朝一夕嘅事，但係官府到而家仲未搵倒一個有效嘅解決方法。點解只係針對鐵馬而唔係泛指所有市虎？
　因為市虎有一定體積，要喺小城亂咁放根本就唔可能，所以只要官府稍為規劃下就可以收到效用。相反鐵馬就十分容易捐窿捐罅收收埋埋，加上近年鐵馬改良設計搞到越出越細部，可以放到唔同位置例如大廈內的公共部分、後巷、稍闊之行人道上同埋事發地點的陋巷。

吹水柴九與烈女（下）

圖片來源：澳門日報

踩場異士完成被趕任務後立刻人間蒸發，被虛擬世界推舉之女烈士一夜之間消失於媒體之中，然而被封國語更勝廣府話之烈女，謎一樣的身份令人隱隱覺得事態並唔簡單。雖然話等咗十年柴九上身的吹水民意基礎並不足夠，但係因為今年正值「傷損年」，任何政治的黑暗伎倆都有機會出現庶民眼前。虛擬世界傳聞烈女被跟蹤所以要玩隱身，不過明眼人都知道，虛擬世界大都以訛傳訛容易被人惡搞製造白色恐佈。事關虛擬世界訊息與傳聞亂飛，任何傳聞都可以通過網絡傳遍世界，至於可信性有幾多都要靠看官自行判斷。對於有虛擬世界人士發起踩場行動又登鄰埠報章廣告反對商治小城，除咗係部分庶民意見外，當中亦不難發現惡意中傷的情況，要冷靜判斷並不困難。點講吹水係傳統三大家族之代表者，要有效理清固有利益集團同官場公職的身分好像成了「不可能的任務」，踩場舉措無疑打破小城一言堂的集體妥協風氣，亦代表未能於小城主要媒體發聲的部分人、以及近年因官府政策下受害之小城庶民出了一口烏氣。不過傳統庶民與新進民生之間的對立面越來越大，在互相爭奪話語權的情況下有人作出不實宣稱亦不足為奇。事關小城自主的幾大虛擬討論區不約而同地有反吹水言論，亦有穿鑿附會無中生有之徒，當然亦有愛護有加的同室友好，一時間令到一直只係圍內齋吹唔抹咀的討論區熱鬧起來。不過庶民眼睛一向雪亮，睇完自然心中有數。今日小城蜀中無大將，個人屬意何人都係十分頭痕，但係單從體制嚟講，庶民自然希望出現有級數之挑戰者，能與事先張揚一方作出合法角力，為全城庶民謀求未來幸福，先至係心底話。

吹水柴九與烈女（上）

圖片來源：中國新聞網

記招踩場一役盡顯吹水本人及其班底仍未夠班，所謂助選團比鄰埠經理人公司都不如。其保安漏洞百出之外，更重要係連派駐小城的傳媒代表都未能掌握清楚名單，只能單憑一張卡片就要放人入場，若以同一思維推斷，難怪早前移民警突然間亂咁禁人入境，因為大家都係求其有個名就做嘢，根本唔會求證名單是否屬實。不過亦難怪，小城一向柴娃娃乜都夠膽死，呢類型錯漏根本唔使大驚小怪。但係吹水今次柴九上身用「人生有幾多個十年」高調辭去公職，除咗如坊間所傳想迫阿爺表態之外，更加想早日清除各項不穩定因素，唔想大家再估估下。事關當年大佬出掌小城總舵主之初，一直都深得小城鄉親愛戴，庶民都估計佢掌舵後小城必有一番新氣象。果然事隔數年宣佈賣賭後，就將小城扯高到「國際活力之城」，不過亦同時把官府內部之牛鬼蛇神全部引晒出洞，任內不乏高官成階下囚或下台作終結。雖然政策冇錯但係發展太快規劃混亂配套不足，令到小城陷於族群對立與兩極化的困境。加上走資司長一案爆出驚人醜聞，官府內部山頭主義及隻手遮天的管理方式，自不然即時嚇窒阿爺。連同派駐小城的京官班底根本冇做嘢，諗住小城大佬完全冇問題淨係識得飲飲食食同埋剪綵，點知大佬只係識得壓住個場乜都發大嚟搞，但係就冇乜計劃，最後搞到阿爺失晒預算要重新評估小城形勢，再次對同一利益集團的兄弟幫、又一次執掌小城大權，有所猶豫亦不足為奇。而且阿爺今次仲要估計庶民意向，事關近年的遊行事件亦令到小城人心轉向，要仔細確認民意刻不容緩。

新一代心理不平衡因由（下）

今天的家長被養成一種不負責任的態度，因為近年官府推出各種不同的社會福利，單看教育當局每年推出不同方案，加強教育資源給小城學子，希望提升小城的教學質素，單看今天小城免費教育去到十五年，即係話今天的家長可以不費分毫就可完成小孩的基本教育，反而造就新一代家長們可以把責任推落官府身上。另一方面今天多彩生活的父母們，收入豐富加上生活的改善，輕易地把孩子養育等同「看仔」看待，收工之後依然樂不思蜀，家中少年就等同家務一樣可交由家傭代理，不出一年時間，幼小的兒子與父母的距離就會變成鴻溝，當父母要挽回的時候，往往要付出更大代價。誠然今天的小城生活變得較以前緊張、壓力加大，要維繫一份好工並不容易，問題係今天大家只顧維持自己顏面的一份好工，把所有精力投放在工作上，其他的都交給代理人。君不見每當放學時間，在校門等待的，已從過往的電單車父母族，改為坐欄杆的菲印外傭嗎？對於缺乏雙親的關顧，部分父母則選擇以物質或金錢作快速補償，只是大家都明白此等方式治標不治本，反而加速破壞子女的正確價值觀，自然更容易發生偏差行為。同樣地青少年在同儕中的認受性一樣反映在行為上，對於孩子的觀察父母們稍有差池、或是缺乏耐性，就很容易誤讀子女微妙的心理變化而造成誤會。先前發生母親揭發女兒與人偷嘗禁果，大興問罪之師，有輿論讚揚該母親能夠細心觀察其女兒的生活點滴，才能發現問題。可惜事實中，該名母親只懂指責女兒破壞家庭的顏面，才向警方報案控告男方。若果官府不再對現代父母進行再教育，恐怕小城青少年的心理問題會越來越嚴重。

新一代心理不平衡因由（上）

青年疑求愛不遂起殺機，安排手下誘騙受害者到事發地點，行兇者突然發難襲擊受害者而嚇得手下鳥獸散，幸得街坊及時報警，受害者撿回一命但恐有毀容之嫌，行兇者被警方以企圖謀殺罪名拘捕。以上事件所有涉案人士都未足二十歲，原本正值大好青春花樣年華的青少年，何解會涉及此等恐怖血腥的凶案之中？有婦女團體歸咎網絡虛疑世界中暴力色情泛濫，影響青少年心智發展。當然，簡單歸類以自己唔認識的媒體，把當中的主要負面部分無限放大，就可把責任推卸給他人而減少自己的罪惡，把不認識以訛傳訛的認知，簡單地指摘青年人模仿暴力行徑只是不負責任的行為，還要呼籲社會各方關注青少年，究竟邊個先至要人關注呢？要正確理解青少年偏差的價值觀，使用個人直覺等不科學的態度只會讓問題走向更難解決的一方。
　當代父母依然固守上一代自己父母所教導的一套：小朋友會有樣學樣、見人做自己又會學人做埋一份。冇錯小朋友會經常模仿別人所做，事關他們每天都在學習，而且會比一般成人學習得更快，但係今天的青少年與現今父母的孩童時代十分不一樣。由於科學技術的發達與小城現代化的急速發展，小城的社會結構與生活作息出現極大的變化，尤其是小城的家庭關係的疏離，全因輪班工作增加導致家人相處的時間減少，要發現子女出現偏差行為的確不容易，現今的家長喜歡把責任歸究於學校，把學生的不當行為推卸到學校及教師身上。不過學生回家後，面對的只有外傭作伴，語言不通的情況下當然只有上網或打機消磨時間，唔通要同印傭談心咩！

選知縣（下）

圖片來源：澳門日報
今次「技安」表態參加估領袖遊戲，一如坊間預期佢會出嚟選一樣毫無驚喜，連喺發佈會上講嘢，都貫徹佢一路既作風，就係面對鏡頭講嘢同讀書一樣，冇語調同埋抑揚頓挫，仲差過真人版電腦發聲。環顧佢嘅成長同人脈背景，雖然話佢同現任知縣一樣，同屬小城三大家族後裔，學歷背景甚至比現任知縣更高，話晒都係博士級人馬，而且同知縣亦都老友鬼鬼，同於前朝官場中一起與西洋人角力，為庶民出力。但係若果論政治風采同處事手法，則同現知縣仍有一段距離，可能都係性格關係，佢老哥表現向來唔會太極積主動出擊，樣樣都等咗三拍至肯比反應大家，結果安全就係夠晒安全，但係亦同時錯過咗唔少良機，不過卻正好與小城大部分庶民同步，庶民無須擔心佢會好似現知縣咁急攻進取，向庶民挑戰適應能力。另外同現知縣一樣，佢地都曾放洋留學歸來，段估兩文三語水平都應該唔係問題，事關你冇一定之語言能力，又點可以喺西人地方學習呢？但係講都唔信，佢老哥喺出席各項大小宴會時的發言，竟然講英文同國語都好似講緊廣東話咁，真係難為出席之國內外嘉賓，況且佢本人之廣府話亦都不敢恭維，好似咬住隻燙熱雲吞喺口度咁樣，呢樣就同現知縣分別好大。過去小城同鄰埠兩地評比「雙華」之時，庶民都好驕傲小城之阿華有一定政治人物的風采，而且口齒伶俐、反應恰到好處，能夠清楚表達自己要表達的意思。相反新鮮候選人在鏡頭前，只可以睇新聞稿，白白浪費電子傳媒上的自我表現的機會。

