直接受益人(上)

話說有鄰埠「境外媒體」早幾日刊登小幅小城衙差協助老婦推紙皮車上斜坡，文題刻薄抵死，引發小城網民群起留言反擊，其中一張實物照片更被瘋傳分享近二千次。呢份二百字多些少嘅所謂圖片說明加短文，明顯借用小城衙差故事，反諷鄰埠紀律部隊早就淪為權貴「食蕉」，要為防止令領導難堪而作出種種「保安部署」。呢種報道方式鄰埠媒體屢試不爽，本身只係一種文體嘅表現，早期只會出現喺「風月版」之流嘅地區，目的都只不過係為咗吸引部分無聊貪過癮又夠市井人士，令到份報紙多些少吸引力。只係近年唔知點解，呢類文體嘅寫作方式逐漸變成主流之一，走向主聞版面。但係呢類市井反諷嘅報道或者係文體，其實都有好多唔同層次，利益申報「本欄都係其中之一」。層次高低直接影響寫手可以有幾耐壽命，而且仲好快見效。當然就算高手都會有失手嘅時候，行內享負盛名嘅陶傑亦曾於早年涉及小城言論而自招麻煩，當然佢老兄唔介意得罪幾多人，只要有市場可以繼續寫落去，話知你菲律賓唔俾佢入境都係咁話。但係新聞自由都有自由原則，要點寫無人阻你，但係公布於世上就要有一定規矩，就係要寫個事實出嚟。而偏偏呢段小小嘅圖片說明，就有圖文並茂，大家想點解讀都得。結果呢段嘢引嚟鄰埠同小城兩批網民互相指罵，中間又涉及兩地之間嘅不平等同埋歧視等問題。當然其中不乏撩事鬥非之徒，口水大戰一觸即發。但係大部分有中文基礎兼廣東話有一定水平，都唔難理解文章中嘅主要含意，只係大家都各有立場之下，先至會為咗部分細眉細眼嘅事有爭拗，兩地網民果然精力無窮，但直接益咗呢份無乜人理嘅報紙。

末日死線（下）

早前花旗國發生駭人聽聞嘅小學校園槍擊事件，死傷廿多人而且大部分都係小學生。事件令世界震驚，各地都有民眾甚至政府為死傷者追悼。大家都將焦點，放喺花旗國嗰種過時兼老套、等如無王管嘅槍械法，亦有好多評論認為，就算花旗統帥要加強監管槍械，遇著大把錢嘅軍火商應該都無能為力。但係好多人都無諗過點解行兇者會咁暴力血腥，只係一句條友「黐線口架」就算數。同樣地國內亦發生「狂徒幼稚園斬人」案，由於未有人死，媒體直頭無報道。兩宗涉及「瘋狂殺人」嘅事件同時發生，大家可以想像今日人類嘅精神病經已十分普遍。而回歸日前小城亦發生一宗十五歲少年被群毆至死嘅案件，更加令人覺得現世對人命越嚟越輕視。由花旗小學大屠殺事件起計，行兇者孤僻自閉，由嗜槍母親教導使用槍械，結果第一個解決母親然後自殺。到國內斬人狂徒砍傷廿多個小學生案件，由於被封鎖消息，媒體無法跟進以至行兇者動機成謎。但係小城呢單由衙差公布案情，就知道只不過因小事一樁，引發一幫人群毆一青年至死。以上事件反映到越嚟越多人選擇用暴力去解決問題，而且武器越精良死得人仲多。青少年如是、成年人如是、種族如是、國家如是。人類文明發展到今日依然發生濫殺無辜嘅事件，所謂嘅文明進步，睇嚟都係自己騙自己，又或者係用嚟騙其他人。就算瑪雅曆計錯數「末日」未到，人類若果係咁發展落去，日日都係末日。

末日死線（上）

執筆之日係所謂嘅「世界末日」，公仔箱近排日日報道末日傻瓜嘅瘋狂應對方式，唔信嘅人個個睇住笑到反晒肚，至於信嘅人早就唔喺大家身邊，因為全體去晒避難避劫。不過呢份稿能夠見到報俾大家睇到，梗係證實咗末日唔係咁樣嘅。不過「末日論」帶俾大家一個好重要嘅啟示，就係乜嘢都有限期，就算人哋點樣俾機會你，最後都係會有「死線」，大家唔再對你嘅錯做乜嘢，最後都係會自取滅亡。正如小城回歸日就喺呢個「末日」前一日，自己人話事咗十三年，同大家祈望嘅「自己人當家作主」有幾大出入呢？過去小城一直都無乜發展，就算發展都係無遠見秩序咁求其見搵到錢就算嘅短視發展。不過點都好，至少未試過廿年未夠嘅樓會突然變危樓、公家地突然被「私有化」、一次過批走十幅「永久墓地」、更加唔會有每逢大節都有遊行嘅事件發生。回歸前百業待興嘅小城，庶民原本期待回歸之後，就算唔豐衣足食，至少都唔會好似以前咁日日面對官府嘅不公義、西洋人橫行無忌、貪贓枉法無法無天嘅「公務員」。但係過往十二年小城就算經濟點樣起飛、「生產總值」點樣超英趕美，官府作為同西洋政府基本無乜分別，只係法律開始有中文版，不過依然係庶民睇唔明嘅中文。至於近年嘅年年派錢，官府又有無問過庶民唔派錢啲錢點使好呢？回歸後官民嘅溝通機制失效，令到官民對立負面情緒增加、庶民生活壓力大增，加上官府只開放咗小城經濟，但係又唔適時將法律法規同步跟進，反而更加製造機會引誘官員犯案，以至造成「走資司長」嘅發生。喺末日死線過後並唔等於過咗海就神仙，官府若然仲未肯撥亂反正，真係嘅「末日死線」還在前面。

只有更恐怖（下）

其實黑道人物出獄無乜咁特別可怕，有足夠規範同監察，絕對可以防範。反而早前小城一哥喺議士堂上發表嘅言論，足以令小城庶民人心惶惶。事實上黑道世界亦有佢哋嘅行為準則，成王敗寇各安天命至少都有路可捉，佢哋並唔係瘋人院走出嚟嘅。但係一哥喺議事堂同大家講「你要我嚴格執法都得，但係你哋要諗清楚，到時官府無錢派唔好賴我喎！」呢套言論直頭比大佬更加大佬，更具江湖味。庶民一聽到即刻心都寒晒。梗係啦！庶民一般都諗住衙差係會保護庶民，正常情況下有事都會搵衙差求助。但係一哥就話俾大家聽我哋執法好有彈性口架，可以按情況需要鬆緊有序咁執法。所以硬性執法後有乜差池，大家唔好怪我。
　另一個就係，庶民一直以為官府係因為「賣賭」賺突咗，我哋至有錢分。但係而家一哥嘅講法係，都係多得我識得咁樣鬆緊有序地執法，你哋至有得年年收官府咁多錢。庶民都係第一次知道，原來鬆手執法可以直接影響經濟表現，咁睇嚟外國經常公布嘅乜嘢領先經濟指標，將來要加入衙差執法指數做類比統計先至夠準確。然而最恐怖嘅莫過於一哥喺議事堂發表完之後，竟然無代議士出聲反駁，亦未有團體出嚟表達不滿。莫非大家都認同咗呢個係經濟背後嘅力量之一？所以官場黑道化係更加令人擔心，事關黑道人物會話俾你知佢嘅身分，等大家有得防範。但係當官場中人……呢樣至係更恐怖！

等睇戲心態（上）

江湖大佬出獄，搞到「全城戒備」，不過此城不同彼城，並唔係講緊庶民身處嘅小城，而係鄰埠。事實上小城媒體本身報道並無太大反應，一直都係官式報道人講乜佢講乜。相反當年曾經叱咤一時、隻手遮天嘅江湖老大喺鄰埠人心目中，依然係反社會反建制嘅英雄人物。對於鄰埠唔少人近年不斷被大財團、權貴等欺壓以至壓力爆煲，反而對呢類黑勢力反社會嘅江湖大佬尤其嚮往，況且江湖人物唔係存在於自己地方，而係一水之隔嘅鄰埠，自然更加覺盞鬼。鄰埠近年經歷幾朝換代，發展停滯不前而且越做越差，主政者更加係無「吉士」搞到貧富差距越嚟越大。而過往鄰埠一直視小城為自己後花園，概因小城只能以賣賭為生，其他發展又唔生性，基於喺無得揀嘅情況下，唯有將部分連帶嘅「不規則附加行業」都一併接收「啃埋佢」，結果造成喺鄰埠人心目中，小城只不過等於另一個油尖旺，不過就「無王管」。但係自從京城開放自由行，而小城又積極配合搞「開放賣賭」，經濟發展一日千里下，兩城庶民收入差距縮窄，令到曾經財大氣粗之鄰埠人以為仲有一個地方可以俾佢哋發洩下。可惜嘅係兩城早就一同面對財大氣粗嘅「煲冬瓜」，根本就無暇照顧自己友嘅感受。因為過往嘅腥風血雨直頭同電視劇一樣，鄰埠唔少人諗住大佬出嚟，可以有機會睇埋下集大結局，結果引發鄰埠採訪陣大軍壓境，採訪大佬出獄過程。不過開放帶嚟賭業運作規範化，過往嘅不規則逐漸被取代，「江湖大佬」呢類經營模式，早就被集團運作等現代管理模式所取代。要期待江湖大佬出嚟再搞多套劇俾大家睇，應該都唔容易了。

笑死無命賠（下）

發現小城變身為「全國最安全城市」嘅研究會，仲有其他最乜最物榜。其中好笑又好玩嘅分別有「全國世界級大都市榜」、「國際化城市排行榜」及「十大租房最貴排行榜」等。其中「國際化城市排行榜」上小城位列梗頸四，排名於鄰埠、上海同京城之後，但係又比深圳、省城同蘇杭等城市前，莫非報告以為有幾間外資字花檔喺度搵食，小城就變得好「國際化」？最得意嘅係同一個研究會嘅另一排行榜「全國世界級大都市榜」上，只有四個城市上榜：鄰埠、上海、京城同埋寶島，小城並未有上榜。得意者乃係唔明點解足夠「國際化」但係又唔夠「世界級」，而足夠「世界級」嘅寶島，點解又唔能夠喺「國際化」榜上出現呢？呢啲咁自相矛盾嘅排行榜，根本就完全唔知佢哋點樣搵數字、提準則。況且仲有一個好出奇嘅榜係叫做「十大租房最貴城市排行榜」，榜上竟然連出名全球最貴租金其中之一嘅鄰埠，都唔喺榜上面。而且榜上詳列十大貴租城市之平均租金（我估係平均數），排首位之上海一居要五千一百四十三元、三居要七千三百三十四元，而單間則要一千三百元。當然上海作為全國重點吸引外資嘅城市，要收到咁嘅價錢都係好正常。但係睇番「包尾」嘅重慶，一居一千三百元三居要三千元，單間只係九百五十元。以上數字相對於鄰埠，單單係板間劏房都要三四千元一個月嘅情況，直頭係小巫見大巫。但係鄰埠十大不入，而報告亦都無講到個評審準則係點，其報告嘅量度標準同科學性有幾強大家心中有數。事實上每年都有唔少公布出嚟得啖笑嘅報告，都係為咗討好當權者而死作爛作，最出名嘅莫過如鄰埠「花旗商會」，今年直頭列鄰埠為「全球最宜居」城市，結果梗係笑死無命賠。

有排都未入流（上）

內地某研究會最新發表今年城市競爭力報告，小城竟然被評為「全國最安全城市」。呢份騎呢報告係以全年無重大事故、社會治安、投資環境、消費品安全等方向，嚟去評定何謂「安全」，所以小城就「榮登安全城市」第一位。本來作為小城庶民一份子，好應該高興有呢個「榮譽」，但所有相識之中無不對呢個「榮譽」不敢苟同。當然，過去一年小城真係無海難撞機、水災大火等重大意外。但係就差唔多每日都見到有人偷籌碼、放數禁錮、毒品飯堂、抓手慣犯、甚至有傳國安人員到小城，拘捕及調查內地落馬高官與小城疊碼嘅事件發生，作為庶民係好難認同報告嘅睇法。不過若果計有無重大災難死人多唔多，咁又的確係無發生嘅。可惜嘅係無死人唔等於無塌樓，淨係善豐同鉅富兩個「花園」瞬間變成危樓，幾百人生活受影響，大家就覺得「蓮花寶地」呢個稱號根本就係一個神話。
　不過大家若果對該報告過分熱心的話，最終只會發現都係得啖笑。事關排第二位嘅城市竟然係深圳，的確係另一個笑話。眾所周知，全國聲名遠播嘅「二奶村」首發就係深圳，加上早前保釣事件中被人惡意破壞嘅警車，都係發生喺深圳。好明顯大家對「安全」嘅概念同報告嘅出發點有好大落差。報告中只有簡單一句「社會治安良好」，係相對同大家嘅安全概念有關，其他「生產事故少發」、生態可持續發展等，都唔係大家認為會影響「安全」嘅指標。所謂「最安全城市」喺大家心目中，只有係「最安心旅遊」先至可以評為「最安全城市」。以呢個目標嚟講小城肯定有排都未入流。

「官府黑道化」（下）

圖片來源：力報
鄰埠知縣「黑道化」，小城呢邊亦不遑多讓，適逢每年一度嘅施政報告又出台，負責保安之「食蕉屍長」又上到垃圾會上「推介」來年保安方針。
　好不幸地「食蕉屍長」喺答覆議員們提出「逾期逗留如何處理」嘅質詢時，透露咗「食蕉屍長」對保安同執法嘅概念有乜玄機。司長如是說：「我哋有能力打擊逾期逗留情況，亦可以好強力咁打擊，不過先要大家有共識至得。若果嚴格執行，影響咗大家現金分享，咁樣點算呢？」就呢段發言大家嘗試吓解讀佢背後嘅理念係點。第一：司長呢個位只係一份職業，打份工啫，大家有乜意見我咪點樣做囉。按道理無錯喎，不過如果庶民覺得自己係老闆的話，你又會唔會出糧俾佢呢？第二：司長覺得逾期逗留人士帶動小城經濟嘅能力，可以去到足以影響庶民每年之現金分享。言則喺司長角度庶民之所以有每年現金分享，都要多得司長之執法唔嚴。但係從庶民角度睇逾期逗留者引發嘅黑工問題、黑勢力入侵、非法賣淫甚至連帶非法旅館等，都係影響緊庶民日常生活。第三：司長覺得權喺佢手中，自然可以選擇執法嚴唔嚴，亦即係「有價講」。而呢種選擇性執法嘅態度，大家喺一般前線執法者身上眼見唔少，但係咁堂而皇之地由司長個口講出嚟，仲要當住咁多立法議員面前回答議員嘅質詢，好明顯係完全當喺議事廳內嘅議員、電視機前面嘅庶民無到。大家對執法人員都有合理認知，認為佢哋應該「保護市民、維護法紀」。可惜今次司長話咗俾大家聽，執唔執法係佢話事，若果大家要有現金分享，就唔好要求佢哋嚴格執法。似乎「官府黑道化」比鄰埠更加嚴重，事關大家要唔要現金分享都「屈咗入你袋」，「屍長」至會用「錢你哋就收咗喇，唔好咁多嘢講」嘅態度嚟回應。

預咗要還?（上）

鄰埠擾攘多時嘅「知縣消失的密室」事件，最近越演越烈。一直被質疑「誠信」問題嘅知縣左閃右避咁耐，卒之等到法庭處理晒所有相關問題後，開始將大家所「關心」嘅問題，嚟個「開誠布公」，諗住拆掂佢之後就一天光晒。只可惜人算不如天算，喺各路人馬虎視眈眈之下，密室破綻一一現形。但係睇住呢位「政壇大蠱惑」嘅解拆過程，大家都唔能夠唔佩服佢嘅「語言偽術」。由佢一路「唔知道」、「唔清楚」，去到「唔記得」之後，更上一層嘅就係「唔存在」。最精彩嘅係由佢超能低Ｂ咁否認話自己唔記得，到不認還需認時改口以為「唔存在」，中間係可以有好多想像空間嘅。而佢最精彩嘅「處理方法」就係將「處理咗」就等於「唔存在」咁連結埋一齊，等於毒品拆家喺緝毒人員趕到之前，將所有白粉沖落屎坑呢啲為之叫做「處理咗」。又或者係學五億神探咁喺老廉到場前，將貪污得嚟嘅錢燒咗佢就係「處理咗」，十足十黑社會嘅處理方式。但係若果咁樣都算「唔存在誠信」問題，咁又點樣界定「誠信」呢樣嘢呢？就算佢點樣「開誠」都只係「布俾阿公聽」而唔係報俾鄰埠庶民聽，咁其實並唔存在「開誠」呢樣嘢。而且「戰狼」由參選到上任至今嘅表現，實在係一個好好嘅負面教材，等小城官員見識吓拆彈最差效果可以去到邊。當然事態依然發展緊，結局如何（或者可能無結局），大家依然要放長雙眼。但係走得甩一次都唔代表一世夠運，往後施政必定舉步為艱。正所謂出得嚟行預咗要還。