選知縣（上）

圖片來源：新浪網
鄰埠近年插手小城事務，以生果報為首等一眾傳媒，一直以大鄰埠自居，試圖利用鄰埠價值觀影響小城民意觀點。當然，小城今年正值「傷損年」，大家都玩緊估領袖遊戲，鄰埠媒體唔差隻腳入嚟就梗係對唔住自己啦。雖然水面依然風平浪靜，但水底下風起雲湧不時亂放氣球，目的都係想喺估領袖遊戲中試下阿爺嘅風向如何，好表示自己眼光獨到。不過無論鄰埠傳媒如何猜估，小城庶民只會關心新一任知縣對小城和諧會唔會有影響。事關首任知縣當年強勢登場，庶民寄予厚望之餘，亦為小城做到一定功績，只可惜中後期屢爆大鑊，至埋年才發動安撫政策，於兩次抗疫戰挽回部份聲望。加上今年「傷損」的另一選係代議士之更替，而新一屆代議士將會決定未來小城幾時、或者係有冇機會比庶民自己揀領袖，影響往後小城政治生態之發展，更加對小城以後有幾國際化起著指標性的作用。所以今年之「傷損」係非一般之選舉年。除咗政治生態變得更敏感外，「傷損」又撞正「箱慶」，小城錢莊之派錢行動，又被人質疑可能會被利益團體安排作助選經費而要嚴格審批，結果搞到各樣小道消息滿天飛。自從有人第一個正式表態參選之後，坊間反而更多忖測，因為按時間計首名表態人士似乎心急咗少少，因為現屆知縣剛定好遊戲時間表，翌日就表態辭官準備競選工程，加上小城仍然面對週邊城市之瘟疫威脅，作為防疫衛生之主要官員，雖然話下面做到嘢一切都會順利過渡，但領軍人物忽然間走咗去玩估領袖遊戲，多多少少都會對命令之下達有所影響，咁究竟佢咁心急為乜呢？莫非驚阿爺唔想俾佢做乎？

小城世紀大盜（下）

世紀盜竊案其實帶出咗唔少社會問題，從衙門公佈之案件詳情可窺一二。首先犯案者乃三十多歲的押送主管，任職該保安公司約五年左右，按照老舊過去的標準，此君升得好快，而且備受信用，不消兩年就可晉升至銀行解款主任一職。當中卻可有另一種解釋，就是犯人由入職開始，小城就進入勞動力不足時期，有經驗的保安員或主任大都被賭場高薪挖走，蜀中無大將的情況下，唯有把最有經驗的人晉升，去頂替已被挖走的高級位置，就算對方仍未合格亦只好如此。再者，老舊傳統中要當任何備受關注的職位例如帳房收銀、金行職員、銀行櫃台員工，除了要有人事關係介紹之外，要另加舖保（即要有份量人士作擔保才可成事）。若今天的勞動市場中仍保留此傳統，或可有再多一重的保障。另外，引發犯人犯罪的誘因，亦可能因為小城經濟的突然起飛，製造出巨大的同輩差，疑犯可能因為身邊的友人或前輩，在轉到賭場任職之後急速提升生活質素，為了要與原本與自己同一級別的人看齊，令原本自認有同樣能力的疑犯不甘被同輩看扁鋌而走險。事實上保安護衛員的工作十分艱辛，除了要輪班工作外，同袍中的本地人甚少而且大部分都是上年紀的人，要在職場找到可交心的朋友十分困難，最後自然要不斷消費以打發個人寂寞。最後案件留下一個最大疑問，亦都是大家十分關注的，就是疑犯如何能避過多重天眼及班同事的監察，可以獨自取走兩千多萬圓，而竟然可以犯案數十次都冇人發現？除咗疑犯睇通監察漏洞之外，相信更重要者乃護衛公司內部，沒有足夠人手去監察整過交收過程，才可令疑犯有機可乘，只要內部的得過且過，就算有再完美的保安系統，都唔能夠阻止同樣事件再度發生。

小城世紀大盜（上）

保安主任涉嫌監守自盜，偷取自動櫃員機錢箱合共約二千七百萬。雖然作案者並非一次過偷取所有款項，不過相信合計被盜之金額，應該破了小城開埠的盜竊紀錄，而且仲要係現金。疑犯供稱炒股票損手加上嗜賭所以多次犯案，而且次數多達數十次，歷時前後橫跨兩年。
　新聞一出自然震驚茶餐室，個個都話犯案者只叻一半，因為最終都東窗事發，做唔到絕世神偷般神不知鬼不覺，但係就真係夠大膽，唔係偷一次半次，係偷足幾十次，如果唔係點可能累積盜竊成二千七百萬咁多呢？大家都好奇怪點解可以一年先至有人發現被盜，按照報導疑犯負責兩家銀行之自動櫃員機現金押送，而作為押送負責人當然大把機會落手，但係作為保安護衛服務公司，又點會咁簡單可以俾人出到術，不過今次咁大鑊，相信唔少公司都對保安公司失去信心。事關原本諗住最安全、而且亦有保險公司包底，諗住都冇乜問題，但係段估唔到嘅係竟然會被人偷足幾十次，每次都唔係小數目，根本就唔能夠想像。雖然唔係每個人都有經驗，但係大家想下小城最大面值都係得千圓面額，而櫃員機只會提供五百及一百面額，要一次過拎走幾十萬，真係好似拍戲咁要用袋裝起至得。即係話要玩偷天換日根本唔係容易，但係犯人就向大家證實咗呢樣嘢係真成立嘅。但係十分奇怪茶客中唔係好多人指摘犯人的品德行為，可能因為受害者係銀行關係，而世界銀行業今日都差唔多信用破產咁滯，大家差在未當犯人係俠盜羅賓漢。當然唔係支持犯人做出呢種咁嘅行為，而且案件俾咗大家一個警號，就係原來小城既所謂安保公司咁得人驚，所謂嘅保險系統竟然等同冇王管，情況等同海嘯下的銀行一樣，根本就冇保障。

死好彩（下）

今次「豬流感」源頭地區始於太平洋另一端的美洲，而且擴散得極快，執筆時最接近者已到達袋鼠國，官府有幾多時間去準備面對疫症壓境仍然係未知之數，但係小城會唔會好似上次非典一役咁「死好彩」就真係好難講。
　今日小城旅遊博彩業火紅，每日入境旅客數萬人，一座座巨大的博企建築，包含著世上最大型的賭場，就算係經濟唔好，世遺景點一樣係插針都插唔入，因為小城一直都係周邊地區消費便宜的後花園角色，經濟點差想輕鬆吓到小城玩都係所費無幾，再加上祖國一直支持小城經濟發展開放自由行，遊客多就係必然嘅事。對於外來疫症流入的控制當然唔似非典時咁容易，而且現在小城越嚟越多唔同國籍人士出入，就要掌握更多唔同地區嘅疫情難度自然更高。而經歷開放賣賭之後小城人情已不復當年般的緊密，街坊街里之間的互惠互助經已消失，要像以往般一同清潔公共空間就更加難上加難。而城內高危的疫症點包括巨型的博企及集中的中場賭檯，中央空調就成為疫症蔓延的最佳途徑。另一高危地帶自然要數集體運輸工具，繁忙時間的公交要上車一樣咁難一直都冇改善，庶民亦從來都冇得揀。至於作為接待遊客的旅遊巴更全面更換為密封式空調車廂，連想開窗令空氣流通嘅權利都受到封殺，外來旅客自然比小城庶民更加容易受感染而成為傳播者之一。到最後小城外遊人士與日俱增，個人衛生關注程度低者自然更容易在外受到感染而帶回小城，似乎今次爆發的全球性疫情，小城未必能夠像以往般「死好彩」地可以過關，一切可能要看知縣最後一年如何處理這個最後一「疫」。

死好彩（上）

疫症肆虐西半求，太平洋彼岸嚴密監控，另一方則嚴陣以待，趕緊在疫情未曼延到本地區前加緊佈防減少損失。不過投機者早就表態借勢發其“災難財”，航空旅遊相關股份半日內被質低一半，藥物衛生類則被狂炒。由於源頭地區仳鄰超級大國，令金融海嘯中還未復原的世界經濟再受打擊，應驗了古句「福無從至，禍不單行」。
過去小城與其他地方一樣，同樣經歷禽流感、非典等疫症的圍堵，週邊地區不斷爆發新症，但小城都能安然渡過，今次來勢洶洶的豬流感，小城又如何面對呢？回顧以往面對被疫症圍堵的時候，小城之衛生當局不時發出呼籲注重個人衛生，但係只要簡單觀察小城街道，就知道小城並非注重個人衛生的地方，非典一役若果唔係外圍地區把關嚴格，以小城得過且過的作風早已淪陷而成為疫區。但當年仍然有部分特殊條件使小城得以保住未受疫症入侵，當年小城仍未開放賣賭，縱使今天環球金融海嘯下，當年的經濟仍未有如今天般的興旺，街外人流稀疏乃小城傳統，而人群密集的地方卻又寥寥可數，交叉感染的機會不多，要控制疫症相對亦比較容易，而且當然小城官府仍處於民望高企如有力家長，官府一句庶民絕冇違令，況且街區互助的傳統亦有助小城渡過難關。以上種種都是幫助小城免受疫症入侵的因素之一，相對於鄰埠發達國地區，不單未能阻止疫情擴散，縱有卓越的醫療技術，卻並不是最有效的防疫措施，原因在於鄰埠激烈的競爭下，相對個人的小小病痛當然係小事一樁，咁就成為帶菌者向四周傳播病毒的主要原因，傷風感冒就請病假除非你想唔撈，或者大家根本就唔會因為小小病痛放棄搵錢機會，結果令小城被鄰埠冠以「死好彩」之名。

自救與被救（下）

倫常慘案的發生除了證明庶民未能適應社會的急速轉變外，亦表示庶民仍未有適當的準備強化自己、面對挑戰，情況等同三工法例一樣。小城之打工仔心態一直以嚟，都係用老闆所開之條件來計算做唔做得過，根本就冇理過什麼打工法之保障與否，只求搵份好工生活有保障咁解，但經歷咗開放賣賭政策之後，各老闆所開之條件已經有根本之改變，冇咗萬事好商量呢家嘢，點解咁講，因為自從有商號增設人事部呢個崗位，取代過往由「事頭婆」擔當個位之後，新工入職必然要簽合約而唔係口頭承諾幾多就幾多咁解。既然有人事部呢個位，佢哋自然要做番啲同「事頭婆」唔一樣嘅嘢，先至證明到與別不同，所以請人時候加多唔少花臣以吸引人才。既然要簽合同就即係定咗基本條件，亦都改變了以前由老闆從上而下之恩惠，合約精神底下就應該係相互平等。雖然在工作上大都由老闆發號施令，但如何處理好工作，都要靠伙計用心努力，才能圓滿完成工作。事實上老闆伙計都係互惠互利之關係，以某會長所講小城仍然係中小企佔絕大部分，老闆們好難一下子改變去適應三工法，若果係咁老闆們就只有被自然淘汰。至少今時今日，伙計同老闆之間已經變為拍檔關係，唔可以再用以往之高高在上的態度，同時工作上亦需要有商有量，才能改進工作的成果。喺經濟火紅、人力資源緊張的年代，老闆們為保足夠人手應付生意自然樂意改善工作條件，但當經濟逆轉老闆就諗縮數想維持豐厚利潤就講唔通，況且今時今日的打工仔已經唔係當年盲字都唔識的草根層，若果仍然只想三幾千蚊搵人洗碗，諗吓辦法點樣用機器搞掂仲加切合今天的僱傭關係，咁先至係自救同改善經營的上策。

自救與被救（上）

早前發生的倫常慘案，茶餐廳內客人議論紛紛，有人話衰爛賭、又有人話佢冇腦、更多嘅係話佢唔顧個細路權利。事發之後好多人追究社會責任，問點解冇人發現社會上之隱性個案，而且讓其越演越烈！用到咁極端嘅手段，都唔係一般人所能夠理解，大家喺度猜估根本就唔係辦法，正面地去做當然係解決遺孤大仔嘅心理同日後之需要，呢方面官府反應尚算迅速，只不過事件之發生，值得令人深究點解事主要搵埋個女去陪死？冇乜人做過調查點解小城會發生呢類咁慘嘅事，但係好簡單咁睇吓近日小城所發生之重大新聞，就知道小城正發生急劇轉變而大家又束手無策。少年燒車、弱能人士被性侵犯、獸父侵犯自己女兒等完全脫離一般社會認知的犯罪行為！以上種種都係大部分作為有人類認知的人所不能接受的暴行。社會問題大都因為社會急速變化下發生，改變了從前的生活模式，輪班工作暴增下家庭關係變得疏離，物慾主義填補一時的心靈空虛後問題更加嚴重，在傳統的社區倫理開始逐漸消失之下，當個體面對困境的時候，一時間以往固有的求救渠道已消失，加上傳統要面的習性卻又改不了，壓力無法宣洩下最後往往以終極手段來解決，社會就付出了沉重的代價。參考周邊城市如東京、首爾及鄰埠等發達地區，問題比小城更嚴重，主要原因乃都市化發展下，過往的睦鄰社區關係消退，街區組織等已經不能發揮互助作用的功能時，取而代之就是政府福利部門及專業輔導機構的前線社工，負責協助有需要人士解決問題，小城仍較上述地區優勝之處乃小城地方細，要發現隱性個案相對較容易，如何自救或被救，都應總有方法。

點解要燒車？（下）

有人燒車係為了貪得意，有人係為了利益，更加有人係為了發洩，乜人都有可能有唔同嘅理由去燒車。但只要睇吓今天小城內之鐵馬亂泊、無法無天之狀態，就係人都眼火爆。從前小城根本就冇規管過鐵馬之泊位，最多只有四輪市虎會被規範於泊位內，到了市虎數量滿瀉之後，大家改為才查鐵馬貪其出入方便，再加上鐵馬之考牌條件比四輪市虎更優厚，年紀限制小加上自動波及改良操控，一時間鐵馬數量幾何級數暴增，遠遠超越一般車輛的增長數量，以致引發今天之社會問題。到今日鐵馬數量太多，除了係官府管理問題之外，更加係庶民根本就冇學習過駕駛禮儀，加上近年經濟發展形成之交通混亂，令更多人捨棄用公車而選用更便利之鐵馬代步，與此同時官府卻採取放任市場政策，造成今天的惡性循環。不過就算對鐵馬增長上採取措施限制，都未必能改善今天鐵馬泛濫之亂泊位危機。事實上鐵馬暴增之後，車主們為求放低部車根本唔理地點，其出發點就係只要可以方便自己兼放得落部車。大家就可以見到一部鐵馬放喺銀行門口、士多門口、行人道上、四輪市虎泊位之間，根本就唔係叫做泊車，直頭係有空間就放架車喺度，等同垃圾放喺街邊冇乜分別。同時，當車主們已經去到乜都唔理就咁隨街放低部車嘅時候，自然搞亂社會正常秩序惹起公憤。但係今時今日每個人都只係識得講個人權益，冇人再理會乜嘢係公民意識，引起公憤當然係好自然嘅事。今天小城依然存在唔少暗巷內鐵馬亂泊，阻礙不少住宅之出入口，加上仍然住在暗巷內之住戶大都是上年紀之老人家，放火者與亂泊車者同樣罔顧他人之生命財產安全！

點解要燒車？（上）

呢排成日發生燒車事件，試過一星期燒足四日，個個都擔心自己同家人人身安全。茶客紛紛話唔知點算好，事關茶餐廳客人十之八九都係鐵馬駕駛者，即係車主咁解。不過茶餐廳老闆就話，每日送貨嚟我哋舖頭嘅伙計，次次都就咁停喺舖頭門口，阻住啲客入嚟，講極都唔聽，因為講咗之後冇幾耐又換第二個人嚟送貨，差唔多次次都要話，所以話到口水都乾。鬼咩，而家啲人全部都做唔長，淨係識得唸點樣喺最短時間內搵最多錢，送貨嘅更加唔例外，邊個出多啲自然就幫邊個送貨啦！大家就問乜唔係官府已經執行新交通法，隨時可以抄佢牌咩？老闆就話佢哋送到嚟放低就走啦，邊個衙差睇得住佢哋？連班衙差簽更簿都就咁停喺條街度啦，你估佢有資格抄人牌咩？
　就係咁樣，鐵馬違例泊車情況根本就冇改善過。當然部分主要區域，根本唔容許以上之非法情況繼續落去，但係而家成個小城內之警力只會集中於商業繁盛地區，一般市內及住宅地帶根本都見唔到衙差巡更，更唔使講佢哋點樣保護市民之生命財產。不過警力如何強大都唔能夠保障得晒所有庶民之安全，即係話大家要研究一吓問題出喺邊。就咁睇大部份被放火燒毀之鐵馬都係發生於晚上的暗巷之中，當中又以「掘頭巷」最易出事的高危地帶，事關最少人到，而且連衙差都唔多想進入以上地帶，因為夜闌人靜擔心唔知會唔會被人搶槍，自不然就係犯罪嘅溫床！呢樣就知點解啲黑暗陋巷會咁容易發生燒車事件。不過並唔係引發事件嘅主因，最大問題就梗係人啦！

省城之誤讀與小城發展（下）

既然連省城官府都錯讀京官方針，咁小城又點算呢？事關觀光業界一直期望知縣能夠借住兩會時間，同大老闆傾吓再次放寬自遊行嚟補貼吓小城官府開大咗嘅頭、玩大咗嘅遊戲。不過經歷省城錯讀一役之後，城中庶民都心裏有數，有排都唔使諗京官會唔會出手相助。因為之前京城大官突然到訪小城，就好明顯提出三地融合，結果指示內地送一份大禮俾小城，喺離島批塊靚地俾小城作未來發展之用，事實亦都俾小城所謂民意更加有長遠之發展目標，同樣地指示咗小城未來發展之方向。點解咁講？好簡單，全國發展之佈局根本就唔係地方官可以理解，等同最近京官話明要發展海派成為國內之金融中心，即刻嚇到鄰埠想死咁滯，又要鄰埠知縣出面解畫去安撫民心。話時話唔通咁大個祖國只可以有一個鄰埠去作為國際金融中心咩？而且，根本鄰埠之所以成為今天之國際金融中心，都係多得當年海派人士為保資產而走到鄰埠，才有能力形成今天之國際地位。加上今天之國力與過去根本不能同日而語，國內多一兩個金融中心根本就唔係問題，鄰埠之擔心其實只表現自信心不足、競爭力不足的懶惰心態。面對全球金融危機之鄰埠，未到回復期就要面對阿爺政策上的改變，以從前救特區改為救全局之心態，同樣值得小城借鑒，即使京官點樣體貼兩個特區，能否自救都係睇各自的造化而唔係睇阿爺點樣打救，更加唔可以淨係靠阿爺出招打救而乜都唔做，所以學鄰埠魔童話齋：「唔好成日問阿爺攞嘢，要做番自己，活出自我的精神，如果唔係就變咗中央台」，但係做中央台都冇乜唔好，不過係小城想做都未夠能力做，俾你做又如何呢？