垂簾聽政！（下）

圖片來源：力報
話時話管家婆早就升「呢」成為大太監，但係好早就知道花無百日紅，亦都明白官場無真愛嘅道理，所以喺未上任之初早就趁改朝換代扮無人識時，早早刮定十幅風水山地，用嚟送禮做人情又好、幫自己家宅風水又好，總之有著數就刮咗先算。問題係當佢以為日後將會隻手遮天、無人夠膽踢爆佢嘅時候，竟然咁唔好彩有人「執到」相關文件，就咁樣一件件又爛又臭嘅黑幕繼續喺小城上演。當然風水山地可以幾有價值，大家都估唔到，反正買唔到就係無價，等同以往嘅的士永久牌一樣。不過單嘢爆咗出嚟咁耐，大太監一直努力咁劃清界線都無用，因為塊風水地直頭好風水到拍住「皇陵」，縱使庶民有得鬧無佢符，但至少都應該有天子可以干涉吓，何解有「奴才」可以葬喺「龍穴」附近？就算有比佢更熟律法，更清楚官場玩法嘅人「執到」佢嘅文件，暫時都仲未能令佢入罪，更加唔好講話改變官場氣候。原本「走資司長」一案之後，官府同知縣都表示要痛改前非重新做官，但係庶民更清楚嘅係「講就天下無敵」。問題係而家成個官府早就被「大太監團伙」所佔有，加上官場商界勾結，形成新世代「和坤」集團，連加人工招攬更多新晉殭屍死士，就連京城欽差大臣都無佢哋符。到最後連欽差都實行「上有政策下有對策」，「大太監」亦都穩步上升，所以到咗今時今日就算有乜嘢大內密探想套佢料，根本都起唔到乜嘢作用。好明顯「大太監」今日經已去到另一境界，直情由「奴才」變咗做「主子」，升到有本事「垂簾聽政」，若果唔係咁，點解兩代知縣都無佢符唔炒佢呢？

大太監（上）

知縣交完功課後，終於輪到管家婆上場。佢作為公墓園之首，行政同立法都關佢事，官場內政全部佢一個人負責，唔搵佢出黎交代一下，莫非真係唔駛做咩！按照官位輪隊，管家婆自然應該係一人之下，照牌面計就連負責出糧個大掌櫃，都要問下管家婆我地有冇得加人工。今年都經已係回歸十三年，數民望最低（若果真係有的話），管家婆肯定排頭位。作為大內總管既佢早就經已被批評行政效率低下、法律改革滯後直情係歷史檔案館，就連大西洋國司法官員都要造訪小城，研究番佢地套法律以前係點樣用、現在又點至用得倒。呢套笑料直頭好睇過鄰埠笑匠最新個套大話西遊，事關呢套用左全城幾百個億去「打造」，歷時十三年都未拍攝完，結局係點就更加冇人知，仲唔係史詩式鉅著！當然，有人會話阿盲俠大導套「一袋終屍」夠拍左十年都未見影拉。不過庶民就只會柴九上身問番句「人生有幾多個十年？你仲要我等幾耐呀！？」。大概阿大內總管仍然以為特區或者佢自己仲係好年青、依然咁年少無知繼續「天與地」？其實經已講到好白「The City is Dying」，搞到小城今時今日咁既田地 呢班庸官仲想阻住個地球轉幾耐？但係睇番小城官府架構規定，除非有人夠膽學北極熊國咁改制，流一屆後再上黎選，先至會有太上皇既出現，否則知縣最多只能連任兩屆，反而一眾庸官經歷幾多屆都冇問題，十三年歷任兩屆知縣，就連以前班西洋高官今日係「天涯海角」，都仲諗緊如果有機會繼續係小城當官你話幾好呢！最好梗係做到「大太監」添啦，皇帝做死佢都仲未死！

點樣至係幫長者？（下）

按照官府新一年豪俾長者嘅金額，總共將花費廿多億。另加係人都有得分嘅派錢以及種種福利，就得出咗約百二億呢條數。本來官府豪得起，庶民應該驕傲，只可惜嘅係大家都知道，官府並唔係因為識做生意，至做到有錢派返俾庶民。而係透過唔少黑箱作業將小城珍貴資源出賣後，先至小恩小惠咁漏返些少出嚟，希望庶民唔好咁多嘢講。有人就計過官府若果能善用資源合理批給賣地，庶民應該可分得廿多萬而唔係六千八千。但係就算官府一次過將所有嘅錢分晒佢，都唔能夠保障庶民日後能安享晚年。官府今次豪俾長者只不過係想用錢解決應負嘅責任，派錢俾長者叫長者食自己，對於小城未來人口老化下醫護不足、設施缺乏、專科不濟等情況視若無睹。本來官府豪俾長者係無可厚非，但係當長者要管住自己啲錢嘅能力都有問題時，官府又有無幫佢哋做過啲乜呢？官府今次豪俾長者係基於長者能夠獨立自決，但係從來都無諗過培養同壯大護理團隊，去應付未來護理人員不足嘅問題，亦未有對未來老齡化社會問題提出一個解決嘅方向或者辦法。若以今日庫房水浸嘅情況下，官府絕對有能力制訂長久老人醫護保障政策，好等未來長者能夠真正安享晚年。出現老齡化社會的國家或地區比比皆是，發達地區較完善同成功嘅例子亦唔少，將成功經驗加以改善套用於小城，總好過將錢直接交予長者而又唔提供適當嘅設施同人員去協助長者，同俾錢佢哋叫佢哋自生自滅無乜分別，只會製造出更多祈福黨跌錢黨，甚至可能出現外國為錢而謀害年邁雙親嘅事件。

養到幾耐？（上）

本週大事又係知縣一年一度交功課，預告出年大家有無錢分。一如所料官府將會繼續派錢，仲要加碼搞大佢。單係明年派錢就預計派走差唔多百二億，都係套用大多數庶民習慣嗰句，無人會嫌錢腥所以派錢一定無人強烈反對。原本想套用某代議士經常講開嗰句「人傻錢多」，不過如今睇落似乎經已過時。事關派錢派咗咁多年，斷估傻嘅都會變返精叻啲，今年措施唔單止延續仲要加碼，好明顯係經深思熟慮後至推出。派成百二億咁重手無非都係要大家出少句聲，好等官府保留返些少顏面向京城有所交代。今次百二億中受惠最大嘅係銀髮一族，官府將養老金狂加一半去到每月三千，另加每年六千六嘅敬老金，合計出年合資格耆英每人有成接近六萬銀收。對於官府咁大手筆送禮，一眾公公婆婆衛道之士、甚至民生代議士都無嘢可講。試諗吓邊個夠膽大聲講官府加錢幫你養老人家係唔好呢？加錢幫手養老固然無乜唔好，問題係可以養到幾耐。小城大部分打工仔都無乜點納稅，而社保由僱員同僱主合共只需每月供四十五元咁大把，到老咗退休之後竟然可以出成三千蚊糧，當中官府要補貼幾多唔使計都知，而且小城即將面對老年化社會呢個全世界都逃避唔到嘅問題，喺呢幾年經濟好嘅時候不斷提高長者福利，到將來一個年青人要供養兩個長者嘅時候，官府又去邊度搵錢嚟補貼呢？而且花無百日紅呢個道理經已係人都識，喺有能力有時間嘅情況下，係唔係首先應該強化完善制度，加強儲備以應日後所需，呢個先至係負責任官府應該要做嘅嘢。

搵鬼信

圖片來源：澳門日報
又到一年一度大賽車，每年塞車年年如是，今年交通部又出口術，話小城機動車有成廿一萬，大賽車期間小城交通不容樂觀，呼籲庶民盡量搭巴士。但係一舊雲局長今時今日都係坐緊公司車上落班，最多係早兩年去過關閘底，嘗試感受吓庶民喺煉獄下等巴士嘅狀況如何。要佢理解今時今日搭巴士有幾難，肯定唔使旨意。查實庶民經歷幾廿年大賽車嘅「煎熬」，早就練到一身好武功去應對。例如私家車接駁電單車、電召的士玩合車、又或者係同老闆協定提前或延遲上落班等，種種措施都係為咗「配合」小城一年一度「盛事」。反而係交通當局年年都推出不同措施，以為自己喺度改善緊大賽車期間嘅交通亂象，其實係不斷挑戰庶民耐性。因為每年到呢個日子前後，都會因為道路工程而引致大塞車，庶民早就習慣接受逐步增加的塞車壓力，到封路正日唔少人直情以步行取代扌查車同搭車，反正大不了都係四日時間需要步行上落班。但係當局對交通改道等安排就個個星期都變緊，今日明明行得通條路下午就被人封咗。大家若果有用智能電話下載過官方推出之「鴨舌」，就可以好簡單咁統計到，官方差唔多每個星期都有十次八次嘅交通改道，或者係巴士站點更改位置嘅安排。對於庶民嘅日常出行之影響，比大賽車更加大。官府若果想將交通擠塞歸究於大賽車，不如自己反省吓點解無好好咁安排小城交通規劃。路段掘咗唔夠三個月就再掘起，呢樣嘢庶民都講咗二三十年，到今時今日都無改善過。交通安排就往往話試驗推行，睇吓成效如何至再作決定。反而西灣橋鐵馬專道就一試就試到依家，從未有諗過試埋其他兩條橋，咁樣搵鬼信你咩！

好想炒咗佢

查數部每隔幾年都會搵唔同部門出嚟查吓數，睇吓大家有無亂使錢。適逢其會今年又輪到學堂部，又引起咗大家上次「幾千蚊買個垃圾筒」嘅不快記憶。所以今次查數部都好精，唔好話大家齋講無憑，每次問學堂部攞料都問得清清楚楚，確認咗對方真係以一個內部標準，嚟評定審批嘅課計資格。然之後先至出份報告，話俾大家聽學堂部喺呢次科水資助中毫無準則亂咁批給。不過大家都睇到，學堂部就查數部公開報告之後，即時駁斥查數部唔理解其運作，「誤解」咗學堂部嘅審批流程，而學堂部長更加大大聲咁話根本就無億幾咁多，最多都係得二千幾萬，質疑查數部分報告嘅理據。學堂部今次忽然咁高調咁推翻查數部分報告，搞到坊間今次真係以為查數部「老屈」咗學堂部，搞到查數部罕有咁發出新聞稿，直斥學堂部先至係「老屈」查數部。
查數部雖未至於係「大掌櫃」，但係叫得做查數部就係要大家小心用錢，但係每次當查數部出報告，就一定有部門受批評，分別只係有幾嚴重咁解。好明顯學堂部今次錯漏係十分嚴重，事關查數部早就問清問楚至出報告，反而學堂部喺出咗報告之後，先至改口話唔係，仲衰過細路仔被人發覺無做家課之後賴老師無講清楚。
大家若有接觸過學堂部都知道，呢班官員根本就同現實社會脫節，使錢都唔會簽番份報價話你知佢會買你個服務，咁又何來知道邊個負責呢份使費呢？口講無憑係商業社會上嘅共識，大家都明白學堂部都十分清楚呢個責任重大，所以更加唔會簽番俾你，因為若果日後有乜差錯，最多全個學堂部一齊上身，到時就有好似隔籬埠師奶議員咁大大聲講「使唔使炒咗佢呀！」。但係庶民就真係好想炒咗佢囉，因為有社團直情向檢察當局投訴，要求徹查學堂部亂批課程同埋亂講大話。

長者無得發展（下）

圖片來源：力報
講起殯儀業，小城到而家都仲未有一個火葬場，反而官府有為寵物提供火葬服務，真係人不如狗。小城今日有成五十多萬人口，每年有千多兩千人死亡，等於平均每日有四人需要火化服務，看似唔多但實際按照官府對未來人口預測，小城即將進入老年化社會，到時候火葬服務需求將更加大。五十多萬人口城市都未有一個火葬場，相對於日本，單單一個茨城縣只不過不足三百萬人，就有多達三十個公私營火葬場，唔好同我講兩地經濟實力不同，無錯小城官府呢十年八年賺賺埋埋咁多錢，彈藥充足，與經歷完大地震同海嘯，百廢待興嘅茨城縣根本就無得比。火葬場作為一個城市嘅必需設備，官府到現在都無計劃、甚至無意欲設立一個，以方便庶民進行白事。過去甚至因為火化後骨灰運回小城的手續及檢疫程序太繁複，家屬被迫將先人骨灰安放於國內的骨灰場，結果每年都要被迫「回國祭祖」而唔係回鄉祭祖，搞到家屬同先人兩頭都唔到岸。講到尾都係為咗維持一班固有利益者繼續搵食。靈堂係咁火葬服務係咁，官府一直唔理會庶民身故安排嘅需求，任由固有得益都繼續發小城嘅死人財。由此可發現官府根本就唔想將小城打造成一個可以令大家安享晚年嘅地方，反而不斷美其名「環境更佳」嘅借口，研究派發資源將老人設施搬到國內，目的只係為咗將曾經為小城發展付出唔少嘅長者掉埋一邊，好等小城能夠有更多地方建賭場酒店，盡量減低官府要對長者負擔嘅必然責任。只容許青壯年人於小城勞動服侍富豪賭客，咁樣小城至「有得發展」。

如何處理？（上）

最近一家開業近百年之殯儀服務公司，於店前張掛大字報，控訴遭壟斷殯儀業，只容部分經營者租用靈堂。過去由於小城經濟規模細，唔容易引入市場競爭，尤其係部分專業及回報較慢、需要長遠投資回報嘅項目。例如水電煤等民生必需但又投資龐大，回報極慢的項目。另外部分高端項目好似地區域名、專線通訊服務等，過往都只能以專營方式，批給予一至兩家有經驗或有技術、甚至只有財力能夠維持三五七年後才有正式回報嘅公司，進行其服務批給。但係時移勢易，現今小城每年接待兩千多萬遊客，而新近發表嘅未來人口預測，小城將會有總數近八十萬人口，喺呢個唔多唔少嘅人口城市，其實早就足夠養活企業經營兼夾引入競爭。但係官府依然維持「傳統」，唔單止無開放競爭，反而更加製造專營壟斷。小城多項現代城市必備的項目例如自來水及電力，早年由國營轉專營，一直都維持單一壟斷局面，若果話小城地方細，自來水管網難較引入競爭都尚可講得通，但係電網相對現今技術，要引入競爭簡直易如反掌。單講這次殯儀業的壟斷情況，靈堂只有一家多年沿用至今，由醫院去世至靈堂租用，再到入殮出殯下葬，全部都由同一家包辦。相差者只有中間大家係搵法師、和尚定係牧師主教嚟主持。小城甚至連一個火葬設備都無，每當有白事家人都要千里迢迢到珠海搵火葬場對先人進行火化。今日小城的兩千多萬遊客中，亦有唔少海外不同國籍人士，一個唔覺意發生意外，外籍人士需要進行火化，其家屬除咗要辦理多項手續，更要特別辦理進出中國的簽證，雙方有邦交都還好，萬一兩國交惡無簽證辦，官府如何處理？

求多福（下）

「桃花崗」事件令人懷疑小城嘅所謂「司法系統」，究竟有無真正咁保障咗庶民嘅私有權呢？雖然話任何系統都有漏洞，但係呢次個漏洞都已經唔只係漏洞咁簡單，直頭係司法缺陷。而且就連執法機關都發現唔到呢個缺陷，一直向攤販們進行實質管理。最諷刺嘅係「桃花崗」內從來都無固定永久性建築物，幾廿年來攤販一直遵從「大牌檔」守則「朝行晚拆」，做完生意就將阻街物品收好同埋清理乾淨，官府管理自然就唔會將該處當作係私人商場內嘅一般商號咁樣去管理。而法院呢次嘅判決同執行，直情顛覆咗庶民一直對私有權嘅定義同認知。而實體管治機構嘅官方，除咗係收到執行人告知成為私有地之後就停止發牌。過程中間唔單止無對自己部門過去幾廿年嘅管治進行抗辯，亦無向法庭進行查詢了解事件，反正法院判咗大家仲可以做少啲。
而事件當中其中一個能夠發揮積極作用嘅團體「街坊會」，今次不單連人影都未見過，甚至連攤販尋求協助、媒體搵議員發表意見同睇法，都只係搵民主派同工會派議員。反而最有資格為民請命、自我表現同獲得認同嘅「街坊會」，連日嚟缺席大小媒體及相關活動。事關「街坊會」作為各分區都有支會嘅團體，對於各區民生同社區設施應該瞭如指掌，加上多年同區出入甚至係左鄰右舍，相關圖片資料同歷史因由都應該甚為充足，甚至團體內之老街坊都可以單憑口述，就可以講到整個「桃花崗」發展歷程。對於兩個最有力嘅官民機構都不作為，「桃花崗」商販們今次只有自求多福，希望社會其他人士能夠幫到佢哋，還攤販們一個公道，挽救庶民對司法系統的信心。

總之唔合理（上）

桃花崗事件至今疑團多多，唔少人質疑其「和平佔有」之文件，但係最終唔知點解又被佢哋過到關而得出今日之惡果。問題之複雜性其實並唔係一般人可以容易理解，事關好多人都指出庶民習慣信服法院判決，只要手執法律文件，大家都認為合法合理。不過今次問題就算合法，都唔合情唔合理。而且事件更首次向庶民展示所謂嘅本地法律，係可以幾唔符合人性同唔合理據。唔好講話大家咁多年都唔知「桃花崗」係公地定係私地，純粹講市民認知，官府咁多年嚟依然沿用公地準則嚟向上址攤販納牌徵稅，完全毫無蹟象顯示「桃花崗」係私地。相反「發展商」則聲稱曾向當地商販收取租金，又表示曾寄存建築物料，以向法院當局證實「發展商」擁有實際管理權。好可惜嘅係民間一直都無相關認知同實質證據，整個「和平佔有」過程只係由「發展商」同「法院」幾個人決定咗就完成，對於當地經營多年之攤販、一直出入開嘅街坊，甚至多年以來幫襯開的茶客們，完完全全被蒙在鼓裡。庶民有咁嘅反應正正就係因為上址根本就唔具有「被實質管理」嘅現實，再加上法院處理整個判決程序時，一直都無傳召過相關利害人作陳述，而判決之後亦唔覺有喺上址範圍內張貼公告。不過坦白講就算有張貼公告，話唔定張公告只係有「西洋文」、又或者係唔讀番三五七年法學院都睇唔明嘅所謂中文。反正而家唔理司法機關點樣講，唔聲唔聲話你用開幾廿年嘅地方其實係第二個人所擁有，就係唔合理

有機可乘

過去幾十年朝西洋人無為而治，只會記住收錢走佬。但係估唔到祖國同洋人傾條款還地時，竟然傾啲唔傾啲完全無標準，將所有政策同重要法律條文安排由一小部分人傾掂數，之後先至再話俾庶民知道。結果當小城經濟開始發力所有嘢都有價有市嘅時候，就會有好多人出蠱惑乘機搏懵。而官府近年的亂作為與不作為今日終於全面報應。例如近日小城接連爆出直接影響民生問題事件，包括歷史久遠嘅九澳村清地、義字五街小販攤檔問題，都係挑戰緊小城「私有權」呢個概念。最近新增嘅「桃花崗」事件就係小城瘋狂又一例。
　眾所周知位於紅街市嘅「桃花崗」早於四五十年前就存在，比起「義字五街」，「桃花崗」更多一份小城過去人情味，事關該處以「街邊大排檔」大集匯見稱，各類麵檔、咖啡檔、傳統餅家、油條粥品、甚至毛巾被鋪同衣履鞋襪都有得賣，由於臨近街市，當然唔少得有瓜菜等蔬果小販檔擺賣。能夠聚集咁多唔同類型嘅攤販一齊擺賣，原因係圍繞紅街市一帶曾經係小城嘅工業重地，過往由造船修船廠、到紡織製衣業、蝦欄、電子廠、樟木櫃等多種行業並存，令到上址每日出入的人數多不勝數，「桃花崗」幾十年嚟一直見證住小城曾經風光過的工業同製造業。而今次發展商所聲稱透過法律途徑「和平佔有」「桃花崗」一事。明顯有人因為熟知法律，利用法律漏洞「成功佔有」一個廣大市民集體回憶嘅土地。庶民唔識法律，自然可以俾商人成功偷雞，就等如曾經有法院秘書，因為熟知法律，竟然可以霸佔人地車位一樣，就係睇到個停車場嘅法律手續唔完善有機可乘，先至會發生呢類事件。

兩地青年無得比（下）

事有湊巧，鄰埠學生運動如火如荼之際，小城又碰巧官府開展「青年政策諮詢」，收集之意見好可能影響未來七年小城官府對青年嘅政策。首階段嘅兩場諮詢會經已謝幕，但係議題碰巧鄰埠中學生運動熱炒中，庶民自不然會將兩地青年質素作比拼。不過兩地青年一拍埋一齊，小城庶民點唔高興都好，根本就無得比，而且咁樣相比十分之唔公平。首先官府今次嘅諮詢文本首次界定「青年」乃十三至廿九歲，此舉將會影響唔少「社團」內之「青委」必須立即消失，事關呢班「資深青年」唔少都係過多兩年就抱孫，突然間要佢哋退落嚟做「雙失青年」，就連社團本身都唔知安排乜嘢俾佢哋做至好。另外鄰埠幾個中學生，堅持一個運動只不過係一年多啲，喺最高峰時期就影響到十二萬人上街作出抗爭。而小城呢班「資深青委」參與咗社團二三十年，都仲係做緊青委，自己唔厭人哋都想嘔啦。講到建樹若果真係有，又點會到今日都仲係「青委」呢？再加上今日小城嘅青年，絕大部分都被大人同官府湊住大，基本上仲未戒奶，唔係問父母攞錢就問官府攞，從來都唔識得點樣去自力更生創造資源。至於一班在學青年，用大專生同佢哋比較，呢班貴為小城未來主人大部分都只識得做兼職，參與社團又淨係識搞「單身派對」，對社會同民生問題一概唔知。反觀鄰埠口靚仔為咗自己同後輩嘅切身利益，不惜上街絕食公民抗命，其決心同情操比唔少宣稱「為民請命」嘅垃圾議員高出唔知幾多倍。大家認為若果將呢兩個地區各自界定嘅「青年」作出比拼，是否真係唔太公平呢？

拎埋條老命出嚟（上）

鄰埠剛經歷由青少年領軍，超過十萬人出席參與抗爭之公民運動。迫得知縣無法不妥協，將備受批評之教育課程部分內容刪去，又將原定三年之後必定要展開之課程，改為由學校自己決定教與唔教，亦無規定幾時同埋要唔要展開。雖然鄰埠官府叫做有少少讓步，但係未能平息民憤，開始到大專生接手反對「似撤未撤」嘅教育科目。從抗議、設街站、上電台電視、與老師對質、遊行絕食，最後佔領廣場，鄰埠一班中學同學，表現出最大克制同理性，亦都由始至終堅持觀點主題，講道理無亂嚟。整個過程唔單止係學生、家長，甚至連官員學者，都認同學生嘅訴求十分清晰有理，與官府一直推諉逃避嘅姿態形成強烈對比。當中亦都有好多人有疑問，一班咁年輕嘅中學生，點樣可以做到咁理智冷靜，應對如流加埋大方得體，背後必定有高人指點培訓，方能有上佳表現。姑勿論青年團體背後有乜高人支持同點樣培訓，呢次學生哥們表現出獨立理性、禮儀恭敬不慍不火，大家若果唔睇熒光幕淨係靠聽，隨時以為講緊嘢嘅人喺度選緊知縣，而且比「唔存在、唔記得、唔清楚」更有代表性同說服力。至於一班大人嘅所謂學者、評論員、官員甚至老一輩學生運動者，不斷提出陰謀論、分化論同其他批評。呢班小朋友始終如一，就算抗爭未竟亦都見好識收，超越廿幾年前前人所犯下之種種錯誤，令所有支持者能安然度過，亦都令學生們提倡嘅要求成功轉型至下一階段。縱使政治學者認為結束太早不能完成其目的，但係坐喺冷氣房中指指點點說這評那，梗係舒服過日曬雨淋無覺好瞓嘅小朋友們，人家書都未讀完就走出嚟為下一代抗命，房內老鬼有本事就拎埋條老命出嚟幫拖仲好啦！

同門內鬥（下）

被「主流媒體」形容為「驚險過關」嘅2+2方案，則被網民戲謔「劇本比低俗喜劇更低俗」。原因係觀眾們一直期待嘅「粗口議員」今次無發功爆粗，搞到第二日大家少咗笑料話題。反而一向扮中立，唔多左右投票嘅主席今次一反常態，喺大家投晒票之後發現唔夠數，竟然唔理自己身分同形象，親手落票決定賽果。雖則小城無話主席唔可以投票呢個議會傳統，參與其中亦都係明文規定有投票權，但係咁樣利用特權知道賽果之後，刻意改寫歷史，將個連內部都未傾掂數嘅議案，送入小城嘅議會歷史中。同屬建制派代議士更加係同一個組織嘅隊員之一，但係投票取向就各有差異。循間選入局嘅主席投咗決定性嘅贊成票，反而直選隊友喺呢個議案上投棄權票。兩種取態正正就代表咗呢個議案嘅爭議性。間選所代表嘅利益集團為咗保障整個瀕臨絕種嘅特權階級，不惜同直選入局嘅隊友「對著幹」。係同一個組織出身，代表同一界別而作出兩種唔同投票取向，咁樣並唔代表你哋嘅組織特別民主，而係可以亂咁嚟都得。相反對於兩位所代表界別之選民，則十分眉精眼企一定無睇漏眼。而直選入局嘅一方一直都支持總體議案，只係去到細則性分餅仔嘅時候唔同意咁樣分法而已。睇返今次投反對同棄權票、差啲搞掂咗個議案嘅代議士，全部都係循直選入局。今次喺分餅仔轉投棄權嘅代議士，本身亦都係再次要面對明年嘅直選，喺「政改」一役上經已失咗唔少分，投棄權票都係為保明年選票之下，無辦法之中嘅辦法之一都未定。若果真係咁樣，就更加足以證明為保「入局」，同門內鬥大家都在所不惜。

造王者（上）

原本經已坐定粒六，實食無走雞嘅小城政改2+2方案，終於去到「垃圾會」最後呢一關。唔理係保皇定係反對派，大家都諗住交埋份功課至去放假，甚至連曾經關心嘅庶民，都打定「阿爺落咗旨」嘅輸數，「垃圾會」嘅所謂表決都只不過係過程之一，點都做埋場戲就算。誰知道結果雖然係最終通過，但係過程峰迴路轉，差啲仲流產咁滯真係估佢唔到。當然呢度係我主場，有睇開嘅讀者都清楚我嘅取向同立場。但係今次差些少就流產嘅關鍵，就係在於直間選之分。點解咁講，原本直選同間選本身就係壁壘分明，而官委早就更加應該消失次地球上。而偏偏小城嘅政治生態竟然能夠容忍到官委呢樣咁唔人道嘅「所謂代議士」，大家都無乜嘢可以講。今次官府差啲遭遇滑鐵盧，明顯地對本地嘅政治生態同周期無正確解讀。今年被喻為大選年，並唔係花旗國大選咁簡單，周邊地區統統都進入大選時效。而全球化底下每個板塊都互有影響，追求變革則從來都無變過，只係大細嘅分別而已。直選同間選最大嘅分別就係將庶民分咗等級，係管理層制定出嚟玩嘅遊戲方式。而為咗更好咁管理庶民，「直」同「間」都嫌未夠，索性加埋官委嚟加入遊戲內。有玩過RPG遊戲嘅人一定明白，當遊戲始創人加入殺著，就算玩家有幾高明，根本就無可能過到關，原因就係成個遊戲都係由設計者設計出嚟，要你過唔到關有幾難呢！問題係當遊戲設計者設計得唔周詳，就會出現今次「垃圾會」所謂嘅「驚險局面」差啲胎死腹中。不過咁，既然叫得「造王者」梗有最後殺著，所以只會有驚無險，一定唔使上身。

埋單計數（下）

今年「保釣」照例引發各地示威、聲討太陽國。除咗鄰埠之外，各地都有唔少華人向當地嘅太陽國使領館等示威。當然數最激烈誇張者，非國內幾個大城市莫屬。和平理性乃示威遊行之先決條件，因為缺少任何一樣都好容易引發暴力事件，而偏偏國內每次涉及「保釣」嘅事件，都會出現偷搶打砸嘅場面。大家其實唔係好明點解每次都要搵日資百貨公司做對象！乜國內同胞唔係好鍾情太陽國嘅商品咩？唔係點解每日都有咁多人嚟到小城搶購奶粉？破壞自己國人經營之日式餐廳食肆，唔係就代表咗對方嘅飲食文化得到廣泛接納、先至會有自己人開設經營賺錢咩？而最離奇嘅係，示威者竟然破壞太陽國牌子嘅警車。大家每日都接觸唔少國內新聞，一直以嚟都只有例如小販被城管暴打、小偷被公安擊斃等，從來都未聽過有警車可以被民眾破壞嘅事。而內地近年興起嘅「五毛黨」，更加係將民情引導至民粹嘅主力之一。將反對對方嘅政府變成反對對方嘅人民，就係唔和平唔理性嘅表現。當開口埋口就話要打要殺乜嘢國嘅人，除咗無知同野蠻之外，更加係自招其辱更被人睇唔起。情況就等如有人開口埋口就「問候令壽堂」一樣，表現咗自己嘅無文化無修養、缺乏邏輯思考同無理性。結果由一班好人好姐嘅正常公民，變咗做生化危機內嘅喪屍暴民，外面人唔笑你，自己都應該知道這樣是不理智。然而若果大家係諗住用呢種方法去抗議政府嘅不作為，咁就唔應該去破壞人家辛苦經營嘅餐廳食肆、聘有大量中下階層工作嘅百貨公司，而是可以到政府機關示威表達意見。再講若果以打爛幾多嘢嚟衡量愛國程度，咁大家年終都打爛唔少碗碟，要唔要計埋一份呢？

點樣補救？（上）

每當燒街衣時節，就宣告咗一年一度嘅保釣大行動又嚟了。今年兩岸四地唯一有鄰埠派船出海，氣勢稍為薄弱。不過唔知是否正因為咁，反而令太陽國疏於防範。多年之後竟然俾佢哋登島成功，只差在國旗未能插直呢一步。但係「人丁單薄」係一件事，今年成功登島人士中，就有一位小城代表參與其中，按照片段所見，仲要係第一個跳上島上準備插旗者。難怪令咁多小城支持者興奮莫名，事關若果無記錯，小城庶民是次成功登島實屬首例，唔理大家對「保釣」支持與否，都會替呢位登島勇士高興。可能同樣基於「人丁單薄」嘅關係，官府一直都無表過乜嘢態支持或反對「插旗行動」。唔做唔錯呢種心態大家都可以理解，畢竟小至高官大至京官，由於關乎國家對「保釣」嘅態度，唔係你一個半個官講咗可以負責得起嘅事。但係對於庶民生命安全而發聲，就絕對能夠得到理解同諒解。鄰埠抽水知縣收到登島人士被太陽國「逮捕」拘留消息之後，第一時間發表聲明召見總領事，要求對方確保自身公民嘅人身安全。唔理鄰埠知縣抽水點都好，都叫做為自身公民發聲爭取保障。唔似得小城官府乜人都無表過態，一味只話密切關注不過無乜行動。講真庶民都唔會祈望官府會做啲乜嘢，反正都係得把口。然而同樣得把口嘅鄰埠知縣，人哋用把口就比小城官府高明得多，當地人聽到最多只可以話佢抽水。就算「召見」總領事呢一招只會被人笑，至少都有派員到當地協助登島人士盡快離開，點都唔會被人話佢莫不關心咁冷血。至於官府要唔要做番啲乜嘢補救，其實亦都只要知縣接見登島勇士，年尾派番個英勇勳章表示支持，正路可挽救番些少分數。

無陽光政府（下）

官府終於玩收地（唔係菜園村，無得補）。鑑於事件經已擾攘多時，該地段早已被發展商開山劈石，原來之自然山體早就蕩然無存，更加無得補。然而走資司長事件發生咗咁耐，點解要拖到今時今日先至收返幅地？當年發現走資司長有問題時，點解唔係先暫停所有經「走資司長」批核嘅工程同批給，等事件水落石出之後，再繼續無問題嘅餘下工作，咁至唔會令到事態不斷擴展，最終波及到一般買樓嘅庶民，當然買得起呢個豪宅樓盤嘅，又點會係一般平民百姓。最令庶民費解嘅係呢類貪腐案件就算當事人點周密都好，斷估都唔需要查咁多年至有答案，而且仲要拖到改朝換代之後，新任知縣先至肯出官府公告收返幅地。明顯背後仍然涉及好多利害關係，否則知縣要拉人封舖其實有幾難先！雖然話先暫停所有批給同工程，好可能影響其他正常批給工程嘅進度，或者係同期安排嘅其他發展，但係就算要有所犧牲，官府都好應該將問題控制喺最細範疇之內。大家買股票都識得訂下止蝕位俾經紀啦，更何況呢類涉及咁重大嘅公眾利益，我哋又唔相信官府無人識得咁做。其實今次事件最大嘅原因，係無一個明確嘅苦主，受害受傷嘅只係小城嘅山體同大自然，佢哋唔識得開口申訴、或者係向法院提告，咁樣當然無乜人好大聲咁提出抗議。事件若非涉及鄰埠風頭富豪，話唔定塊地收返改埋用途兼夾起埋之後都仲未有人知道發生咗乜嘢事。所以大家喺陽光之下，都見唔到陽光政府，咁喺污雲密佈嘅情況下又邊有可能見得到陽光政府呢！◇