省城之誤讀與小城發展（上）

省城官府早前宣佈，利用行政手段，把連續三天「五‧一」定假，配合人為調假安排，把假期結合成七天長假，曲線恢復剛於去年取消之「五‧一」黃金周，以刺激內部消費。結果引來京城出手阻撓，明令各地不得擅自調假、自行安排假期，突顯京城與地區政策上的不協調。不過按照相關報道，原本省城出招救經濟係無可厚非，但係咁樣引伸出國策與地方政府的不協調，以及京城政策的僵化。原本省城希望在假期上作出調動，無非都係因為配合京城政策，搵辦法刺激內需，不過近來外部環境咁差，希望從普遍市民放心大舉購物呢條橋未必咁容易行得通，但係省城乃沿海最富庶地區之一，早就完成對現代基本生活用品的需求，反而國人一直外出不易，推出長假則激發省城市民外出遊玩的心態，從省城角度出發，都可刺激省城外遊公司的生意，亦可帶動省內導遊更多工作的收入，都是刺激內需的一種方法。但係從京官角度睇，省城官府在閱讀京官政策上犯了一個好大嘅錯誤，就係冇諗過從全局睇，祖國經濟根本已經喺水深火熱之中，如果省城利用改假去刺激內需，即係將國內嘅錢經長假出外的外地遊客進貢外地，而唔係協助內部經濟，但係幫咗人人哋唔會多謝你，亦都唔會改善到內部經濟咁解。但係呢樣都唔怪得省城官府，事關海派剛剛出咗一船富豪船出征寶島，大大話話向寶島進貢成千萬，咁省城官府眼見海派都得，咁即係京城政策之主軸，可以推出類似政策去刺激內部消費，奈何京官根本就冇將寶島視為海外，加上近期兩地正努力修補關係，派一隊富豪去幫吓九哥穩定政權，以後自然好多生意傾。所以今次省城誤讀京官政策都係無可厚非。

扮大佬師爺黨

試閘闖關鬧劇看似暫告一段落，但喺原來仲有下文。早幾日小城垃圾會收倒鄰埠同級機構之「邀請」函，「邀請」佢哋出席對方於當地垃圾會舉行之便利兩哋出入境之討論，同場加插要回覆部分人「關注」小城閘人名單一事，之不過其「邀請函」亦列明，鄰埠嘅人可以受到該地之「權力及特權法」所保護，但喺你哋就冇份因為你哋唔喺當哋特權階級，簡單D講句就喺請你哋去比佢哋侮辱比佢哋「鬧」。呢批大港主義嘅所謂垃圾議員，一直以高級知識份子自居以為自已頭腦比人叻、唔啱佢哋口味嘅政策同規矩就一定窮追不捨。而更慘者喺佢哋真喺淨喺識用把口，在議事堂上用口舌戰勝對方，但喺卻完全冇腦只喺死淨把口拖垮官府的施政，卻又全完未能提出真正有效之解決問題方案，結果好明顯，就喺睇番鄰埠回歸後咁多年，差唔多衰足咁多年，可能官府真喺十分不滯，但喺亦因為有呢班友，根本就搞到官府施政處處受制，結果被京官指摘「議而不決、決而不行」，白白浪費晒番身嘅機會，結果次次出事就好似乞兒仔咁搵阿爺放水求救。單單睇下呢班所謂社會精英竟然潑婦罵街般，走去隔離埠示威要插手對方事務，莫非鄰埠十分好景，冇乜民生社會問題要處理？可以得閒成咁？不過差D唔記得呢班人全部都喺師爺黨，即喺專業搞屎棍，唔搞嘢佢哋都唔知做乜好。所以民生問題搞得唔好根本唔關佢哋事，唔駛旨意佢哋會識得做，因為佢哋嘅職責只喺「鬧」。況且呢班人都喺鄰埠市民「揀」嘅，喺好喺醜鄰埠自己都要受，不過嚟到小城就完全唔同，呢度冇人「選」佢哋，所以亦唔喺特權階級，唔歡迎佢哋就喺唔歡迎根本唔駛俾面，如果佢哋以一國兩制內的一個行先，就唔該唔好當自己喺花旗國會議員，若果喺兩制行先，就唔該更加唔好咁串扮大佬。

試閘鬧劇買單計數

試閘闖關鬧劇暫告一段落，埋單計數損失最大者梗喺小城官府。官府投鼠忌器用回舊有審批標準，結果連同傳媒合共約六十多人之桂枝團只有五人未能過檢，自不然即場大炒大鬧一番最後又喺原船返歸。數第二大損失者就喺移民警，今次的事先張揚試關事件，結果移民警竟然方寸大亂。首先唔准拍攝之禁區地帶，竟可容許十幾支攝錄機加二三十部相機，打晒燈擺好鋪士齊齊任拍，又准十幾人圍住審批櫃位，全程拍攝審批過程而搞到秩序大亂，成個移民警之威嚴都被打散。既然對方一早事先張揚，移民警方面喺唔喺亦應該有所準備，開設特別櫃位將呢班搞嘢人士同一般旅客分隔開，之後先同佢哋慢慢玩，亦可減少對其他旅客之影響。不過明顯佢哋冇咁做，過左關之後又繼續比佢哋喺碼頭做蘇，成柵人閘住晒個入境關口搞到其他人都要停晒喺度等佢搞埋先，相信當日唔少鄰埠過嚟玩之市民，都喺碼頭被佢哋阻左唔少時間，所以第三大損失者自然喺被阻之入境旅客。賺得最多者當然喺鄰埠傳媒啦，有人做埋蘇比佢哋寫，只需要幾舊水船票就可以完成一個頭版故事，早午晚三段公仔箱新聞合共播足超過半個鐘，以成本效益計可謂最好賺之報導。當然呢班友亦都賺晒，求其買張船票過嚟食餐飯就可上頭版頭條，連兩條橫額都喺用完再用之舊料，咁著數之宣傳去邊度搵？至於今次鬧劇中，小城唯一得益者就只有葡餐老舖，事關除左幾十人包左個二樓嚟食晚之外，就連班友之食相都一一上鏡，結果當然收倒唔少宣傳之效，因為喺電視新聞內出現幾秒重好過賣廣告，不過呢間老舖根本就名聞省港澳，而且位處中區根本就唔愁冇生意，唔駛佢哋幫手搞宣傳。

公然踩場與官府自信（下）

圖片來源：澳日
今次鄰埠垃圾議員大鑼大鼓，集晒馬過大海踩場，擺明車馬係試閘剃官府眼眉，不過若果官府就咁被佢哋順利入境過關，就真係被人剃到應一應，你估佢哋今次入到境就唔會唱小城官府咩？（執筆日仲未知結果如何，批准入嚟慘囉！）佢哋根本就冇諗過會入到境，仲呼籲一齊過海者買單程船票唔使損失咁大。咁講，呢班自大桂枝唔知自己乞人憎就佢哋自己嘅事，但係官府上次又的確係重手咗。事關無端端閘咗個應邀過海嚟小城，出席大學研討講座之教授返轉頭，最後搞到講座都好似話搞唔成，呢一點都係激發鄰埠班所謂飯聞垃圾議員過嚟踩場嘅原因之一。
　事實上呢次官府的過敏反應，最主要都係官府對自己冇信心，擔心今次條數字法準備通過時有所阻滯，大家淨係睇數字法嘅諮詢期只得四十日，就滾水淥腳拎去一審通過就知道。同時亦對庶民冇信心，事關今年係「傷損」同「雙慶」年，放呢班友入嚟可能又會激發小城新一輪官民矛盾，又可能破壞本來預計應有之歡樂氣氛，到時候京官到賀，出現乜嘢示威遊行就會好冇面。不過官府就真係太天真太傻，事關小城庶民雖然平時唔多出聲又或者唔係太成熟，但係亦有自己嘅主見同思維，唔係咁容易被外來人干擾自己嘅睇法，加上小城庶民主流都係習慣和諧協商去解決問題，唔同鄰埠喜好激進抗爭嘩眾取寵，只要唔係太過分，大家都樂意選用理性角度去討論，多過大鑼大鼓博出位。若然官府真正做到以民為本、公正無私，根本就無須理會鄰埠之政治團體喺度搞搞震，多做對社會有建樹、推出惠及各階層福祉的政策，配合社會變化與時並進，就唔使理外面嘅瘋瘋語語。

公然踩場與官府自信（上）

圖片來源：星島
鄰埠部分所謂有名人士過大海，相繼被小城移民警閘住打包回頭之後，一眾鄰埠垃圾議員公然預警踩場， 話明係試閘挑戰移民警，試吓佢哋個防毒軟件做唔做到嘢咁話。不過大家睇到呢篇文之時應該已經揭盅，執筆之時我都仲係估緊唔知會唔會試閘脫腳，被船公司話佢哋張票過期？事關船公司老闆都讚官府做得好，仲話唔好俾人入嚟搞搞震添。不過講番轉頭，呢次班垃圾議員集馬過大海踩場，除了要「粗暴干涉」小城「內政」之外，當中最重要梗係唔滿意上次衙差閘晒佢哋，唔俾佢哋嚟小城參加反數字法集會，今次準備好晒唔被小城官府踩諗住報番次仇。
　但係唔理兩地特區係唔係兄弟、邊個做大佬邊個係細佬都好，都叫做自治實體，批唔批准外來人士入境都有自主權而且更加唔使解釋，我喺呢度已經講過唔止一次。同時亦都唔同意呢班友走嚟「指點」小城官府呢樣唔得嗰樣唔掂，唔合佢哋心意又利用傳媒進行攻擊抹黑，抄足晒花旗國嘅衰嘢。事實上佢哋最擔心嘅就係小城通過咗數字法後，會對佢哋自己官府有壓力，未來鄰埠官府可能會加速蠟髮佢哋又要反餐死，所以與其話上次佢哋幫小城反蠟髮團體撐場，不如話佢哋擔心自己第二日被自己蠟條法搞死仲好。咁講，數字法點樣立係各自修行，當中就算有不足地方，小城各界包括部份一向批評官府嘅學者及評論人士，都對小城今次修正後通過之數字法無大異議，咁呢班人過嚟最終目的都為博出鏡，事關以佢哋口脗小城內部就算點反對，條法都會通過，咁佢哋只不過過嚟擺擺姿態，好向自己地頭嘅支持者展示佢哋有做過嘢咁解，話時話我建議小城投贊成票之代議士全體去鄰埠示威遊行，抗議當地政治人物干預小城事務，更要刊登報紙公開信向鄰埠官府作出嚴正抗議鄰埠嘅自大心態，阻止小城先行蠟髮，到時睇吓佢哋有乜反應。