細路仔學做大人嘢（上）

圖片來源：「蘋果日報」
機場山地批給一案，官府正式發出公告，宣佈批給無效，而若果有買家曾經向發展商買入「樓花」而向官府繳納稅項，亦可向庫房申請取回稅款。呢次係官府首例因土地批給期間涉及不法行為，而官府進行土地回收，而同時又涉及發展商預售「樓花」後，要退回稅項予買樓人士。或者有人會覺得，今次官府終於收返塊地，有助庶民重新相信官府會守護小城公義。只係今次不公義嘅發生，完全係因為體制出現問題，至會被人有機可乘徇私枉法。唔單止官府嘅信譽被嚴重打擊，更加要全體公僕一同付出信用上的代價。坦白講貪污事件中涉及嘅其他公職人員，就算法院或者檢察當局，用證據不足或者係無證據所以不提訴訟都好。對於庶民嚟講只有一句「未見過唔食魚嘅貓！」，嚟反映大家對呢班手執法權嘅公僕嘅不信任。事實上今時今日小城正逐步走向沉淪，有人話沉淪係因為小城賣賭，但係過去幾十年小城都係靠賣賭維生，點解今時今日至嚟沉淪？原因並唔係因為小城開放賣賭，而係因為開放賣賭後得出「部分人先富起來」呢個現實！無錯，我哋祖國一早就行緊小城而家要走嘅路，大量引資開發、投入基建，實行做大做強。其實國內早就有版你睇，有幾多官員因為搞開發而「發展個人事業」，最終落馬收場。只不過小城有別於祖國有咁大地方，而且天然同人力嘅資源都不足，唯有發展單一項目，即係將「賭」再賣大賣強。而偏偏「賭」呢樣咁講投機同機會主義嘅嘢，正正就吸引到唔少人偏離正道走精面鑽法律罅，希望自己係新一批「先富起來」嘅人。任何制度都會有漏洞，最緊要係睇吓點樣修補機制內嘅漏洞，不過國內例子睇到越發展就有更多貪腐，小城官府要修正問題似乎仲有排行，暫時仲係細路仔學緊做大人嘢。

取消資格大快人心（下）

自從奧運出現電視直播之後，每四年一屆嘅體壇盛事，都吸引咗全球目光，好嘅有而壞嘅亦唔少。由開幕禮「過氣事頭婆」肯同「回歸占士幫」一齊癲，到憨豆先生出場搞笑，都表現咗昔日「日不落國」嘅寬厚胸襟，亦都定義咗何謂「泱泱大國」。唔似得國內有某省官員專程去有望奪金嘅運動員屋企，專登接走其雙親，準備奪金一刻齊齊出鏡為自己面子貼金，可惜奪金不成後所有官員極速消失遺下雙親呆坐。亦有飛魚小將忽然爆發奪金，令一眾鬼佬質疑小將有無食藥，繼而掀起隔洲罵戰。當然大家早就唔信乜嘢「友誼第一．比賽第二」呢種廢話，淨係睇吓各國俾得獎運動員（尤其係金牌）嘅獎金有幾多就知，仲未計國家以外嘅獎金，喺利益驅使下基本上無乜嘢做唔出。最新衰到貼地事件，就係羽毛球賽事中，女子雙打中竟然有成四隊被大會取消資格，理由係無盡全力去參與賽事。大家若有親眼見過呢幾隊是次嘅比賽，根本就唔係正常人嘅表現，仲衰過細路仔打波。大家對被取消資格，都以出線後要「留力」作為理由。老實講大家都明白乜嘢叫做「走線」，最出名就係足球項目喺十六強同八強都成日有呢種計算，問題係足球項目要取勝並唔容易，做波亦都較容易。相反羽毛球要打咁多局，仲要打咁多分，要做波根本唔容易。問題係大家仍然認為「走線」呢種方式係大家都接受到，所以根本就唔理打得有幾肉酸。正所謂「假的真不了」，鬥輸波鬥得咁肉酸，梗係令人眼火爆，事關呢種根本係企業行為，絕對唔係體育精神，取消其參賽資格直頭係大快人心。

扭曲價值的悲哀（上）

倫敦奧運終於開鑼，茶餐廳唔少粉絲日日討論最新獎牌數字，當然呢樣都係歷屆奧運全城庶民嘅習慣，獎牌越多國家越威，連帶自己都好似有面啲。只不過今屆奧運舉辦地同小城相距地球一半，時間上剛好對開，大部分茶客都無能力踩通頂睇電視直播，唯有上網或者睇其他媒體嘅報道。奧運係四年一次，展示全世界最高水平嘅體育競賽項目，亦有唔少相對冷門嘅體育項目大家都可以觀賞到，各國鬥獎牌之餘亦可以睇吓運動員蟄伏四年為咗奧運，現在終於可以一展身手，以最佳狀態展示訓練成果。當然大家都希望國家代表，能夠喺各項目都能夠有最佳成績。只係近期網上及報章上，流傳咗一批國內體操運動員嘅訓練照片，披露咗國內小童被送去受訓時，接受咗極之嚴格同時又十分之不人道嘅特訓，令到大家都反思運動爭獎牌，為何要小朋友付出咁大嘅代價呢？照片上面每個小朋友都喊晒口，完全只有面容扭曲嘅痛苦。而且每位小朋友旁邊，都有唔少大人以近乎虐待嘅方式，將小朋友未發育完成嘅肢體，好似種植盆栽咁無理屈曲。睇住班小朋友咁樣喊法，雖然話玉不琢不成器，但係使唔使去到咁盡呢？我哋都相信，身旁嘅大人們其實都未必想咁無人道咁訓練班小朋友，但係班小朋友嘅父母希望子女能夠靠運動出頭，影響一家人未來嘅生計，就算點唔想亦都唯有要小朋友承受痛苦，希望有朝一日小朋友能夠出人頭地，除咗可以改善家人嘅生活，同樣亦都可以改善訓練者嘅狀況，呢種咁扭曲嘅價值令到大家喺興奮國家成為獎牌大贏家嘅同時，亦為幕前及幕後嘅人員悲哀。

做錯嘢唔使負責任（下）

「韋森特」雖然成功令到小城回歸後首次發出「九號波」，但係其實小城「天文台」根本就睇小咗阿韋小姐嘅威力，只批佢「九號波」。事關大家點睇都知道個風係直指小城，亦比鄰埠更加接近。鄰埠眼見韋小姐嘅威力，一早就掛出「十號波」，而小城「吹水台」唔單止無視現實嘅情況，亦無利用鄰埠專業嘅數字作參考，只係講無直接「吹正」就唔會掛「十號波」，亦公佈「吹水台」收到嘅風速數據係未達「十號波」標準。大家唔知「吹水台」點樣收集當日嘅數據，但係個風過咗之後就有好多證據話俾大家聽個風有幾強。首先，臨海豪宅有幾十戶嘅窗台被強風吹爛，係小城首次有「豪宅」被颱風吹爛咁多窗台。當然，其他嘅塌樹、塌棚、招牌跌落街等就係每次打風嘅指定動作。不過興建中嘅豪宅地盤內嘅「天秤」搖搖欲墜，消防要疏散對面大廈廿幾樓以下嘅居民。另外，號稱花費幾十億興建嘅「鹹蛋運動場」，就連個「蛋殼」都被韋姐吹走咗一忽。「吹水台」喺成件事件當中，究竟有無真實咁反映咗颱風嘅狀態俾庶民知道呢？雖則話天有不測之風雲，但係「吹水台」收得人工就係要測俾大家睇，而唔係亂咁測同測都唔測。若果唔係點會有咁就手嘅鄰埠資訊都唔借用，打死都唔肯掛十號？況且今時今日小城十五年免費教育下，庶民喺天文同科學知識上都增強咗唔少，加上鄰埠清晰嘅風象衛星圖片同路徑分析，一般庶民都差唔多可以預測到兩個鐘頭內嘅天氣狀況，反而手執行使法例權嘅「吹水台」卻死硬唔肯按照實際天氣狀況如實咁掛波落波，令到其他消防同衙差為咗救災面對危險而疲於奔命。「吹水台」相信係小城官府內最有影響力嘅「做錯嘢而唔使負責任」嘅執法機關。

吹水台（上）

上星期，小城剛剛經歷咗一次回歸後首次「九號波」。「韋森特」從慢慢推進迫近小城後突然發威，風力去到埋身嘅時候先至增強，搞到唔少庶民變成災民，受影響人數出乎大家意料之外。小城喺先天不足加上後天腦殘嘅情況下，對颱風消息嘅報道硬係差鄰埠一大截。過去，小城漁業發達時期，氣象消息直頭係小城電台嘅代表，到依家仲有好多人記得「南澳以南、汕尾以南」呢啲地理氣象位置。不過當漁業式微後庶民就只有依靠鄰埠電台同電視台嘅報道，事關本地電台只係掛住吹水廢嗡以為娛樂大家，結果搞到人心轉向收聽率每季都創新低。但係打風當日一直有留意颱風消息嘅打工仔、老闆仔都會發現，小城嘅「天文台」連「天文台」都不如，連「睇水」都唔識。由「韋林特」突然轉向開始，其路徑就直指小城，「天文台」一直都仲係講小城唔會點受影響。直到鄰埠下午三時預告五時有機會改掛八號波嗰陣，「天文台」依然毫無動靜向大家預報幾時會改掛更高風球。最後係都要等到近六時左右至宣佈七時會改掛「八號波」，成個過程實在太刻意拖延掛「八號波」。不過「天文台」一向都以「用家需要」自居，掛波視乎有無影響上落班時間呢樣嘢，庶民早就預咗，只不過今次做得實在太核突。但係最離譜者乃係個風距離小城比鄰埠更加接近，鄰埠早就掛咗十號波，小城到最後都只係掛咗九號波。而阿「用家台長」竟然話個風無直指小城，所以唔會掛「十號波」。原本係一門專業科學驗證嘅氣象預測，依家則變成咗一個好求其模棱兩可任何人都可以做「天文台」，反正都係吹水啫。

可以靠乜？（下）

「廢噏議員」有幾廢大家有眼睇，大家亦都十分憤慨。事關「廢噏議員」竟然係代表小城嘅代議士之一，直頭係令小城蒙羞。當然歪理人士喜歡用「意大利都有黑手黨代議士」，呢種歪理三歲細路哥都識得講。但係偏偏就係呢位幾廿歲嘅廢人唔使經過選舉，只要老豆有米就可以為所欲為。可鄰嘅係呢位被大家稱為富二代嘅「廢噏議員」終日只係沉浸於「圍來」事務，事事劃分「自己友」為其發聲，亦都從來都唔知同埋唔理「代議士」是否「代」表庶民去「議事」。佢只係識得「代」表「圍內」去講嘢，就連「議事」都未識。相反，佢所引用嘅鄰埠，反而出咗個十五歲口靚仔一鳴驚人，運用理性同埋邏輯，加上初生之犢不畏虎嘅膽色，成功將教育高官同老師等佔領咗道德高地同埋理性知識代表嘅外貌粉碎，令佢哋露出猙獰嘅原本面目。童言從來都無忌，只要各位高官同埋當權者，真係拎個心出嚟服務大眾同社會，根本就唔應該怕一個細路所講嘅嘢。問題係成年人大多都係言不由衷，背後私心同妥協等包袱實在太多，要直面童言嘅無忌，唯有赤子之心方可面對。
　可惜嘅係當今社會教誨係成人必須有嘢揸手至有安全感，要佢哋唔使背負任何包袱，或者係「無嘢輸」根本就唔可能。結果就係局長唔理個細路講乜都要硬推佢哋方案，而老師就喺公開場合拍檯鬧個細路。好明顯嘅係現今世代根本就唔使乜嘢理性邏輯，「教育高官」、老師、代議士等，都可以唔理邏輯咁無理謾罵，庶民除咗靠自己發聲，仲可以依靠乜嘢做你自己嘅代表呢？

廢噏議員有幾廢（上）

近日網上最紅，莫過於一向言論出位、口沒遮攔見稱嘅「廢噏議員」，當住大庭廣眾喺莊重嚴肅嘅議事堂上，公然爆粗謾罵。利用議事規則中發言嘅機會，大肆向另一批民選議員進行侮辱同攻擊，由於言論出位加上離晒題兼夾越扯越遠，被主席叫佢發言圍繞返喺原本題目上，呢位燒壞腦嘅「廢噏議員」唔單止無理會過，更加大條道理咁話仲有幾分鐘嘅發言權，結果就咁就俾佢發表咗成十幾分鐘嘅廢話。「廢噏議員」喺議事堂內用呢十幾分鐘除咗出口傷人同埋人身攻擊之外，最重要嘅係「廢噏議員」喺議事堂上面發言竟然講鄰埠嘅政治事件，將鄰埠知縣被人叫落台賴喺小城民主派議員身上。又將鄰埠二位知縣嘅下台狀況指責為民主派人士「借題發揮」，事實係「廢噏議員」擺鄰埠知縣嚟借題發揮至真。不過每次當呢位「廢噏議員」發表佢嘅謬論，唔少人都當作係周星星笑話咁睇。事關呢位「頭筋逦黐腳筋、腳筋黐脷筋」嘅「廢噏議員」發言同埋表達能力都係常人要求嘅水平之下，加上組織能力低而且喜好粗言穢語，每每令到「聽眾」想打爆或者鬧爆部電視或電腦，繼而係捧腹大笑因為佢嘅邏輯同措詞根本係亂晒籠。而片段中多次對於想表達之人物名稱竟然唔記得係叫乜名乜，結果唔單止侮辱咗被認為民主烈士嘅「李旺陽」，同時亦侮辱咗退位嘅鄰埠知縣。呢種咁樣嘅表現水平根本連鄰埠十五歲中四生都贏佢幾條街，但係呢種咁低水平嘅人，竟然可以代表庶民喺議事堂上面發噏瘋，浪費納稅人金錢之餘，最重要係侮辱咗一同出席嘅其他代議士，包括直選好間選好，甚至連官委嘅代議士都比佢有用。當然唔包括佢身旁兩位想推佢去死嘅左右護法。

唔夠明（下）

另外今次加價引發嘅全民鬧爆，卒之令「垃圾會」出手召見，要求官府解釋新巴士服務模式同巴士公司之間嘅合同簽署情況。不過今次就官府到「垃圾會」解釋嘅開會模式究竟係開門定閂門，咁都要搞出件「羅生門」事件，互相指對方有權要求「閂門開會」。唔理邊個呃人都好，即係話官員同議員都唔係好理解議事規則係點。而事實上大家喺公共媒介上面，根本就搵唔到「垃圾會」邊日會開會、以及開會內容係乜嘅資訊。「垃圾會」係庶民嘅代表唯一能夠直接同官府討論小城大小事務、而庶民又可以得悉內容嘅會議，按照道理其內容係應該要公開俾全城庶民知道。事關大家審議乜嘢議題都好，唔計官委同間選，至少直選代表要向公眾交代。議事過程中佢哋點樣發言，喺議題上嘅取態同投咗乜嘢票。而唔係好似現在咁每次開會，都係由秘書處通知議員幾時有乜嘢會要開，然後開完會庶民至可以由媒體報道得知官員講過乜、議員做過乜。媒體只要選擇性報道某幾個議員同官員做過乜，對其他同樣係庶民代表嘅代議士係十分唔公平，有時媒體有其他大單嘢發生，甚至可以連報道都唔出街，咁就令到大家連會議發生過都唔知，唯一能夠得悉其內容嘅方法，就只能喺「垃圾會」官方網站內取閱議事報告。至於報告內容有幾詳細就只能夠由大家去判斷。不過大家只要睇吓，鄰埠就不時有直播垃圾會整過會議過程，大家可以清楚知道代表自己嘅代議士，有無達到自己心目中嘅要求，而唔係好似小城嘅代議士，要喺議會外不斷進行其他議題嘅相關活動，去表達自己嘅立場。其他做得無咁多嘅代議士因為大家無渠道睇到佢哋喺議會上做過乜嘢，所以被大家認為呢批議員無做嘢。連開會都咁唔透明，點樣成為陽光政府呢？

幾和味（上）

搞咗一輪大龍鳳、經全城鬧爆之後，官府突然宣佈決定暫緩審批巴士公司申請加價，理由係三間公司必須喺安全同服務質素方面有所改善，官府先至會繼續進行審批程序。不過大家都明白官府今次只係用拖字訣，暫停審批以壓住民憤，並唔係取消審批，只要當大家憤怒過後好大機會又會「靜雞雞」繼續批核。
　其實小城巴士服務新模式一開始就唔少混亂同疑點。記得一開始招標就發生咗逾時遞標要取消其中一間公司嘅資格，最終要搞到上法院判決至成為今日三巴局面。另一方面新巴士公司由成立到正式營運期間，不斷以請唔夠人為藉口向官府施壓，企圖引入外勞司機以減少成本，增加利潤。然後又有新模式剛開始時新巴運載力未達標，要其他兩間巴士公司出手相助，搞到官員要叫大家唔好認巴士顏色，只睇「冧巴」做人。最後就梗係由新服務模式實行至今，新巴士公司不停出現嘅安全同服務質素問題。以上問題在在顯示官府與巴士公司有不尋常嘅合同交易，因為大家都唔知道官府係點樣同三間公司簽合同。今次三巴申請加價最離譜嘅係竟然可以劃一加幅，一齊加廿幾巴仙，即係話俾大家聽茶餐廳同大酒店扒店杯咖啡係一樣價錢，你信唔信？統一加幅最大受益者其實係兩間舊巴士公司，因為新巴士公司乜嘢都係新建立，包括車隊、維修廠房、寫字樓甚至管理系統。而兩間舊公司都唔需要重新建立，只係適當地調整營運方式，就可以達到官府要求。若果新巴士公司提出加價百分之廿幾，就算計埋通脹同人資價格嘅升幅，兩間舊公司至少都可以賺多十幾巴仙，條數係唔係幾和味？

未夠班（下）

小城至鄰埠屯門嘅航線出事，兩隻船都話要進行維修，之前就搵藉口話「電腦壞機」，結果該公司最後選擇停航退票。咪玩啦！你地嘅大話同「狼英」不相伯仲，程度咁低不如努力吓，呃人都唔該呃得高明少少。想充大頭鬼搞「公交」扮「藍籌」，至少先要了解自己有幾多實力同精力。小城從來不缺市井嘍囉。從過去「走數議員」、「走資司長」、「飛人航空」以至「巨龍沉沒」，無一不是「充大頭扮籃籌」。生意人個個都想用「槓桿原理」去實現財庫倍增，結果只有成功同失敗。當然成功例子就係人都可以列舉，「彪記」、「李氏力牆」、「估臣」甚至「賭神」，但係失敗例字就唔係個個好記得或者係唔想記得好清楚。因為大家都唔係好想「從錯誤中汲取教訓」，只係想從「成功例子中學習」。想扮「藍籌」至少都要學吓「狼鷹」乜都扮唔知唔記得唔明，但係唔想咁低級嘅「演出」就要「升呢」補位，亦可以學吓「一般男人會做錯嘅事我都有做過！」。高班咗少少？咁就不如學吓「飛人航空」老闆嘅回答：「今日唔係講呢啲問題，下次再講！」再唔係就用番局長常用慣語「視乎用家需要？！」都得！各位可以聽到咁多「出類拔萃」嘅謊言，其實真係幾生修到。以上節錄嘅「金句」大大話話都教識咗唔少人點樣去學習講大話講得高明少少，而唔係好似「膠局長」同「講局長」咁，淨係識得「密切關注」、「努力責承」，根本就同「衣髮屍證」呢局完全無分別。死咗無得救就坦坦白白咁講出嚟就係囉，未夠資格扮「藍籌」就要認。莫非你哋想學「你旺場被自殺」乎？

憑乜加價（上）

巴士申請加價，庶民即時「媽媽聲」。講都唔使講以新模式營運嘅巴士，唔理新舊公司，都未達預期效果，要加價根本都未有資格，更遑論有無加價嘅條件。新模式運營只係唔夠一年，巴士服務就話要加價。尤其係連最基本準時安全呢樣最重要嘅要求都未達標，無理據無服務，根本就被人覺得係扌禁住嚟搶。
　今次巴士加價，除咗庶民之外，唔理係民生派或者係民主派，甚至連媒體都以3D立體反對，嚴重程度不下於庶民對走資司長賤價批咗機場對面塊地俾鄰埠富豪。電子媒體率先發難，直接播出局長被記者兜口兜面問佢「一間事故多多甚至撞死人嘅巴士公司，竟然仲有面申請加價你點睇？」當然局長都唔係今日至面對呢類插問，只不過局長仲未夠道行學到鄰埠「好打得」，大家只係見到佢不停咁「解拆」，連大話都唔敢講。事關今次係關乎庶民每日嘅出行，就算係官府付款而唔加庶民票價，庶民都好唔高興。因為就算唔加庶民票價，官府都要俾更加多嘅錢俾呢幾間巴士公司，而官府嘅呢啲錢，其實都應該係庶民有份。因為唔理係開放賣賭，抑或係賤賣資源變成庫房資產之一，都係屬於有身分證有出世紙嘅小城庶民。官府若果就咁就批准咗巴士嘅加價方案，就即係直接利益輸送明益巴士公司。更差嘅係官府要到差唔多到期批核加價申請，被媒體追問之下，先至公開俾庶民知道三間公司都向官府提出加價申請。究竟係官府立意「靜靜地」通過加價以便新模式繼續運作？定係早就有預謀用呢種方式向巴士公司輸送利益？大家心中有數。

禽獸不如（下）

早兩日「查數部」又公佈例行查數嘅報告，今次被查對象就係官府負責派錢嘅部門之一「襟機會」。「襟機會」擁有先天優越條件，法例規定佢哋可以收取小城字花檔毛收入嘅一點六巴仙，當然仲有官府同其他法定收入。但係兩年前佢哋一年嘅淨收入就有成廿幾個億，一個咁令人關注嘅數字，自然會吸引「查數部」去檢視你條數有無問題。不過以今時今日官府「錢多人傻」嘅狀態下，大家都唔記得條數其實係要清楚交代。今次「查數部」數出對方幾大罪狀，其實都差唔多係人所共知。自從「襟機會」上一代開始由背景商人出任主席開始，一直以嚟都被人詬病評審批核唔清唔楚，淨係識得照顧自己友社團機構。到知縣換代後主席亦急急退位，換咗做今日嘅主席接手，查數部自然唔會放過機會有得做就做，所以至會有今日嘅報告出現。當然庶民梗係好奇怪，點解以前一直都唔做到今日先至做呢？不過點都好，黃牌就出咗，若果「襟機會」仍然想運作落去，都必須要改變運營方式，更加公開公正同透明，話晒都係所有庶民都應該受益嘅「襟機會」。呢幾日咁多媒體報道「襟機會」嘅報告，點解「查數部」要今時今日至肯去做報告呢？呢個同鄰埠「狼鏟葉」事件一模一樣。事關今日報道嘅媒體，當年同樣受咗唔少背景商人嘅「照顧」，喺佢在位時「媒體」亦唔方便作「高清報道」。到咗今日人又換咗規矩都換埋，要報道就趁快手，結果就造就成今日人人都指摘「襟機會」黑箱作業，但係其實立會以嚟一直都無變過，只係今日有人「墊屍底」，結果就被人群起而攻。所以經典金句肯定無錯「搵錢係本能，識得使錢至有意義」，「襟機會」要繼續運作落去，不妨資助吓「動物會」，認受性點都強些少！

禽獸不如（上）

最近主要新聞日日都係動物佔領，領軍頭目係由鄰埠「狼鏟葉」所帶領，被調查報告指遺憾都可以面皮厚到講多謝還佢清白，大家等緊佢幾時未上台先落台，當然係人都估到無呢個可能性。不過隔籬埠嘅問題最多一笑置之，反而小城嘅動物新聞，先至係大家最關心。
過去多日小城各大媒體都不約而同咁報道一個民間非牟利組織，以收留保護被遺棄動物為宗旨嘅機構。搞到咁大件事就係因為該會會址位於工業大廈內，上址嘅業主會要求佢哋搬出該幢廠廈，結果發生不愉快事件要鬧到上差館。講真大家樓上樓下有乜唔妥要迫遷對方呢？有人唔喜歡呢間收留動物嘅機構喺自己樓上樓下，呢樣都好容易理解，佢哋當咗間機構係民署垃圾房話唔俾佢起就唔俾佢起。大家諗吓有間垃圾房喺自己單位附近，樓價係唔係會跌咗好多先？就算放租唔賣都叫唔起價啦！大家都認為自己嘅財產唔應該因為其他「不受歡迎」嘅鄰居而縮水。道理開始明白，原來大家都唔會食飯拉屎放屁，咁樣就梗係唔會負資產只有「杏加橙」啦！茶餐廳阿叔梗係唔會同你講文明禮儀啦，不過大家都好愛護餐廳老闆養嘅睇門口嘅「旺財」，日日見住都變咗一家人，仲間唔中醒兩舊豬扒骨俾佢嘆吓。若果個業主會想同大家講喺工廠大廈係要講文明儀態、唔准講粗口、要帶埋紙巾著晒全套西裝至可以搬貨，咁呢間仲可以叫做工廠大廈？況且著晒西裝帶埋紙巾唔講粗口、淨係識用大話掩蓋大話嘅，以傳統智慧去形容有呢一句十分貼切嘅「禽獸不如」。奉勸業主會各位無膽消滅屋企嘅小強，就搵協會收養番隻動物，一定幫到你。

拭目以待

電訊局年頭突然硬推半年後實行嘅「全城生滋」，到咗臨門一腳唔夠十日倒數，又突然宣佈推遲多半年至執行。老實講到目前為止庶民都唔明點解電訊局硬係要搞到「全民生滋」。首先小城今時今日仍然有好多地方收唔到「生滋」，要靠「易知」做訊號補足。再者就係局長公佈半年後「全城生滋」後，小城嘅最大電訊商百日內兩度死機樓，生滋服務癱瘓之下搞到民怨爆發，局長依然厚顏硬推話無影響。呢段時間內唔少代議士、學者或者係業界人士，都認為無必要全面取締「易知」，更重要嘅係鄰埠通訊網絡比小城密集更複雜，依然能夠容納「易知」繼續生存運作，唔明點解局長係都要宣判「易知」死刑。就喺一片指摘聲中，電訊局突然對外公佈延期多半年執行。不過到咗傍晚「老廉」發新聞稿，話局長咁樣判「易知」死刑係「行政違法」兼「有違公平原則」，但係仲有一個更嚴重嘅指控係話佢越咗知縣權，仲早過知縣向外公佈呢項消息。事關小城對於專營發牌同條件設定，都係只有知縣一個人有權咁做。而對於庶民嚟講更重要嘅係，政策上「易知」並唔係消失咗，只係庶民就唔可以用，外地來客就可以繼續用呢種服務，呢樣至係庶民最睇唔過眼但係又唔明白嘅地方。而「老廉」無端端插手事件，無非都係因為太多人投訴「易知」被取締，焗住用「生滋」係對消費者唔公平。其實就連最大電訊商都話，其實咁急改晒用「生滋」可能都有技術問題。而局方仍然只係延遲半年，背後動機不得而知，反而連「老廉」都插手事件，肯定都唔係小問題咁簡單。只係依家局方迫大家唔用火水只准用石油氣，除咗阿公阿婆驚死唔識用之外，背後必定涉及更大技術同政策上之變革，至會令局長甘冒以下犯上之險走呢條路，庶民唯有拭目以待。

活化？

圖片來源：「澳門日報」


官府主動提出準備「活化」路環棚屋，計劃引入「文創」元素，又以保護該區原貌及路環傳統產業為目標，處理棚屋使用者的搬遷等問題。官府嘅所謂「活化」，無非都係舊瓶新酒，絕大部分嘅時間係無嘢搵嚟搞。路環碼頭及船人街一帶，保留咗小城碩果僅存嘅寧靜漁村風貌，大家只要由榕樹頭右轉逃離葡撻店的喧鬧，沿路的棚屋小狗懶散睡喺路邊，直至經過碼頭再入船廠路去到大路，大家仲可以感受到幾十年前小城仍然有捕漁業、有造船業、曬鹹魚造蝦醬等經已消失了的古老行業氣息。雖然船廠停產破廢、其他相關行業亦都式微，但係過往寧靜緩慢嘅生活方式就好似將時間停頓咗，充斥小城各處嘅不同博物館，都無可能提供到呢個咁活生生嘅歷史教學。依家官府提出「活化」該區，好明顯會破壞呢種咁獨特嘅氛圍。所謂「活化」首先第一步必定要整頓，當所有棚屋附近角落的破廢被整理整頓，變成十分有條理嘅水上屋之後，漁民生活與工作時剩下的隨意性及風味必然消失。加上今次係由城規廳提出「建議」，「唔化局」作配合，即係建設為主、文化保育為副，小城有咁多嘢要保育活化，係唔係首先做咗其他地區例如新橋老街等地方，而唔係去破壞原來寧靜安逸嘅環境呢？例如望德堂一帶官府將破舊嘅建築修葺後重新粉飾，可惜全部都只不過係表面功夫，建築物內部嘅維修、重建等工作都只係小修小補，直到建築物內部倒塌，至將其改建為演藝學院校址。從來都無長遠規劃點樣去加強活化，亦都係政策上無一個清晰方向，反而周圍手多多樣樣都做少少，搞到所有文物都變成「黃屋仔」，連遊客都睇到厭。

「資深領導」與「夕陽知縣」

圖片來源：「蘋果日報」

鄰埠重量級資深傳媒領導仙遊，兩埠重量級學者、傳媒政客，以至官府要員及現任候任知縣，都一一前往靈堂致祭。風骨報人享年過百，正統根正苗紅愛國報人，一直堅持傳媒報道真確且立場堅定，連一向逢共必反的人亦十分敬佩。「資深領導」最受敬重的表現，莫過如廿三年前的「開天窗」舉措。當年以作為堅實京城喉舌的傳媒老大，對於天子腳下發生的學生運動，表現出傳媒人對事件人性的關切及領導應有的擔待，於今天商業與利益價值作為首要立場的媒體生態，「資深領導」早被視為瀕危動物，更受有膊頭有腰骨之人所愛戴。對比鄰埠「夕陽知縣」，對「領導」的理解同承擔根本就差天共地。「夕陽知縣」過去幾個月不斷被媒體揭發接受富豪款待，出差入住幾萬銀一晚之總統套房，浪費公帑之餘更加係無王管，所謂「洗費指引」竟然係自己訂立隨佢點嗡。呢種貪小便宜嘅態度根本就無條件成為領導。但係講返轉頭「夕陽知縣」參選時候，經已好大聲同大家講「我會打好呢份工」。將領導呢個位置視如一份工，早就話咗俾大家聽「我打份工咋！有乜你搵事頭講數啦！」相對於鄰埠首任及候任知縣，「夕陽知縣」又確實係打份工打足幾廿年，根本就無試過為理想拼事業，幾廿年嚟只係不斷學習點樣喺體制內努力向上爬，結果終於俾佢爬到上頂峰，可能呢個亦都係佢嘅理想都未定。但係對於一個唔敢冒風險只會喺安全網內做決策嘅人，你要佢負起決策後嘅責任根本就唔使旨意。內在基因早就決定咗佢無領導能力，根本就唔可以同「資深領導」相提並論。

有辱「狼」之名

圖片來源：「蘋果日報」

廿三年前發生的事件仍未解決，今年突然又鬧得特別沸騰騰。首先有廿三年前以開天窗及「痛心疾首」社論，向暴力鎮壓表態的「資深領導」仙遊。而內地仍然持續發生黑幕當中，最新「你旺場被自殺」震驚國外，鄰埠小城兩地不斷有人發起悼念，更有示威遊行促請當局高透明度調查死因。事件之醜陋引發群情激憤，影響範圍不斷擴大，最近就連鄰埠「夕陽知府」內的高官，都直接表態對事件關注。例如「衛生幫」就直指「作為郎中好難想像一個咁殘廢嘅人點樣可以自殺」，而「錦衣衛」就話希望事件「水落石出」，同樣表達出唔信當局發表嘅「自殺論」。事件引發內地唔少異見分子紛紛發表「不自殺宣言」，而當局為咗平息事件，亦宣佈派專家組重新調查旺場死因。到最後「夕陽知縣」喺佢在任最後一次出席「插問大會」時，終於表態話作為知縣有責任確保鄰埠表達意見嘅自由，亦經已向京城反映鄰埠關注「被自殺」事件。 鄰埠候任知縣一直喺仲未知阿爺態度係點嘅時候，一如既往咁一問三不知，唔記得，唔清唔楚咁矇混過去。不過就喺呢個時候，眼見現屆官員一個個咁表態，甚至連「夕陽知縣」都要被表態，同時又衡量到有咁多人幫佢「墊屍底」，終於肯答吓有收到消息但係唔會公開評論，順便抽吓水無蝕底。但呢位候任知縣過去態度反覆，由廿三年前聯署發聲明事後扮失憶、到N年都唔選知縣到今天成為候任人，在在反映到呢位牆頭草政客係隨住局勢不斷轉向嘅勢利之人。今日有晒人幫佢「墊屍底」都唔能夠清清楚咁表達關注與否，明日若果京城高調否定，佢肯定會答我唔清楚是否真係有件咁嘅事發生過，鄰埠媒體將佢比喻為「狼」簡直有辱「狼」之名。