人情涼薄與仇外心態（下）

早前地盤工人因事起爭執而發生命案，事件的發生值得大家探討當中的嚴重問題。地盤黑工嚴重，據報事發之地盤設有宿舍，黑工被安排在高度設防的地方住宿，出入者都被嚴密檢查身分以免黑工身分被人發現，好明顯僱主有組織地引入黑工去增加利潤，呢一部分代表工人權益的人士自然窮追猛打，向官府大興問罪之師，質問當局有冇乜嘢辦法杜絕事件再次發生，而且亦只係集中官府有乜辦法打擊黑工而唔係黑工之權益。冇人諗過點解而家澳門嘅工人變得咁暴力？同黑工泛濫有冇關係等。
　至今仍未有報道指行兇者是否清楚知道對方係黑工，而事件又已經進入衙門調查階段，喺呢度評論好似唔係幾好，但係當中庶民應該睇到這一個令人心寒的集體欺凌事件。死者雖然真係違法在小城打工，但罪不致死他都有佢生存嘅基本權利。當發現有黑工自然係要向當局舉報，而唔係粒聲都唔出有事就以暴力發洩作為解決方法。今天小城打工仔嘅排外心態足以令人心寒，學垃圾會珍姐話齋：「小城係一個移民社區，標籤或者歧視新移民都令人反感」。縱然近期經濟唔好搵食難咗，但係與其埋怨他人不如增強自身競爭能力，我哋唔係支持官府或商家任由黑工同小城工人爭飯碗，只不過想提醒大家打工仔，就算同事中有外地員工存在，都要一視同仁唔好大細超，鬼佬就擦晒鞋、內地同胞就當作地底泥，小城大部分人都有呢種咁唔公平嘅心態，今時今日仲有呢種心態，小城根本唔能夠同世界接軌，仲講乜嘢世界活力之都丫，官府喺努力發展經濟嘅同時，係咪好應該做多啲嘢促進吓小城庶民嘅視野，擴展一吓大家嘅世界觀，好令大家面對外來挑戰時有更好準備及合適之態度呢？

人情涼薄與仇外心態（上）

近日小城頻頻發生兇案，繼有地盤黑工疑因爭執被其他工友殺死後， 又發生懷疑從事賣淫之內地女子，疑於酒店房內被劫殺，另外又有精神病患者懷疑跳樓死亡，這些除了證明小城治安日差之外，媒體對於命案之報道，更體驗了小城人民事不關己之涼薄心態，更令人氣憤者梗係官府根本從來都冇理過。
　內地女子懷疑於小城從事賣淫，其實都唔使懷疑，茶客們個個都話大家都清楚，事發地點仲要有成十幾年歷史，咁耐都唔見官府有乜措施進行取締，相反在任由放縱下仲變成小城另一個「觀光」熱點舉世知名，多個國籍人士在此進行交易引發各種治安問題，不過由於此地龍蛇混集一般庶民根本不會出入該地，再加上遠離民居大家又當冇件事，而有事發生之後又最多「哦！」一聲就算數，因為只要事件與本地人無關，就對小城冇乜影響唔使擔心，呢種各家自掃門前雪之心態充斥著一般大眾，又邊會有人會諗日後對小城之影響有幾深遠。刻下小城正出現道德危機，早前未成年少年發生性行為被揭發，前天更揭發獸父性侵犯女兒達十年之久，雖不能算直接受小城黃色事業之影響，但耳濡目染之下誰都不能說不會敗壞社會風氣。對於媒體只簡短報道事發經過而沒有跟進的報道，連相對之社評都沒有，一味只掛住點樣保皇力撐數字法，連媒體都冇基本關心咁樣又點樣怪得一般庶民唔多理呢？事件集中涉及外來人士大家唔關心都算，有本地精神病患於院內跳樓，報道就只偏在一角，衙差話冇可疑就算交代一切，但係就冇人追究過院內設施有乜問題，何以可以讓患者越過圍牆？院內有冇需要檢討看管病人守則？員工需唔需要負責？精神病患需要加護處理係人都知，院方事發後毫無表示話有乜改善措施，究竟有乜人會關注？

打擊電腦法案（下）

今時今日小城大部分家庭都有一部電腦，兩至三部都十分普遍，再加上手機功能強大，如要超過一人同時上網，大部分家中都會設置路由器以供同時上網功能，而近年又因不用特別施工便能安裝的無線分享器最受歡迎。但呢類型分享器一般會提供簡易安裝，不知就裡的以為經已設定好，反而門外漢求教專人上門安裝會較為安全，事關簡易安裝其實並沒有做好個人網絡保安工作，無線分享器即是你的鄰居及樓上樓下，甚至旁邊的一兩棟樓的電腦都可以自由進出你的未有安全設定之網絡。今次通過咗之《打擊電腦犯罪》法案，授權衙差無須批准查閱大家拜訪過乜嘢網站，反而更鼓勵不法分子利用一般大眾對網絡知識的盲點，入侵對方網絡而造成嫁禍於人的另一手段。另一方面網上充斥著無數電腦病毒，而且近年越見高明，被害者在根本連自己中咗毒都未知，在不知情的情況下被罪犯利用自身電腦作出犯罪行為，隨時亦會無辜惹官非。立咗呢條新法將會大大阻慢小城發展如鄰埠或寶島般的無線網絡城市，打擊小城現代通訊之發展。況且有更多人唔知道呢條例連手機都列為電腦，即係話連最私人之通訊都有可能被人監視（話音通話唔算），咁你話有乜法子唔擔心警權過大丫，加上部分垃圾議員對網絡不求甚解，仲擔心刑罰過輕，佢哋梗係冇問題啦，根本連點樣上網都唔識，但係查案嘅衙差都唔好得幾多，到時因為條法唔清唔楚被人定罪嘅人唔係佢哋，罰重啲搞到冇人敢上網，就可以做少啲嘢又可以減少反對聲音幾咁好呀！佢哋都唔明何謂造成巨額財產損失，唔通師奶扮少女呃賭場監控幾十萬就係？如果咁都關部電腦事，點解唔立法取締報紙登徵婚或字花檔每日送出幾十萬嘅廣告？

打擊電腦法案（上）

垃圾會蠟髮，最新造型係叫做「打擊電腦犯罪」，顧名思義係用嚟處理關於電腦嘅罪案，關乎小城電腦使用者之安全同防止罪案經由電腦發生。原本立法原意唔錯，可以防止不法分子利用電腦科技進行犯罪活動，保障庶民安全。但係代議士中不乏對電腦應用知識甚少之士，對於電腦犯罪之認識及概念大都道聽途說，況且今天電腦功能日新月異，互聯網技術又一日千里，要制訂一套較長遠可行的法例並不容易，如果訂得太清晰過一兩年就又要再修改，太過原則性又等於冇立過法，所以今次通過咗呢條法似乎又引申出另一個問題，就係個人私隱同警權陷阱。呢條法案最受爭議之地方，就係衙差可以在無須受司法當局批准下，查閱路由數據資料。問題即刻嚟，看官邊位唔清楚乜嘢叫做路由數據資料？呢啲關乎閣下自身安全之問題最好要搞清楚。路由數據資料即係等於閣下上網時，互聯網服務供應商會派一個電腦地址俾你，再加上你所使用之密碼核對閣下身分後才開放服務。即係話你每次上網在服務供應商留下之記錄，就叫做路由數據資料（包括你訪問過乜嘢網站去過邊）。咁就即係衙差只須覺得懷疑就可以唔使檢察當局批准，即時監察閣下去過乜嘢網，同邊位聯絡過或者上下載過乜嘢，至於其內容就要獲批才可查閱。講真一般庶民邊會理呢類嘢丫，自己喺屋企上網去到邊睇到邊，根本就唔會理背後有幾多人睇住你去過邊，反正冇犯法俾你知又如何。不過對於罪犯就唔同，真係可以預先知道罪犯有所企圖，但係你又估吓罪犯會唔會知道有可能被人監視緊呢？此等法律只能對付例如當街強搶呢啲初級罪犯，冇阻嚇作用之餘反倒俾藉口衙差隨時監察一般庶民的網上生活侵犯個人私隱。