厚面皮（下）

官府呢次處理政改諮詢嘅手法咁差，反而激發起唔少人認真對待小城嘅未來。而今次「無辜」被選擇「方案」嘅人，唔多唔少都會問返一句：「點解有咁多個簽名下仲會有咁多人唔同意？」。官府今次拋出呢種咁樣嘅方案，目的都係想增加多幾張凳仔俾大家爭吓，以為擴大少少空間就可以平息民憤，好繼續維持政治同盟嘅合作模式而又無人可以管得到。但係做得咁核突直情將唔多理事嘅庶民一巴二巴咁拍醒晒。回歸以嚟三屆官府兩位知縣，官員一直只有調任或者係自動引退，除咗「走資司長」出事落馬、「運動部長」做完公司董事無得做返公職之外，完全無人因為唔稱職或者係做得唔好而被換，甚至連現任知縣都係由過去體制內擇選出嚟，庶民根本就從來都無得揀。庶民睇住鄰埠熱鬧嘅狼豬人選秀，至少都有話過俾大家聽佢哋嘅政綱同管治理念，雖然認同與否大家都無得揀，不過都可以喺茶餘飯後吹水評論吓。再加上鄰埠幾屆官府只要有犯錯無犯罪，都要下台謝罪。相反小城管家婆「墓地門」被鬧到七彩，依然可以繼續出嚟推「爛方案」。「扌查數部」被揭發亂開會報大數呃錢，竟然仲可以轉去其他部門做嘢。而「宣傳部」使完幾千萬做「蘇」之餘，仲想搞個監管會嚟控制消息發放、天文台連掛唔掛波都要睇「用家需要」。呢班所謂嘅官都做咗十幾年，咁多錯漏兼夾涉及以權謀私，就算唔拉佢都應該「炒魷」以謝天下，以佢哋嘅質素根本就無可能好似鄰埠咁唔做高官走去直選做代議士。結果唯有厚住面皮阻止反對聲音以保其位。

共犯制（上）

「政改方案」喺一片備受爭議聲中滾水淥腳咁通過咗，知縣亦都即時襟掣直接上書京城待批。所謂五步曲就咁就完成咗三步，庶民可以努力爭取改變嘅時間經已完結，半年時間都唔夠就決定咗未來五年小城嘅政制發展，亦都俾庶民睇到官府與其政治同盟喺對於自己切身利益嘅事情上面，可以做到幾核突。 其實呢類利益交換遲早要還就大家都明，所謂政治同盟其實係利益團夥，當利益不均自然會互相開火。今次官府被「提點」要做嘢，利益團夥為咗維持利益，將小城整體政制發展步伐推遲至少五年，直接影響咗垃圾會多年來一面倒嘅遊戲規則繼續唔變。原本垃圾會都經已係庶民「被代表」地表達意見，只不過人數上一直未能與「官府代表」平起平坐局面。到終於有望可以稍為改變呢個「強弱懸殊」嘅戰局，即被人「使橫手」硬改意見，當然會使更多明明政治冷感者出現情緒反彈。佢哋雖然對政治冷感，但係親眼目睹呢場政治鬧劇做得咁差，自然好想發表自己嘅不滿，當中最直接嘅手段，就係運用自己神性嘅一票，喺明年選舉上面表態。就算官府與其政治同盟能依舊保存「行政主導」地位，但能夠擴大議會上監察聲音，總好過日日自怨自艾被人「襟住砌」。以過去十多年小城奉行「行政主導」嘅經驗，過往就出現咗「世紀巨貪」嘅「走資司長」以及官方機構負責人違法貪腐自殺等案件。證明咗「行政主導」喺缺乏監督之下，當權者可以幾咁無法無天。若然再縱容佢哋咁樣繼續運作落去，最終只會誘使官權者將利益與政治同盟分享，實行共犯制。到時小城就更加無人可以監察官府。

立法背後

公天公司宣佈，取消「代客接收鎖碼頻道」，公天公司表示係因應《修改著作權及有關權利之制度》法例即將生效，為免觸犯法律公天公司就決定取消該等「鎖碼」頻道。庶民早就明白「享受」咗唔少公天嘅「資訊優惠」，全因公天公司一直喺不被規範嘅情況下經營，商業競爭下不斷增加不法解碼外地頻道，由最初淨係接收鄰埠四個免費電視訊號之外，內地國營民營、寶島免費收費、甚至海外嘅收費頻道都一一出台，真係遙控唔離手，亦都曾經笑過鄰埠視野咁窄都係因為無咁多頻道接收。不過呢種咁「美好」嘅日子都應該差唔多要消失了。過往小城人少經濟弱加上外地旅客唔多，一般民間偷雞非法轉播，唔好話睇都未睇到，就算睇到都無謂告你。事關告得入間公天公司，最多都只可以賠幾十萬。問題係今時今日小城每年有成兩千幾萬人出入境，要大家睇唔到都幾難，有得兩千幾萬旅客就梗係賺唔少，而家至嚟告你至少都可以收返多少，總好過白白俾人賺咁多。
　另一方面官府多次重申法例並非針對公天，只係為咗保護整體知識產權。不過立法背後，大家都知道官府真正目的並唔係為咗保護知識產權，而係想學鄰埠官府咁，立例打擊二次創作，唔想俾人喺網上搞更多貼圖同埋作歌詞唱官府，打擊管治威信。加上法例目的禁止非法解密，就係想有條法例去拉好似「維基解密」呢類咁嘅網站負責人，免得日後俾人爆大鑊都無得報仇。而且有條例喺度，亦可以起到阻嚇作用，減少網民發表對官府不滿時圖文並茂、娛樂性十分豐富嘅發表。

不在中央的中央公園

走資司長再被判廿九年，三個階段判刑夾埋差唔多成百年，睇嚟要坐多一世至可以出冊。不過今次嘅審訊過程涉及鄰埠上市公司主席，而且又係娛樂八卦主角之一，結果引嚟唔少鄰埠媒體爭相報道，至會有咁多人關注今次判決。至於本地庶民，最關心就係今次涉及一幅龐大嘅土地經已在開發中，而且起緊嘅豪宅更加賣出咗一定數量嘅單位，小城官府今次點樣處理實在令人關注。知縣曾經表示會堅決執行法院裁決，若果今次走資司長嘅判刑代表涉案人士全部都有罪，咁官府會唔會正式落案起訴鄰埠上市公司主席？興建中嘅豪宅地會唔會被官府叫停？或者係直接收返塊地？呢一連串問題官府點處理將會直接影響佢嘅管治威信。鄰埠就有媒體指，小城知縣上任以嚟無乜建樹，小城人差啲唔記得有個咁嘅知縣，所以知縣要打大老虎以壯聲威。可惜呢間鄰埠媒體根本就無做好功課，報道內容錯漏百出，純粹為咗滿足鄰埠人八卦心理，根本就唔係報道事實。而且塊地本來係由一個山體開發出嚟，而家變成一塊平地，被破壞咗嘅山體根本就唔可能回復原貌，而現任司長曾話過該地發展商承諾會為官府開一條隧道。而家發展過程涉及非法交易，山體又被人破壞咗，隧道又唔知會唔會起，庶民大串疑團正等待官府表態。不過官府未來若果真係收返塊地，對於庶民嚟講只係另一單龍環葡韻霸地事件。事關塊地唔可能復原，以官府「往績」收回嘅非法用地，一係就將塊地興建官府設施，未有合適用途就求其放兩舊運動器材話係公園，不過今次塊地咁大，要造成公園睇怕可以成為小城嘅「不在中央的中央公園」。

專營公司（下）

自古以來，國人最重要嘅四件事不外乎「衣食住行」，時至今日則改為「水電訊油」。前兩者小城至今依然維持專營方式運作，而後兩者亦即將結束專營局面。相比於鄰埠關於水呢一項根本就唔係專營，直頭係「國營」由水務局負責管理同收費。對於任何一個國家或地區，水資源永遠都站喺戰略位置嘅首位。就算小城今日回歸祖國有阿爺照住，假以時日特區身分退場，亦都會發生區域之間嘅競爭，水資源就會成為談判桌上嘅重要籌碼。鄰埠由於早已成為國際都會，培育出遠大眼光同國際視野，到目前為止只將全埠面積嘅百分之十作開發，其餘地區則保留自然綠野，甚至開闢大型水塘同水壩，以確保居民有足夠水源作生息用途。就算今日一同回歸祖國，鄰埠亦早著先機喺東江「買起」一個巨型水庫以供日後城市發展之用而同時又繼續維持自家水塘有足夠用水。相反小城自回歸以後，不斷放棄自身戰略資源。水塘變咗隻蛋、電廠變報館，小城早就放棄咗最重要嘅戰略資源。冇錯，先天不足係小城嘅基因，但係以今時今日小城官府嘅財力，就算買唔起東江水庫，點都應該考慮一下確保小城嘅水資源，唔使年年都要公佈鹹潮指數。將生命最重要嘅水判俾一間專營公司營運，就等同電訊業專營一樣，當佢唔玩時就可以唔理大家死活，就算唔收你錢但係唔「放水」，官府又可以點解決？同樣地電廠唔發電淨係識得買電，咁又點叫做電廠呢！誠然，城市發展某程度上需要外地支援。但係專營公司就唔會理你日後發展成點，有得賺就賺到夠為止，呢啲就係專營公司。

重回石器時代（上）

龍頭電訊三個月內死機兩次，行政總裁死撐唔會再有第三次。不過既然兩次（意外）都係人為錯誤，聰明嘅總裁打死都唔敢保證以後都唔會有同類事件發生，即係話大家都一定有機會再次面對網絡癱瘓。作為龍頭，短短三個月內發生兩次網絡癱瘓事故，除咗冇吸收對上一次嘅經驗教訓之外，最重要嘅係第二次（意外）係對呢間企業經已發出警號，營運體制同內部監管發生咗嚴重問題。有評論話呢間公司嘅心態係準備摺埋，等過渡到專營權完結後，就宣佈唔玩，所以百日內兩度死網都咁厚面皮，完全唔道歉同賠償，根本就當班客戶死嘅。冇錯，當自由市場競爭之下，能力唔夠者就冇得留低，十分自然嘅現象。不過可惜嘅係間公司就算遲吓唔玩，都唔可以咁冇品不顧庶民利益，連老舊要退役嘅器材都唔更新一下，話晒年年都賺咁多億，俾返幾百萬出嚟執返好少少啲架生，都唔算太過丫！點解係都要賺到咁盡呢？通訊事業喺今時今日，經已成為關乎庶民生命財產嘅重要公共服務之一，若果負責營運嘅公司完全唔顧商業道德只為賺到盡，摺埋都唔抵可憐。不過就算龍頭公司仲有專營合約做護身符，官府都有監管權利，亦都有罰則可以處置冇公德嘅商業機構。但係環顧官府對於龍頭公司呢單「百日兩死線」，淨係同公眾講會要求佢哋交報告。有串咀網民就話頭一次「死線」份報告都未交得出，就經已死第二次，官府若果想收到份正確及詳盡嘅報告，睇怕都要等專營權完結後一年半載，至有望收到。庶民們喺專營權到期之前，都係要自求多福各自執生，好大機會「死線」重臨，大家重回石器時代。

諮詢變投票（下）

「政制發展第二階段諮詢結束不到十日，特區政府、行政會極速分析了十六萬多份意見，並完成基本法附件一行政長官產生辦法修正案（草案）、附件二立法會產生辦法修正案（草案）討論」。以上係一直為「二加二」護航嘅「主流媒體」頭條內文。今次嘅「諮詢」可謂創多個官府歷史先河。首先第一輪「諮詢」只花兩個禮拜，就「搵到主流意見」方案。就連民署垃圾桶搬唔搬都用咗唔止兩個禮拜諮詢，真係快到無朋友。而首輪政改諮詢一月完成，收咗二千幾份「意見」，唔知係唔係官府真係好認真咁去處理諮詢所得嘅意見，官府要花成個多月時間去處理呢批意見，然後制訂第二輪「諮詢」嘅草案。當「諮詢草案」出台嘅時候，「管家婆」話到明只係俾大家作參考，可以有唔同意見咁話。去到第二輪諮詢都只係花咗一個月多少少嘅時間，就完成咗多場「諮詢會」。但係由於官府制訂嘅「諮詢方案」引起坊間好大反應，成功引發正反雙方集中只討論加減問題。除咗官府之外唔少團體都各自發起政改研討會，論壇等。最後官府收到有成十六萬幾嘅「政改意見」，當中大部分都係影印單張上簽名嘅「意見紙」，再次證實官府轉移視線手法奏效，將第二輪原本應該係諮詢，改為投票決議。睇返「主流媒體」嘅頭條，就連佢哋都拜服官府可以用咁短時間，極速完成到十六萬份「意見」分析，仲要連「行會」討論都完成埋準備提交「垃圾會」。其實無他嘅，只要大家理解官府第二輪嘅「諮詢」變咗做「投票」，就能夠明白官府如何能以極速0.75秒去處理一份「政改意見」。若果將十六萬份「意見」視為十六萬票，仲只有正反兩面，「點票」一日都嫌慢啦！

輸打贏要（上）

一如所料，官府硬推「方案」製造「民意」，唔理好醜核突務求盡快將「社團意願」擺上議事日程，務求速速表決後將個波交回阿爺，以便盡快逃離阿爺向知縣交出嘅試題免生枝節。連日嚟官府所「收集」到嘅「民意」數量可謂十分龐大，每次當有「特大社團組織」向官府遞交意見，例牌都會喺「主流媒體」見到一張「歡樂滿東華交支票式」交接相，雙方人員前面總有幾大紙皮箱作道具之用。大家當然都唔會理會其發水成分有幾多，事關官府講到明係人都可以發表意見，不論八十歲長者以至三歲孩童，更加唔會有種族同地域界限，亦唔理你係路過小城嘅遊客、抑或係玩完幾手無聊無嘢做嘅自由行，只要有呼吸有心跳，都可以對小城政改發表意見。官府公佈話收到十六萬多分意見，我就話官府實在太謙啦，至少都有成億份意見至啱，反正官府收集嘅所謂民意原來唔需要一定係小城住民，早知搵埋屋企隻狗打手印做簽名，至少點都有代表性過被非洲自由行發表對小城政改嘅「意見」。之不過今次收集「意見」，官府嘅雙重標準又再登場。因為十六萬幾份意見中，唔少都係表格式大量影印之後，就咁簽個名上去就成為「意見」，官府話係一份一份咁計數。不過唔少庶民都係心水好清嘅，喺去年保育小潭山一役，學社搞街頭簽名反對起屏風樓，集合咗二千幾個簽名遞交俾官府，但係官府就當二千幾份意見係一個意見。官府今次嘅處理方式除咗係唔理好醜之外，仲係輸打贏要，但係竟然夠膽死咁大聲講呢個政改係「向前走」，根本就係大倒退至真。

地上最強剩女（下）

如今「諮詢」告一段落，各大「主流媒體」即刻將所有「諮詢」話題抹走，對於官府咁核突處理政改諮詢，唔少人都睇唔過眼「被主流」，為咗對「被消失的聲音」發表不滿，有網民同學者走到電視台遞信，抗議其「新聞才查fit人」無作平衡報道。其實佢哋都好應該去埋其他「主流媒體」抗議，不過可能理據上其他「主流」只不過係收咗官府利益嘅私人機構，所以無得投訴，只不過係媒體水平咁低劣，至少都應該投訴吓佢哋影響市容。本來以為事件暫告一段落，點知又撞啱知縣出席「插問大會」，斷估最多都係學社三子會有動機向知縣提出政改諮詢嘅「插問」，不過勢估唔到連既得利益嘅商界間選代表，都會向知縣提出庶民唔理解政改嘅「插問」。大家放心佢唔係忽然民主良心發現，佢只不過係代表利益界向知縣講，單嘢造假都要造得精明啲，唔好搵班二打六嚟造就諗住可以呃到飯食，要學葛優教落「廣告做得大，老翻都變名牌」，質疑知縣處理宣傳手法不足咁解。不過問題係今次根本就唔係知縣才查fit，實際操作係喺小城金鑽剩女「管家婆」。「管家婆」穩坐第二把交椅十餘年，從來都未見佢會有乜建樹，大家幾時見過小城官府有咁高效率呢？偏偏佢最有「政績」嘅，就係廿三條同埋今次嘅「政改諮詢」。咁耐以嚟官府不斷倡議嘅法律改革，到今日大家見到有乜成效呢？庶民最關心嘅「土地法」、「城規法」（好似話想趕今年，大家等吓啦！），甚至連「環保法」都無一條可以喺佢十三年嚟政治生涯上處理好，反而既得利益最關心嘅「廿三條」同「政改諮詢」就可以咁快做好，「管家婆」個名當之無愧！

地上最強剩女（上）

鄰埠剩女話題橫行，輿論毀譽參半。無他者因為有人肯拋個身出嚟，自然有更多人鍾意發表意見指指點點，雖然有性別歧視之嫌，但絕對滿足一眾師奶們八卦心態。唔少學者指節目低級兼無聊，但呢啲節目就係適合大部分人想講是非但又怕被講者會搵自己算賬，依家有三唔識七嘅人肯向大眾展示自己「所謂真實」一面，就算娛樂性不足但話題性都夠晒。同樣官府一輪衝鋒咁搞咗幾個月嘅政改「諮詢」，雖然話咁快就落咗幕，但娛樂性同話題性都十分夠。大家首先唔好咁大反應，以為小弟會輕視呢個咁嚴肅問題。只係睇番官府聯同部分社團、官媒及一眾「聽話大報」點樣「製造」民意，即時覺得娛樂性十足，仲好睇過鄰埠豬狼對決。事關官府首先要「造起個市」，將首輪諮詢嚴格控制喺「意見範圍」之內，三扒兩撥就整到個方向性民意搞第二輪諮詢，然後再發動金權力量，透過官媒同「受惠機構」一齊宣揚「指定意向」。係唔係好熟面口呢！無錯，就等於早排趙文卓搵水軍浸死甄子丹一樣。鋪天蓋地式嘅「署名」打手，其行動模式與背後動機都十分相似，但組織性同嚴謹性就欠奉。
　事關竟然被人影到搵幾歲小朋友簽名支持2+2，張表上面仲係無得揀只有一套。佢哋究竟知唔知出動水軍呢招，根本只可用喺網上，並唔適合喺地面上玩。難為被鏡頭對住嗰位未經訓練嘅死士，只能夠搬出「你搵我哋負責人啦，我答唔到你嘅問題！」，佢差在未講埋「大佬！搵餐飯食啫，唔使玩咁大化？」。咁低水平就想做地上最強，真係想問吓佢哋究竟有無腦！

釣魚台手法（下）

陽國醜陋地試圖佔有「釣魚台」手法，官府嘅政改諮詢上學到足。官府不斷用各種手法試圖影響民意結果，到有團體搵獨立第三者，作客觀民意調查時，官媒又斷章取義轉移視線，將「新聞」改到適合自己意願之角度出街，好等下次有機會再利用，果然係無所不用其極。慶幸嘅係庶民都係清醒嘅，再加上仲有其他渠道可以發表個人意見，暫時官府仲未能隻手遮天。只不過喺今次嘅諮詢過程，令到好多以為小城係言論自由、同官府對政改態度相對開放嘅人另眼相看。兩輪諮詢會中庶民能夠參與者，合共就只有四場，當中能夠發言者更加係寥寥可數，而且當中更加插唔少其他界別諮詢會上發言，或在席且熟口熟面人士，呢種諮詢能夠有幾大代表性根本就係一個謎。大家只要上吓網就可以發現，唔少嘅「公眾諮詢會」上有幸被欽點能夠發言嘅人士，大部分都身居社團、以至利益界別要職，佢哋企圖以平民身分喺台上發言，好簡單就被網民大起底。所以官府刻意操控民意，不過就過唔到眼利嘅庶民。而且今次仲令到好多人發現，官府發動嘅宣傳機器同阻止言論嘅手段可以有幾多種。淨係睇最後一場「諮詢會」上，對未有任何行動嘅人強行要求「遮住件衫」，爭論之下結果被強行帶走，足見官府有幾多容忍嘅胸襟。同國家發言人所講嘅一樣，就算太陽國對「釣魚台」做乜嘢，都改變唔到「釣魚台」係我國領土一部分。而今次所謂「諮詢」過程中無論官府做乜嘢，都改變唔到大家反對「一加一」或者係「二加二」嘅事實，就算官府想製造既定事實假象，到明年「垃圾會」直選選舉上，大家就可以見證離棄人民會有乜嘢下場。

釣魚台手法（上）

早幾日太陽國首都市長，公開表示會利用首都官府嘅錢，去買下同祖國有爭議之「尖閣諸島」，即係大家嘅「釣魚台」，佢哋話如果由國家擁有之後，咁樣可以避免咗好多爭議，避免咗咁多年嚟都會同鄰近國家發生嘅冷熱問題。大家可能唔清楚，世上曾經有個國家叫做「琉球王國」，佢哋嘅版圖大概係今日好多人都會去玩嘅沖繩一帶。好多人都知道當年花旗國戰勝咗太陽國之後，「管治」嘅太陽國一段時間，到佢哋認為太陽國經已輸得心服口服之後，至將個管理權交返俾太陽國自己，而順便為咗限制祖國嘅發展，將「釣魚台」等嘅琉球王國國土，交咗俾太陽國管理，結果引發咗長達幾廿年嘅「保釣事件」。不過大家喺將矛頭指向太陽國嘅同時，都會諗點解當時國家唔盡全力取回所有流失海外嘅領土，當然包括埋寶島啦。只係當年國力弱無能力打外島戰，結果咁多年都只係口頭上叫太陽國唔好咁過份，從來都無動手動腳話攞返個島，結果今日被人「蝦」到上心口。而今年小城開始傾政制改革，官府做完一大場戲之後，到第二輪「公眾諮詢」時，官媒聯同各大社團、金權組織、利益集團等不斷唱好官府提出嘅所謂「經諮詢後得出之民意」，又派出大量打手出文發表，甚至連風水師都出埋，目的就係想將「二加二」及「一加一」製造成既定方向，好等最後硬交「垃圾會」審批，到時就可以順順利利咁過渡，唔使改變遊戲規則。官府努力製造既定事實假象，同太陽國所用嘅手法一模一樣，先有既定目的、再努力製造現象、然後達到所得之結果。

官府帶頭犯法（下）

小城土地緊缺要向阿爺求救借地同填海，但係又出現塊地賣咗但係又被閒置，而「麵粉」唔夠嘅情況卻引誘咗唔少人非法霸地開地，過去幾年官府都不時公佈收返幾多幅非法霸地同開地。但係官府咁耐以嚟一直都只係進行接收非法地，而從來無主動監察官地有無被人非法開墾，次次都係被人發現大面積開墾，將生態環境破壞到體無完膚之後，官府至出手將其收歸國有，然後另覓發展用途，更加無進行過回復原貌嘅舉動。好似舊年官府收返嚟一幅非法填塘得出嚟嘅非法用地，隔咗成年之後，早輪因為駐軍獲批地擴建軍營，當局竟然準備將需要搬遷嘅交通安全資訊中心，安排係呢幅被非法填塘得出嚟嘅所謂「土地」上面。原本有人非法開墾土地，官府一般除咗要收回之外，至少都應該對違法者進行懲罰例如收監或者罰款等，最後更應該要違法者還原其土地面貌先至合理。不過小城班不知所謂嘅官員，收地又驚被人打，只要無人承認自己係非法開墾者就唔再去追究，除咗收返塊地之外就乜都唔做。原本該地應該係一個池塘，乃小城有名嘅季候鳥棲息地，官府本來就有權要違法者回復原貌，若果查唔出邊個犯法，官府都有責任將該地貌回復，好等小城僅有嘅生態區能夠繼續運作。再講小城都有個環保局，但係佢哋就淨係識得使錢搞埋晒啲環保會展、出錢資助購買環保產品等，完全只會從商業角度考慮，未見過佢哋保育過乜嘢環境。焚化爐同小潭山事件一次又一次證明呢個環保局，再加上今次官府帶頭使用非法得嚟嘅土地，小城根本就唔會有可持續發展嘅綠色未來。

貴價麵粉養蚊（上）

小城土地唔夠早就人所共知，加上近年經濟火紅而導致炒賣熾熱，「石頭」業界中嘅「麵粉」一直缺貨，而官府至今咁多年嚟，亦只進行過兩次公開拍賣，其餘全部都係以批給形式批出，坊間唔少人都直指官府利益輸送，「走資司長」事件證明咗官府權力經已去到無法無天嘅境界。而早年官府拍賣嘅「天價」官地，近日就有街坊直指「咁多年嚟郁都未郁過」，圍板之後除咗無進行發展，仲堆滿垃圾雜物，淪為養蚊場。而另一幅因為圍板都無做，更加有人利用呢幅十幾億嘅地，索性喺荒廢地上開闢菜田進行耕種。另外亦有唔少重型車輛利用該地作為停車場，甚至係車輛廢置地。由於該地段推出競投時，乃係上任知縣掌權最受庶民質疑嘅時期，而投得該地段嘅發展商則與上任知縣老友鬼鬼，當年早就有流言話該發展商以「天價」進行「托市」，目的都係為咗幫老友做番場戲，好等上任知縣唔好被人鬧得咁緊要。終於幾年後嘅今日，塊地無開發過之餘，仲荒廢到養蚊養草，破壞附近衛生環境，影響居民健康。雖然件嘢賣咗人哋點用係人哋嘅事，但係官府賣嘅件嘢係塊地，唔係一部手提電話或者一部車，可以收埋喺衫袋或停車場，塊地只會暴露喺空氣同太陽底下，無得收埋或遮醜。官府當日匆匆拍賣兩幅地去托市造勢，買家亦求其應酬高價買入，結果雙方都無諗過最終將塊地點用。但係咁都唔代表官府可以乜都唔做，至少衛生當局都可以用衛生理由，責令業主清理垃圾同埋加建圍板。至於是否作大型車輛停車場，則要視乎業主是否免費開放俾大型車停泊，甚至係私人停車場，官府都應該有權作某程度上嘅規管，總比任由閒置養蚊嚟危害庶民健康好得多。

搵嚟搞（下）

官府今次提出嘅招標競投，無非都係按照最新環保規定嚟制訂標書之要求。只不過今次官府突然出手招標競投，以一貫「殺到埋身至算」嘅小城做嘢心態，好多業界同商人都諗唔到會咁快就要面對新嘅環保規則，所以近日不斷喺各大媒體出口術，叫大家要落足心機至好投標，又表示新嘅歐四要求太嚴格同有違環保之意，試圖轉移公眾視線向官府施壓收返要面對歐四嘅要求。
　世界環保大趨勢，要更迎合減排低碳嘅生活，官府喺標書中選用更嚴格嘅環保車輛本來就無可厚非。只可惜今次官府制訂標書者根本無按照實際情況收集足夠嘅資訊，又無預計到場聽標者根本就唔明官府所訂要求為何物。以至喺解標日負責官員被在場司機問到口啞啞。呢啲咁唔專業嘅表現，證明咗官府今次訂標一開始就無經過詳細討論同諮詢，亦都無做過一個有系統嘅資料搜集。事關今次招標競投只有約三個禮拜時間，有意投標者喺官府公佈發牌後即時喺市面搜羅相關規定車輛之資訊，按照有意投標者得返嚟嘅資料顯示，代理商根本無辦法答到佢哋幾時有車可以到小城，咁就梗係連車價係幾多都唔知啦。不過官府一直堅持市面上有車提供，好明顯大家所理解嘅車可能根本有出入，不過標書上每個人嘅理解都唔同，而事實上對於一般唔多理解商業汽車運作嘅門外漢，要理解歐盟四期標準根本談何容易？更加唔好話要搵核准咗嘅款式，筆者試過按官府教落，上去交通事務局嘅網站搵相關核准車輛嘅資料，可以同大家講搵咗成朝，幾經辛苦至搵到官府所謂嘅十幾個款式，不過既然官府早就有既定方向邊種車符合要求，早就應該喺說明會上向大家宣佈甚至派發單張俾有意競投者，免卻要延期同遭人垢弊之煩惱，根本官府今次係自己搵嚟搞。

願者上吊（上）

官府為解決小城「搭車難」問題，特意開發兩百個八年期的士牌作套戥。不過由開標競投至今，不時被業界團體、商會以至前線司機批評開標競投唔合理，而且亦未能於市場上找到合乎條件之環保車輛，最終官府都要將截標期延長七日，好讓有意競投者有充份時間作市場調查及收集資訊，方能提出合理嘅落標價作競投。
　作為小城公交之一嘅的士，本身就唔係一個公平參與嘅服務性行業。礙於發牌制度及收費標準以至車身顏色等都被官府限死咗，咁多年以嚟呢個行業形成咗車主（牌主）同司機嘅租賃關係，基本上已經同服務完全脫離關係。而庶民則覺得「有幸」能搭上的士經已十分滿足，根本就唔敢奢望的士仲會提供乜嘢服務。唔少業界人士甚至前線司機都明言，就算官府多發一批的士牌，都唔能夠改變司機唔肯入舊區接載乘客。始終的士行業乃一門生意，無義務為官府解決舊區庶民出行問題，除非官府喺發牌制度上附上特定條件，否則點都唔可能解決問題。按照業界嘅邏輯推斷，既然相關人士都講到明呢一行係自由商業運作，而官府又係以競投形式招標，照理只會有願者上吊，條件合理與否只會睇投標者意願。就算行內業界認為條件幾咁差，只要有人認為條數計得掂，都可以入紙落標進行競投，若果真正條件太差，最多都只會造成無人落標競投，到時官府自然會改變投標條件。況且每個人都有自己嘅經營模式同底線，唔可以因為行家話唔合理，就唔俾人落標競投甚至要官府遷就自己接收市場資訊，延長截標時間。

蠱惑仔之戰無不勝（下）

另一個官府假諮詢，梗係近期熱炒嘅「政改諮詢方案」。由首階段八場諮詢只開放一場俾公眾參與，到第二輪諮詢文本只提兩個無分別嘅方案俾大家揀，而其他就歸納做其他，即係唔入流咁話。首輪諮詢本身早就設定咗一至七場次都係向「間選社團」同埋「政法利益」界別進行「諮詢」，七場裡面發言者個個都熟口熟面橫跨多個界別。到咗公眾諮詢一場又刻意安排報名抽選發言，想要控制同左右「民意」真係有幾難吖！就連鄰埠揀咗隻狼嚟管都話佢高民望，大家就明白「民意」嘅解釋，只要唔提數字可以有好大落差。到咗第二輪諮詢文本出檯，官府就以「廣納民意基礎」底下，制定咗「梅香鹹魚蛋白炒飯」或「鹹乾鹹魚蒸肉餅飯」兩個套餐俾大家揀。來屆嘅遊戲玩法只可以喺兩款鹹魚中揀一款，只不過係有得揀炒飯或蒸飯，同而家嘅齋啃鹹魚分別唔大。而睇番官網上公佈嘅「民意收集」，除網上民意外最「正斗」嘅係親身遞交之意見文本。絕大部分意見文本都係由表格製成，最精彩嘅莫過於由人手填上姓名再加兩段說明嘅「授權書」形式「意見」，唔使問都知叫人填表嘅只會叫填表人「簽咗佢」就搞掂。睇埋小城人口比例，將十五歲以下同五十五歲以上三個分組比例加埋一齊，都佔咗小城人口三成，只要既得利益集團下令、公公婆婆簽個名就有米派，咁就自然可以收到唔少只有簽名嘅「授權式意見書」。而「有得揀」嘅意見表格甚至連「一加一」都無列出，由此可見「社團操控式民調」比官僚更官僚，而官府嘅「民調」就自然可以「戰無不勝」。

蠱惑仔之隻手遮天（上）

官府假諮詢嘅手法，經已去到無所不用其極嘅地步。從「新聞法」及「出版法」嘅諮詢中就可以睇到，官府不斷出招收集「既定民意」，幾場諮詢搵搵埋埋班媒體老闆、管理人員嚟諮詢，肯定無走雞。事關呢班老闆個個都收緊官府錢，唔係邊有錢搞傳媒同出版？而小城嘅所謂電子傳媒，最終都只有「官媒」一家，其餘兩家根本都廢時睬你。不過面對前線工作人員嘅採編、評論員以至大部分專欄作者，強力嘅反彈根本就唔輪到官府博懵。結果無計之下搵人搞個「商議式民調」，諗住搵多些少嘢扌查下手。可惜嘅係官府個隴嘢早就被人睇穿，前線人員自然窮追猛打誓保言論空間同新聞自由。卒之近排官府態度有所轉變，唔敢再硬推或者係再搞其他無厘頭民調，只謂仲要聽取法律部門嘅意見，等埋八月底備受爭議嘅「商議式民調」報告出埋，先至草擬下一階段嘅諮詢文本。事關兩法令官權坐大，容許官府監察傳媒變相收緊新聞自由，明眼人一睇就睇穿。以今時今日小城嘅「自我河蟹」文化咁盛行，前線編採就算未被將來之委員會審議之前，早就被自家內部之高層老總、老闆以至主編等管理層「整理」。就算新聞自由度更高之鄰埠，亦發生著名評論被主編「幫忙潤飾」之下「改變立場」。大家可以想像一下若果兩法皆通過，到時候官府仲有乜嘢諮詢嘅需要呢？只要唔啱聽嘅嘢出現，就可以利用審議機制封殺反對聲音。所以只要係呢條法例上能夠過到骨，對官府日後推出任何措施、議案等都有好大嘅幫助，因為就算有人反對都無人會知，到時候官府就可以為所欲為隻手遮天。