老廉仍然係紙板公仔（下）

圖片來源：廉政公

老廉公佈個案中，官校事件多羅羅，當中最難搞莫過於官校炒老師一案，事關該案引起社會廣泛關注，曾發生遊行遞信等抗議事件，亦令教師行業的種種問題被庶民所議論。結果老廉一樣係只向該部門發出勸喻，獲接納後就close file唔會再有下文。但係在老廉披露的案情中，指該局官員曾以老師之意識形態作判斷，然後作出炒人決定，但並非唯一考量之因素，所以老廉亦無法判定該局炒人有冇唔妥云云。不過大家都記得該位老師都執教鞭十多年，如果以其表現唔好而炒佢，理由肯定唔夠充分，但係老廉只不過係老廉，又唔係勞工嘅老孫，點有資格理！再加上打官府工連老孫都理唔到啦，所以結果亦都只能係咁。其他官校個案，有某高校違法批餐廳加價、某領導又違規直接參與利益關係之決議，但係都係過咗追訴時效而無法追究責任，報道當中無詳細闡述過咗幾耐，又或者涉及乜嘢問題，只係簡單交代咗個結果，都係提出勸喻或者係罰款了事，即係代表乜嘢都做唔到，咁我哋實情要老廉呢個部門嚟做乜呢？鄰埠廉記最近搞個新總部開放日，詳細向市民解釋廉記工作，展示多宗大案相關證物、打老虎點樣艱辛，連影響市民安危之縮水神仙尺都展覽俾市民睇，令市民真正感受廉潔之重要性，當然我哋唔係要只得十年唔夠之小城老廉，即刻進化到與鄰埠廉記一樣持槍上班咁厲害，但係就如上述之案件咁簡單都唔可以有權力同魄力去執法，庶民就好懷疑老廉打擊貪污嘅決心。若果法律上仍然未能配合，咁點解唔配合好先至搞老廉出嚟？若果只係為咗教育清廉，就唔好要佢哋去查案，查咗出嚟只係發出勸喻就算，邊度會有阻嚇力先？

老廉仍然係紙板公仔（上）

圖片來源：文化局

圖片來源：澳門日報

老廉日前一口氣公佈過去幾年，小城庶民關注極大的幾宗爭議投訴後之處理結果，當中包括住宅改建老人院、官校炒老師、「錢倉」派錢違反迴避規定、「藏經閣」設計比賽唔公平等。全部都係查咗就算，就算有作立案處理，都係只向被投訴之機構作出改善建議或提出指引，冇一單有人須負責下台或被捕。公佈個案同時亦顯示，老廉依然停留在有人投訴至會跟進，唔會主動出擊，令原本打完大老虎之後備受庶民認同之民望，又回復過去只捉雞仔唔打麻鷹之形象。

老實講以小城兩個「錢倉」開倉派錢時，唔遵守迴避規定而存在利益衝突，根本就唔係秘密。成班董事輪流派錢俾自己友，求其做場「騷」就當交差，唔知推動咗乜嘢小城文化藝術，或者高新科技。今次被人投訴，只不過係確實玩大咗條數太離譜，如果唔係庶民根本就唔會對「錢倉」有任何期待，對於庶民嚟講「錢倉」只不過係班有錢有地位人士，搵份輕鬆唔多使做之公職，又可以幫吓班老友而已，當中根本就唔係講公唔公平，係講你識唔識人咁簡單，但係佢哋個個有錢有地位，老廉又可以奈佢哋乜嘢何呢？所以最終只會不了了之。同類個案發生於「藏經閣」設計比賽事件上，老廉對呢單嘢索性連案都唔立，只向相關部門發公函加強提醒。老廉點解咁做？事關呢個所謂比賽根本就係小圈子玩意，講乜嘢全城徵集咪來來去去得兩三間大公司，係佢哋內部先至有咁嘅人符合條件，又有人幫佢哋計埋施工成本，其實根本唔可以叫做比賽，叫招標就差唔多，如果遊戲規則裡面講埋顧問公司員工不得參與，可能最後收件之後，符合條件者只得兩份，連季軍都頒唔到獎，咁又點成比賽呢。

大學夠大就叫大學？（下）

圖片來源：flickr.com

小城「最高」學府之所以成為最高，其實係因為該校為小城第一所近代大學，由私營變做公立，亦係小城官府主力培養領導人才之學府之一，當中唔少高官亦畢業於此例如小城財爺，但係若果說為了發展學校規模而遷戶橫琴，似乎又有點那個。事關小城最具代表性之高等學府，竟然位處外地，對海外以至本地學子來講，都有點掛羊頭賣狗肉之嫌。不過，對於公仔箱之風火主持所發表評論實在不敢苟同。主持們對於以規模及環境作為學府之好壞作判斷實在過份包裝化，需知道全球頂尖學府都有不同的學園，並非只有大家最熟悉英美幾家，而且以部分專門學院，更是在一個大城市內不同地方，有著數個校舍，學生們每星期要到兩至三個地點上學亦十分普遍，唔通咁樣就會影響其學術水平？似乎大家連大學教育都以商品市場化去看待，只追求宏偉的教學大樓，並沒有真正反省教育之目的。寬敞的課室及優良的設備，並不一定能培養出良好的人才，同樣地規模不足的學院，亦能以師生們的努力建立高水平的教學及良好校譽。最佳例子莫過於倫敦經濟學院，其校園區遍及倫敦市中心，教學大樓與學生宿舍分佈於倫敦不同地點依然無損其學術地位。同樣例子日本的著名設計學院桑澤研究所亦處於繁華原宿附近的二幢大廈內，每年為日本培養不少頂尖的設計人才。而大家最熟悉鄰埠的樹仁，在不獲官府承認及資助，一直由一對夫婦堅持自己的教學理念下，終於在前年被確立其大學地位成為鄰埠首家私立大學。種種例子表明學府之優劣最重要是其辦學者的教育理念與師生們的努力，與其校園規模並沒有直接關係，空有美輪美奐的校園並不能真正提高教學水平。

大學夠大就叫大學？（上）

圖片來源：澳門日報

小城「位置最高」之學府橫琴留地？某大報章大大隻頭條咁樣寫，跟住同一版就出現某教育界表示遷戶有利該校發展、同校師生贊同遷校、舊地皮搶手等題目之報道，雖然唔敢批評其真確性如何，但係報道內容極具指向性則無可否認，因為過兩日公仔箱就同樣訪問該校師生，大家都對遷校態度表示保留，並非如報章所指大家舉腳贊成。但係故事又有新發展，連街區代表都話橫琴塊地建乜都好，一定要留番部分建公屋以解決小城上樓難。
　事情越搞越複雜，報道中冇明確交代學府係遷校定擴校，當然亦冇清楚交代點樣得到呢個消息，但係就實牙實齒咁講兩地將中央指示提到議事日程，同埋已經係初步規劃所得出的結果。看來該報唔止代表黨的喉舌，更發表指導性言論俾壓力予有關當局。事關小城突然多咗塊地，自然各方勢力虎視眈眈，搞盡腦汁爭奪資源利益，至於當中邊個真係為小城學府之利益，就真係冇人知。自從該消息一出，各路人馬都爭相表述抒發己見，試圖主導輿論爭取制空權。首先最關心學府之遷擴者就梗係該校教授學生，同埋地產業界。因為關乎兩者切身利益，自然努力發表意見。尤其影響人員進出、校譽甚至空間之運用都牽動全校師生，甚至已畢業之校友。所以當公仔箱評論節目以此為題作評論，自然又與「黨報」口徑不同，大多反對遷校而支持擴校，更有先在規劃中「霸咗塊地先」之言論，亦有主持羅列小城周邊較佳學府都處於一個規模地理，有利教學研究及學校風氣，咁呢樣嘢又是否等同是良好校園必定水平高呢？

三百蚊的結構性思維失調（下）

其實搞呢類型所謂慶回歸活動，本身官府用意如何？不言而喻，希望搞吓公民教育叫大家記得回歸同國慶，製造全城賀回歸嘅市面氣氛，又好向阿爺交代，順便刺激吓經濟提高內需，可以叫做一石幾鳥。
　但係對於要爭表態求資助嘅社團就可謂大件事，因為官府之派錢方式係用記名及身分證作登記，呢個方式無可厚非，因為如果唔係咁，就肯定有人食足一個月都未完兼會浪費公帑。不過監管方式就成疑，事關登記身分證好容易俾人知道，但係究竟邊個證實佢本人去食過就真係冇人知啦。但係官府呢個資助最弔詭嘅地方係變為小城社團照妖鏡，就連官府都估唔到嘅副作用。因為官府之派錢，個個社團都會爭取表現，連根本一年都唔會有搞一、兩個活動之隱形社團，都會搞賀回歸慶國慶活動以爭取表現，因為如果派埋錢都唔搞，社團擔心會影響第日官府資助的評核。結果反而導致平日同時參與九萬幾個社團，希望撈著數嘅活躍人士即時現形，為要表態自己企喺邊一面而頭痕。又或者係幾家都答應出席，結果只能去到一家甚至一家都冇去，搞到社團亦失晒預算。呢啲都係小城奇特之社團文化所得出的產物，再加上大部分隱形社團根本就冇乜策劃力及組織力，參與者更加唔會放乜嘢時間去搞好佢，最簡單直接乾手淨腳就係訂番幾圍叫做搞咗個活動，就連部分大型傳統社團都患上結構性思維失調，見人訂佢又訂。結果搞到大部分酒樓酒席都被社團訂晒，就咁睇落好似可以幫助到經濟刺激內需，不過但凡有出席過同類型活動者，都會記得最後每圍根本都唔夠人，每一圍都食唔晒而嚴重浪費食物。若果官府真係有心搞好慶祝回歸同國慶，唔該用多少少腦去做真正嘅推廣，少做呢類粉飾太平嘅舉措以免造成浪費。

三百蚊的結構性思維失調（上）

過完農曆新年，大家都食咗唔少餐豐富美食或新年食品，喺呢度希望大家保重身體，保護好個胃準備迎接下一個挑戰。因為大家應該年中或年尾有九萬幾人想請你食飯，點解？因為今年又到五年一次大食年。官府錢倉公佈小城社團搞慶回歸活動會補助每個參與者三大舊水，但係就要用身分證登記而每人只資助一次，全城有成千幾個合資格社團，只要肯搞又符合條件就會被資助。呢類型派錢支持社團搞活動嘅資助方式，對於社團嚟講可謂幾年一次推廣自己嘅好機會，梗係唔會放過。可惜正如幾年前那次一樣，部分大型傳統社團今年早已開口話咁樣安排好難搞，仲同記者講錢倉應該多聽社團意見，若果唔係佢哋又好似當年咁，明明訂咗一百圍酒席，點知唔夠其他人快爭取參與人士，最後只得五十圍人而造成浪費。即係同緊大家講，經過五年之後，佢哋仍然只會選用請人食飯呢個方式，嚟同大家慶祝回歸同國慶。而錢倉亦同樣只識得用番五年前嘅方式嚟叫人搞回歸慶祝活動。坦白講，經過咁多年，呢類所謂傳統社團除咗夠傳統外，就連搞活動之方式都係幾十年不變咁傳統，淨係識得搵間酒樓擺番一百幾十圍，跟住搞下抽獎咁就叫做慶祝咗回歸，根本完全冇用過腦，同樣地錢倉到時到候好似例行公事咁開倉派錢叫人搞活動，就叫做同大家慶祝國慶，只係形式重於一切，有搞過交咗差，又可以同官府講佢哋出咗幾多力團結社會。基本上食完餐飯之後都唔記得自己慶祝過乜嘢，結果錢倉同社團只不過白白浪費咗社會資源甚至食物等天然資源，得個搞字，對小城一啲益處都冇。

心態要修正（下）

自從兩地都回歸祖國之後，雖說兩地同是高度自治，但係兩地知縣及高層同袍時有交往，又經常同一天上京述職報告京官，又同時出訪四川災區以表兩地之關心，加上現任鄰埠知縣的太座亦是小城出身，原本兩地就有著密不可割的關係。但係唔知點解當年兩地先後推出智能身分證後，小城都未能取締專為赴鄰埠的證件，反觀鄰埠自推出相片身分證以來，已被認可作為過大海之間的身分辨析物。從來前朝官府所推出的專屬鄰埠旅遊證件，乃用來增加官府收入，亦只有小城有這樣奇怪的安排。但係到咗今日，依然有人持有灰簿作為赴鄰埠的證件，又有前往各海外地區用之旅遊證，再加上智能身分證，小城能合法前往鄰埠之證件多達三種，看似十分方便其實認真麻煩，雖然灰簿於智能身分證推出後，使用率已近乎零，但係智能身分證最麻煩就是要用專用的打印櫃打印一張赴鄰申報表，呢樣又唔及灰簿方便。加咗咁多關卡無非都係因為鄰埠曾經出現小城黑工影響社會，但係到咗今天被小城遣返之鄰埠黑工不計其數，而金融海嘯下小城被裁之鄰埠勞工亦接近萬人，若鄰埠依然以小城只作自己後花園之心態對待，只會加大小城對鄰埠的反感，窒礙小城在經濟發展中鄰埠可參與的空間，變成自我邊緣化。大家睇下回歸以來，鄰埠每當面對經濟逆境都總會向阿爺求救。而小城則從未主動向阿爺提出特別的傾斜政策，只是若果阿爺出手救鄰埠，基於公平原則必需同樣對小城作出優待，這樣已經使小城數年間實現高速的經濟增長，可見鄰埠必須修正以往對小城的心態，以平等互惠的心態謀求共同發展。而據報這個被庶民一直視為不平等條約的出入境安排，終於可望在不久將來被取消，實為兩地之福。

心態要修正（上）

小城爭取多年的入境表打印機終於可望落戶鄰埠碼頭，解決匆忙過大海卻忘記在小城打印而被無辜遣返、慘被鄰埠邊檢人員當非法入境者處置的屈辱。根本上這個問題，由兩地官府批准持身分證就可以過海入境之初就已發生。從來世界各地出入境部門，對於有邦交或承認對方政權所發出之護照或旅遊證件，一般都需簽證才批准入境，而對於豁免簽證地區之入境者，大都需填寫入境表以便核實身分及便於管理等，以上規則已成為國際旅客的基本共識。而對於鄰埠及小城兩個都以旅遊城市自居、每年各自接待三千萬入境人次的地方，更應該較其他地方懂得處理旅客出入境問題，可惜偏偏就是兩地間之出入境問題搞到居民無所適從。
　自從賭公司建立船隊接載鄰埠水魚到小城屠場進貢後，鄰埠賭仔一面倒地每周向小城賭王朝拜，而小城庶民則最多一年數次過海購物，鮮有每周到鄰埠之行為，所以兩地之出入境關係乃一面倒地以鄰埠旅客壓倒性。從鄰埠角度出發，以前限制小城人士入境乃擔心會出現逾期逗留而成為黑工等社會問題，加上單向的文化輸出及兩地經濟實力的差距，使小城被看作一直處於鄰埠的陰影之下，形成兩地不能對等之出入境關係，該心態從一開始就存在於鄰埠人的心內。直到今天，這種關係仍然存在於兩地各類型交往中。而過往小城上手官府之管治無能，是縱容這種不平等條約出現的元兇之一，亦令小城庶民一直未能抬起頭做人，就算出到海外亦只能向人家表示小城位於鄰埠隔籬，當然這亦是當年小城過客政權管治下所得出的產物之一。

小城上榜步步高陞？

傳統基金會喺全球經濟自由度指數報告中，首次選出小城排行全球廿一位，個個都以為這證實咗小城喺世界上具有排行廿一位之競爭力，喺亞太區仲排第六跟隨日本之後，開心到班茶客傻晒。由早兩年小城賭收開始超越拉城後，城內就出現咗部分自大人士，開始否定小城其他方面過往所作出的努力。當然啦，呢兩年小城大部分打工仔或多或少工作條件及環境都有所改善，加薪加福利等都令到唔少人以為只要做好博彩旅遊，就可以在全球佔有一定位置。但係大家唔好唔記得，小城受到祖國及官府的政策傾斜，才可享有開賭呢個咁特別嘅待遇。所以大家對呢個話到明傳統基金會對環球經濟體作出嘅報告，千祈唔好有太大妄想。首先，發出報告之機構稱為傳統基金會，即係十分之保守，對於新興經濟模式唔係咁明，對新一代的行為就更加唔多清楚，而小城之所以上榜，可能只不過係因為小城開放賭博經營予隸屬花旗資金的賭場，而小城官府又對花旗賭場所提出之各項要求可謂全無托手肘，要地有地要人有人，同屬花旗之傳統基金會自然覺得小城對商人唔錯，抽稅少而支援大，所以，有乜法子唔一下子上榜就去到廿一位呢。試想該榜十四年以來榜首位置都由鄰埠獨得，我哋見證咗鄰埠不少起跌及官府政策的搖擺不定，點解可以連續十四年霸住榜首位置確令人生疑。而報告亦只有兩頁紙去評述小城，始終都流於表面，再加上全都以花旗國角度出發作評審，並非真的十分全球性。但就的確證明小城對於花旗國的企業來說是一個較佳的地方。可惜在環球金融海嘯影響的今天，冇邊個唔知始作俑者正是花旗國本身，而被海嘯影響最深遠的地區，亦全佔榜上的前列位置，咁即係話越上得高，被海嘯影響就越大，所以上榜都未必係好事。因為睇吓花旗神話手起刀落就喺小城炒咗近萬人，如果唔係官府出招保小城人飯碗，分分鐘小城都係重災區其中之一，所以話新年步步高陞，如果明年小城繼續上榜，呢樣就千祈唔好升到咁高。祝大家新年快樂好過！

間接認衰（下）

新打工法實行前，就已經俾打工界別代議事狂插新法只涉及一般打工仔，作為全城最大僱主之官府係唔受規範咁話，即刻俾全城鬧官府只規範小城一般僱主，而官府就可免疫，根本唔止係大細超咁簡單，連僱主界代表都質疑官府冇担帶，只識向勞工界送禮向僱主開刀，自己就唔使上身。當然發炮者包括作為公僕代表之代議士，由佢發表之公僕內部體制，一般人才如夢初醒地發現，公僕內部之管理混亂，官場中的以大欺小，制度上為了政治上的不確定性，有人代位代咗十年八年，而新入職之有能之士，又做咗咁多年都係合同工逐年簽約一次，最慘仲係有人升到一定位置之後就冇得再升，唔係佢能力唔夠，而係制度上佢條路已經升無可升，結果做咗七八年都係同一位置，想表現自己或者係改善現行運作嘅動力都冇埋，咁有乜法子官府近年表現每況愈下，加上早兩年小城經濟火紅，大量有經驗之管理層公僕都去咗大型外資博企，造成人材流失的情況十分嚴重。終於，日前知縣作出批示，規定官府內的編制合約員工之聘用條件不能低於新執行之打工法。叫做安撫一班前線公僕，亦還佢哋一個公道。大家都知道官府係小城最大之僱主，從前亦有人認為打官府工係金飯碗，雖然早兩年外資博企搶走唔少有經驗之中層管理，但係新入職之公僕仍然當公僕係一個十分穩定同埋安全嘅職業，如果公僕之聘用條件竟然俾一般打工仔仲差嘅話，仲邊有人去官府打工？官府權衡輕重之後，由知縣出面為官府補鑊，以挽救公僕內之人心散渙。畢竟任何政府都需要有一個穩定的團隊來執行管治工作，今次以批示形式作規定，除了還公僕一個公道外，亦為之前被炮轟之政策，作出間接認衰，以保團隊之穩定，都不失為一個負責任的態度。

間接認衰（上）

小城最新之打工規矩，由新年依始執行咗差唔多成廿日都有，官方公仔箱每日都播不下數十次廣告，話俾大家聽新例已經生效，有唔明就去搵美猴王老孫問吓，千祈唔好以身試法，終於喺大家唔係好明，又唔係好理嘅情況下，元旦日大部分小型零售店同茶餐廳都唔開工，茶客都冇聲出，唔通要老闆搵埋都唔夠俾伙記咩。但係學老孫話齋，元旦日等假期開工要俾三工，一路以嚟條例都係咁，點解而家班老闆先至話成本貴唔開工？係唔係以前一直都冇俾伙記三工，大家又冇出聲而默許老闆犯法？所以部分顧主以此為理由，向官府投訴新法加大成本，影響小城旅遊形象。咁都俾班老闆搵出條屎橋，小城打工仔有乜法子有好日子過呢！根本呢班識開聲嘅老闆，全部都係擁有數十甚至數百員工之小城中企，就算真係法定公眾假期要俾三工，對佢哋嚟講都係有賺冇賠，只不過係出口術想俾啲壓力官府，想有另外一啲補償咁解，但係似乎影響最大之微企例如茶餐廳等，俾多兩工根本都唔係問題，最大問題都係佢哋根本冇人願做，願做嘅都去晒酒樓或酒店餐廳等可以俾得更高人工嘅地方做，所以資方出口術根本就冇人理會，而茶餐廳唔開舖都係因為人講佢哋就以為真，學人唔開舖，老友，如果認真睇條例，就知道如果唔想俾三工，係可以補番日假俾佢和俾兩工就掂，根本唔使頭痕，老闆聽到大伙咁講，終於呻笨冇睇清條例，又搞到班熟客要周圍搵食。不過話時話，小城庶民都係時候要認真少少對待官府所提出嘅諮詢啦，尤其係手作仔一家大細請咗一兩個伙記嘅舖頭仔，千祈唔好再以為只有自己一家大細做，就唔使理請咗嗰一兩個伙記嘅事，而家係大家都意識到自己嘅權利，再已經唔係幾十年前大家一齊捱世界嘅日子，做乜都應該有規有矩，再唔可以拍拍膊頭就算數。

咁又過咗廿三章（下）

講番廿三章垃圾搞咗咁多大龍鳳出嚟，知縣又想做番場好戲俾阿爺睇留番啲影響力，搞事議員又搬埋鄰埠垃圾師爺出嚟贈興，究竟事件中邊一方先至係大贏家？最大贏家梗係小城僅有少數嘅傳媒，事關廿三章呢個議題被鄰埠煲咗幾年，而且係越煲越大煲到最後連鄰埠知縣腳痛落台都有直接關係，自然牽動全城庶民的關注，新聞紙自然多賣幾張，電子傳媒就可以做多幾個特輯、多幾個專訪，連網上論壇都鬧哄哄各抒己見，係繼道路發癲之後官府又一力作。但係睇小城最賣得之新聞紙，真係睇到你眼火爆，一邊引用他人批評官員用唔夠七年之小城居民身分，自己又刻意標籤垃圾議員為葡裔，其分化小城之心態比官僚更著跡，而唔係佢哋每日頭條都講緊嘅和諧社會。
　至於廿三章輸家係邊個？唔使睇都係學社。一心以為小城會有比較有組織嘅反對聲音，會有比較系統嘅反建議，可以喺傳媒上直接公開，俾庶民睇到乜嘢係有水平嘅反對同埋對社會真正有幫助。可惜事與願違，連最被期待的搞事議員，都竟然只識得搵鄰埠垃圾司爺幫手出頭，有乜法子唔被官府一鋪清袋。學社連同搞事議員今次喺部署上出現咗一個好大嘅錯誤，就係唔知小城內部對鄰埠深層次的反感。大家可能以為回歸後就係一家人應該無分你我，咁就真係太天真太傻啦！連鄰埠都以世界大都會自居啦，唔通你會喜歡被人叫做鄉下仔？雖然某部分係都唔奇，但係你唔會感受到鄰埠嘅好意喺邊度表現緊出嚟，再加上大部分過埠黑工連本地傳媒都睇唔起，今次裁員裁到佢哋返老家瞓街，小城都有唔少人高興佢哋有今日。要搵人幫手出頭，應該搵真正係關心小城嘅人，至可以造福小城，而唔係單靠幾個所謂明星司爺就會有人支持，包括長毛！

咁又過咗廿三章（上）

擾攘咗一排廿三章垃圾終於在垃圾會一審通過，唔理你個人係唔係鍾意，佢都一審過咗，但係對於部分擔心者都係冇計，因為一開始就知根本連一審都唔使就過硬，齋睇垃圾會內之勢力分佈就知道呢個係必然嘅結果。雖然係咁，但係今次官府冇好似其他法案諮詢咁樣求求其其，今次佢哋準備充足，而且投入大量資源，學者專家等組成的智囊團人強馬壯，顯示官府對於廿三章之重視程度去到不容有失的地步。動用到壓倒性優勢硬銷廿三章，無非都係因為鄰埠慘烈例子大家仍然歷歷在目，官府不得不全副武裝由知縣親自掛帥，另備長短棍戰術。由公佈公開諮詢日開始，一口氣在一個星期內連開五場諮詢大會，其中四場全部只招待圍內社團，只有一場係公開諮詢，當中幾百個位連吹雞都唔使，自然有人自動霸位，所以根本唔可能聽到反對聲音，而諮詢期只有一個多月，雖則說時間長短唔係一個大問題，但係面對呢個咁敏感嘅條例，官府之滾水淥腳態度明顯自信不足，亦對庶民愛國心之信任不足，同樣地對於處理鄰埠垃圾師爺入唔到境一事，亦把官府之態度表露無遺。官府態度其實大家都可以理解，但凡一個官府民望低下，要做起事上嚟都係小心翼翼，鬼鬼祟祟希望蒙混過關，因為掌握唔到民情，唔知自己會做錯乜嘢刺激到邊個社群，到時又成班人上街搞到阿爺都睇到眼火爆，咁就真係冇好日子過。不過知縣今次明知山有虎而偏向虎山行，無非都係想喺佢任內表現番些少吉士，唔好等第日任期滿咗之後被全城人當佢透明，保留番少少政治影響力，挽回少少聲望咁解。

監管唔到的字花檔（下）

開放賣賭之初，冇人會估到有咁多花旗集團會睇中小城之賭業，諗住都係鄰埠新貴同埋地頭蟲各爭長短，但係官府取態就係要做大做強，直接到拉城取經，順勢叫埋花旗賭王過嚟開檔，呢一招成功引入咗兩條花旗水魚到小城插旗，只不過官府同花旗賭界之間各自盤算，自然好戲在後頭。正當花旗神話之一年回本於濠江乍現之後，大家窺視之祖國市場自然被強烈的紙醉金迷所吸引，其餘外國小鱷紛紛搵地頭蟲靠碼頭希望攞著數，最後官府才發現自己訂下之條件唔夠清楚，被人將個牌一開二過咗兩棟，至會搞出有未開工先搵八億之天下大荒謬。由於呢個天下大荒謬實在太荒謬，竟然又引到另一班海外傻仔相信小城有金執，紛紛在小城開賭以免執輸，結果係最後連知縣都估到之阿爺出手，限制國民之出入境，冇客到自然搞到花旗佬一時進退失據，再加上海嘯殺到，導致原定發展之項目無限期暫停。面對世紀海嘯企業需要減薪裁員當然無可厚非，不過在博企而言，從一開始就被官府作人手操控，限制持牌機構數量，但係又唔清唔楚地任由持牌人開分店，搞到原本由十間八間之字花檔，一下子暴增到至廿多間，而賭檯數目更突破數千張，個個都想學花旗富豪般，希望能在最短時間內搵夠籌，唔使借錢就可以繼續發展其他項目，自然搏命增加賭檯。官府完全冇管理只要你申請就差唔多一定批你加檯，結果梗係請到成公司都係荷官，稍一不留神市場逆轉，就要炒魷魚以解決過剩之人手。今天就是出現如此局面，令到全城氣氛緊張，要求官府監管博企盈利下仍要減薪裁員是否合理，但係呢樣嘢根本就係官府一開始冇做到好好的風險評估任由博企開檯，造成今天搵自己笨的局面。

監管唔到的字花檔（上）

自從小城開放賣賭之後，對全城各行業各部分都出現唔少嘅衝擊，當中由籌劃發幾多個牌，至今日各牌主力旗艦完成後，卻出現金融海嘯而要裁員的局面。正正表現了世界級的企業大鱷都會因為未能洞悉市場之變化，而令集團整體陷入絕境亦可謂時有發生，看似巨無霸的跨國巨企，世界各地尖子爭相成為一份子，亦可一夜宣佈破產，引致全球金融體制重新定位，人們需要改變概念重估過去的一套是否仍行得通，就等如大家都估唔到雷曼兄弟會摺埋，本地幾大銀行落力推銷之債券一下全部差唔多變晒廢紙，又有鄰埠上市國企竟然擺公司錢走去同銀行對賭結果輸突到要母公司出手相救，但凡種種都印證了現代企業追求利潤的時候，根本就不會計較是否有後遺症、會否出現連火箭專家都計不出的缺陷盲點，引發出全球信貸危機，環球銀行信譽崩壞，連接人與人之間的信任亦薄弱如毛，益發令世人追求自保的心態反映於各個生活環節。大廈管理公司加費小業主開記招反對，鄰埠機場冇行李三個鐘因為公司取消花紅，這類新聞只不過真係小兒科，同海嘯震央之華爾街瞓緊街、小城部分拾荒者之換錢價格急降，都反映了人類追利潤不擇手段之後遺症。同樣地，開放賣賭後之小城博企經歷大量精算之後都係要裁員減薪，擺脫不了大圍經濟的漩渦，一一被巨浪吞噬。乍看之下博企毫無人性只顧保障利益，部分界別代議士炮轟外資博企只顧將錢轉去星洲開展新項目，反而貢獻最多之小城分店，竟然要減薪裁員，仲要即時暫停進行中的新項目工程，搞到淨係外勞都裁咗成萬人，呢樣嘢除咗博企要負最大責任之外，官府亦要為監管賣賭政策之不足負上其中一個最重要嘅責任。