鬧劇（下）

新方案唔理係2+2或者係1+1，都係直間一齊加，但係就唔知點樣叫做體現民主。提案一方話咁樣會提高庶民參與度，可以俾多啲人一齊玩咁話。老老實實，大家有份參與嘅一場戲，就算無份做主角，至少個主角都要大家認同至可以擔戲。大家只要睇吓鄰埠正在上演緊套「動物失樂園」，就知道只要主角不被認同，就會上演呢類「群毆戲」個個被人打到豬頭咁。睇返小城呢檯戲，悶到抽筋之餘又唔俾大家時間去消化套戲嘅內容。場場戲都無過場時間話諮詢就諮詢，又專登隱藏伏線唔俾大家知中間發生過乜，結局自然唔合理犯駁多，就等同荷里活三流科幻片一樣得過快字，過咗海就神仙。套戲要令人受落最低限度要吸引佢哋參與其中，若果套戲都未開始就話俾大家聽，套戲嘅結果係咁樣，大家會唔會有興趣去睇呢？大家最唔明嘅係大家就算點參與去搵代表自己嘅代理人，加埋都唔夠被自己無份選嘅人數。而且呢幾日有唔少人發表間選有其代表性，當然有啦！佢代表咗全民參與嘅戲裡面，有部分人係可以唔止投一次票，而最抵死嘅係，所謂嘅專業界別裡面，根本就無投票嘅常識，只係有投票嘅共識，部分甚至係參選與否嘅共識，咁就真係大家首先要對「民主」一詞有共識至得囉。講真若果話要以增加間選議席去擴大代表範圍，首先應該要增加外勞界，同賭場酒店界。事關兩個界別佔咗小城嘅GDP差唔多有四成，佔庫房收入更加達到七成幾。所以增加間選議席根本就係一套鬧劇，比祖國村民嘅思維更加落後。

場戲要繼續做(上)

自從阿爺叫大家諗吓以後自己嘅政制發展要點樣走落去之後，官府就匆匆搞咗幾場所謂「諮詢」，三扒兩撥就集合咗「民意」，係咁意推出個1+1同2+2兩個方案，官府首階段咁就叫做交咗功課。當然交功課就唔等於收貨，有問題一定要繼續講。喺眾多「諮詢」裏面，都有唔少「學者」「專家」，同埋有身分地位人士又玩返基本法規定，然後又連立法者嘅諗法、「立法原意」都解讀埋，好似大家都一同有份立法咁。當然，小城任何嘢都唔可以違背基本法，拎佢出嚟係必然嘅。問題係阿爺叫得大家諗，就係想大家改變吓，唔係叫你做個樣俾阿爺睇就算。呢個所謂諮詢文本只係得2+2同1+1，相比之下只係攤薄咗官委嘅影響力，實則同「舊屎」無乜分別。「管家婆」叫大家唔好執著於數字上面，強調呢份文本係尊重小城歷史傳統同埋「民意」而制定。不過實際上呢次官府挾「六成幾民意」，預咗所制定嘅諮詢方案一定會係咁。之不過如果話要尊重小城歷史，官府大可直接話加話減就得，過去根本都唔多會理庶民睇法，反正依家第二階段文本嘅諮詢，亦都快到無輪地搞咗兩場，而大家要討論同發表嘅意見，都只係圍繞住文本內容去討論，亦都睇唔到官府會有意提出乜嘢新思維同新建議，到時候交到上垃圾會嘅提案，今時今日都可以估到係點。反正現在連部分經歷過直選洗禮嘅代議士，都竟然會支持增加間選而擔心直選太多，呢種唔相信庶民嘅態度，又點可能代表庶民發聲呢！而一班既得利益者更加將「官府民意」發揚光大，用「否定主流就係罔顧事實」嚟反駁假諮詢論。無計，反正場戲要繼續做落去，大家又拭目以待睇埋下半場吧！

有無心規管？（下）

「青蛙巴」咁多意外，根本就有好多內外因素形成。首先「先天不足」嘅係採用車輛根本就唔符合大眾運輸要求。「青蛙巴」早就被人踢爆用「學生巴」代替正規公巴使用，結果有搭乘或者路過人士都非傷則亡，就算司機們幾好身手，都唔能夠避開前後門上落客之盲點，好彩者最多夾傷手腳，唔好彩嘅就被送多一程提早埋單。另外，有人歸咎人手唔夠係「青蛙巴」出事嘅主因。不過人手唔夠就唔單止係「青蛙巴」獨有，其他黃巴橙巴都唔夠人，又唔見人哋出咁多事？所以問題係關乎管理方面。公司內部為咗要「達標」，鼓勵司機努力走多兩轉提供獎賞，不過新嘅公司喺培訓方面時間同經驗都唔夠，再加上咁大隊伍所要求嘅人力，自然會有好多新手或者係唔同工種嘅司機參與，結果造成唔理好醜最緊要出車率達標嘅公司文化，所以至有輪下亡魂。情況同的士一樣，依家全城都話搭唔到的士，甚至連機場碼頭嘅遊客都話截唔到車。而舊區乘客更加唔使截，電召都無的士肯「入城」載客上路，咁算乜嘢公交呢？肥局長建議發多兩百個牌增加供應，不過大家都唔睇好發多二百個牌，會幫助到舊城區庶民出行。反而有人提出不如官府可以全發的士牌係人都可以申請，只要合乎技術者就可以用定額申請牌照，乜嘢人只要有車都可以成為的士司機，到時候差唔多所有私家車都可以成為的士，咁就唔慌無的士搭。不過改變政策要官府收回成千個每個價值幾百萬嘅的士牌，都唔係一朝一夕嘅事，倒不如解決咗黃的唔聽Call接客嘅問題先仲好啦，反正重回正軌之後，至少有五十部的士會按照客人電召，駛入舊區接載庶民出行解決燃眉之急，問題都係睇吓當局有無心去規管。

仲要死幾多至夠？（上）

「青蛙巴」又出事，一眾老闆自然無眼睇，但係要搞到全世界火晒，阿局長先至肯出面解吓畫講番兩句，不過眾所周知嘅都係肺腑之言，等於「廢話」。事關佢同大部分嘅官一樣都只係識一句：「我哋會關注！」。送外賣阿叔即刻話：「你試吓唔關注丫，我即刻去老廉度告你收錢唔做嘢！」。不過好老實，小城收錢唔做嘢嘅人大把啦！求其搵個輕軌、建設辦、運輸基建辦、焚化爐、環保局、有線、電訊公司連同電信管理局等……，要數都有排你數，唔理官企大家都收咗錢唔做嘢。淨係插佢一個好似又於理不合，問題係今期佢管正嗰瓣死人兼傷殘，加上每次貴局有所動作，都唔慌會係好嘢，掘大動脈你又話黑暗期，好啦俾你出到術大半年之後至係黑暗，依家又話到輕軌開工，黑暗程度比上次高成五倍咁多，次次你都放流料玩事先張揚連恐嚇，唔插你又插邊個呢？當初你老頂話要處理小城交通，俾個權你話事就係叫你搞掂佢而唔係叫你搞壞佢，發多一個牌出嚟你又貪新公司條件好，批晒最搵錢嘅線路俾佢哋，搞到而家三日唔埋又死人又殘廢，咁樣點叫做搞好佢？本來要你一個人啃晒就唔係好公平，但係無人叫你咁趕做嘢亂咁簽約嘅，你話份約寫明每次出事要罰三至五萬，而要釘牌或者收回路線再批過，要罰夠成百萬至可以，咁大家想問吓到今時今日「青蛙巴」究竟有無被罰過錢？今次一死一殘又會要罰幾多錢？是否閣下所言三至五萬一次？如果係咁計，莫非小城要死多廿幾卅人，局長至會將「青蛙巴」釘牌或者收回經營路線？

俾人有位入（下）

影開相嘅朋友都知道，喺小城要影一張靚相，首要功夫係識得點樣避開滿天亂飛嘅唔知乜嘢線。當中夾雜咗公天、天眼、電纜電話線，間中還附送底褲毛巾等「手信」，而有線亦係其中一份子。礙於上手洋鬼子明偷運錢，兩個官府又隻眼開閉犧牲小城庶民利益，至會搞個有線出嚟。終於連玩大咗嘅外資都知難而退嘅時候，竟然有間龍頭公天想鯨吞業界買起咗間有線，凸顯法治矛盾，迫令官府作出裁決。問題係一個無認受性嘅所謂專營，除咗唔得民心之外，更重要嘅係佢與大眾為敵控制資訊，到頭來只會被社會淘汰。今日科技一日千里，電話線早就代替咗上一代嘅訊號線，只係小城被一眾專營所包圍，根本就唔會開發乜嘢新技術，一直依靠食老本就夠，結果就出現早前小城斷六親六粒鐘嘅狀態。今日嘅科技就連普通入屋嘅電纜，都能夠同時傳送訊息及話音，官府到時又要點樣規管新技術嘅進入？再者無線技術越趨成熟，「生滋」完又「死滋」，甚至隔空送電嘅技術都經已面世投產，官府到時候係唔係又「加強關注」「持續監察」呢？定係依然故我搞多三五七個專營出嚟，等大家都有生意做而再一次犧牲庶民？若果著作版權法真係有迫切性要趕緊立法，其實亦可以立一個附件將現今官府面對之兩難局面，作附件式收錄而分開處理，既可以唔阻礙立法程序，亦有效暫時保障庶民一直沿用嘅生活習慣，更可避免官府直接面對行政同立法之間嘅衝突，基本嘅三贏局面官府咁耐都搞唔掂，難怪一直被「龍頭」帶位玩之餘，亦使官府「投鼠忌器」，喺解決問題之前俾「龍頭」有位入，可以爭取到更大利益。

點解決？（上）

官府突然將轉播訊號納入著作版權法，規管未經授權的非法轉播刑事化，令到多間公天一夜之間停播十幾個視訊頻道，搞到多區居民叫苦連天。事關一向小城庶民嘅休閒娛樂真係無乜，最慳錢嘅除咗買副棋返屋企玩之外，其餘就係五花八門、資訊多元而傳播力強大嘅免費電視。就算依家網絡流行，以最平價嘅統一月費任用上網，都貴過今日公天五六倍收費。況且小城庶民一路習慣開精明格價，突然間無晒平日好平咁睇開嘅電視台，唔即刻搵官府抗議至奇。有意見指官府今次刻意喺最後階段至將非法轉播視訊列為刑事化，目的係偏幫有線，更有評論認為目前非法轉播最多者，乃寶島嘅視頻訊號，而寶島嘅民主化又係華人地區最先進之一，官府規管視頻轉播，有阻隔資訊流通以達至穩定本身管治之嫌。平心而論，又未必要去到咁陰謀論嘅。吾乃由細睇電視睇到大，小城過去一直都係接受外來之二手資訊，細路仔時每二個月就要陪老豆一齊上天台較「魚骨」。到咗小城終於有自己嘅電視台，「魚骨」經已退役咗好耐，公天早就入屋無麻煩，只係間自己嘅電視台到今時今日都未被庶民認受，難聽啲講句直頭係用嚟踩嘅箭靶之一。今日公天俾到大家嘅，係受阻隔下有限度嘅自由，講合法就梗係唔合法，就連兩家以小城命名嘅衛星電視台，大家連點樣可以入到屋都未知，更唔好講官府打造嘅衛視淨係識播狗馬。情況就同電訊局取締「易滋」一樣，話「咳」就「咳」！唔好話庶民橫蠻無理，大家去「銷毀會」投訴，佢哋都解釋唔到點處理好，點解有線可以話加台就加台而公天就唔得呢？但係減台要投訴有線就話合約寫明，咁官府點樣批個牌出嚟？就算條法例大家都明要咁樣行，首先都係要解決咗有線問題至好落實，否則一定有唔少訴訟等住官府應對。

減少事發機率（下）

今時今日資訊流通咁快咁廣，而且社會風氣越嚟越開放，到而家都仲係講要關注青少年，或者係建議加強罰則阻嚇，加強性教育及培養正確價值觀。講真，依家連大人嘅價值觀有幾正確都備受質疑嘅年代，你叫各位青少年點樣分清乜嘢叫「正確價值觀」呢？齋睇鄰埠豬代表喺知縣選舉咁嘅道德價值，你就知道成人或名人嘅價值觀有幾正確。借問大家點同青少年解釋性只係「大人至做得，細路仔唔做得」？而且往往成人嘅道德標準同價值觀，比青少年更加低同差。莫非今日仲有成年人相信十一二歲「小朋友」，唔知性行為會導致懷孕？小朋友只係抱住「無咁橋」嘅心態，再加上情到濃時唔理咁多嘅一時衝動，咁就出咗事。咁樣同市面上嘅所有出軌男女之行為有乜分別？分別在「出軌男女」會更加識得掩飾佢哋嘅不軌行為，至少係確保「無手尾」。所以要責備青少年，唔該各位先做好自己，唔好得把口講。大人就算唔係小朋友嘅學習對象，但至少都係參考對象之一，「講就天下無敵」又叫小朋友點樣信服大家呢？況且「禁忌遊戲」往往係最吸引嘅，連成人都逃唔出呢種引誘，但係要求小朋友有能力拒絕，理據何在？大家行街睇戲食飯買嘢，全部都充滿「性引誘」，除非大家有能力禁制呢種最強大嘅商業手段，否則唔該咪做道德塔利班，如果唔係你會被人串得好瘀。
　所以，其實而家好多新一代家長，都會教導下一代做都要做得安全。因為越禁制反叛越大，反而早啲俾下一代知搞大咗自己要受，俾佢哋知道要負嘅責任同代價有幾大，這時青少年反而唔會亂嚟。至於去到「被侵犯」呢個位，就算幾安全嘅環境，都有機會出事，大家唯有盡力教佢哋識得點樣保護自己，至少都可以減少事發嘅機率。

又要浸豬籠？（上）

又有未成年少女珠胎暗結，由於事件驚動到衙門，即刻成為報章頭條。事關計埋呢單，經已係衙門今個月內處理嘅第三單涉未成年發生性關係嘅案件。新聞紙諗都唔諗就將三單案件合埋一齊處理，然後又搵代議士同道德社團出嚟展示要關注乜乜咁。
　老老實實，年年都有未成年少女珠胎暗結，次次新聞紙都只係識用咁嘅手法去處理新聞，你唔悶我都厭啦。況且呢單同之前兩單基本性質上有好大不同：第一單係法定成年男子明知對方未夠秤，都同對方發生關係，雙方自願。第二單係未夠秤口靚仔睇鹹片上咗腦，侵犯六歲女童，明顯係強暴。至於最新近呢單，係兩情相悅下發生關係但兩個都未夠秤，結果有咗餡至爆出嚟。三單裏面唯有第二單符合「性侵」資格，唔明某報點解係都要屈今次個少男「性侵」個女仔「成孕」呢？莫非真係男女獨處一室，女仔一定損失？只係因為女性事後生理上有手尾要跟，所以個男就一定要變成性侵？而且女性較男性早熟，今次兩人相距只有兩歲同樣唔夠秤，唔可以講一定邊個呃邊個，小城法律上都會公平對待，就算衙門都只係講有強烈跡象，某報無理由未審先判將少年打成「性侵」，唔通某報想做埋判官嗰份，抑或要小城返去舊時浸豬籠時代？似乎被受爭議嘅「出版法」同「新聞法」最應該規管嘅就係呢種言論，作為某報喺小城咁有影響力嘅媒體，係唔係更加應該對事件作出持平同理性嘅態度而唔係只爭道德高點呢？若果係咁大報首先應該將佢哋版面上嘅情色廣告立即抽走。或者係訂立「新聞法」時，將某報列為三級禁止十八歲以下人士購買同閱讀，咁樣先至可以保障到未成年人，否則邊個夠膽包有未成年人，係會因為睇到份報紙廣告而「性侵」其他女童？

「斷線行動」（下）

「斷線行動」為小城發展敲響警號，小城嘅急速發展從根本上改變咗庶民嘅生活模式，再唔係以往漁村式生活可以求求其其過一日。今次電話公司就話俾大家聽佢哋幾有影響力有幾重要，只要機樓一跪低，小城隨時變死城與外界隔絕。今次小城通訊咁樣出事，好彩嘅係除咗被庶民鬧爆之外，竟然又無乜好大鑊嘢發生過。事實上小城一直貫徹阿爺嘅指導方向，發展做世界休閒娛樂城市，就連生活態度都Hea過人。今次一役肯定令唔少仲有興趣喺小城投資嘅外企卻步，點能夠容忍海外公司同總部聯絡唔到六粒鐘咁多呢！可惜嘅係小城官府同權貴一族依然維持漁村生活方式Hea住做，專營合同依然繼續為禍小城。除電話公司之外，仲有幾家最大專營公司，水電煤油到今時今日都喺專營無競爭嘅情況之下一直賺緊庶民錢。油公司話就話係市場開放嘅，好笑嘅係就連幾多錢一升油，都要埋到站開口問先知道，反而會喺媒體上面會報道油價升跌，咁咪即係無得揀囉。煤同油係同一班集團操控更加唔使講。其餘水同埋電，係小城最古老專營公司，以前甚至要持有水電費單去證明閣下真係居於上址。相比於鄰埠同外國好多國家，水資源係戰略資源，所以都設立水務部由官府直接監管，反而小城會判出個合同俾一間公司，令佢哋可以唔理小城水資源保護只需以平價買水，高價出售賺其中間差價。而電就更加唔使講啦，唔貴唔買淨係識用重油發電，油價太貴唔對路，就索性電廠都摺埋走去內地買電，將電廠舊址賣俾其他機構又賺一筆。庶民究竟要忍受呢批專營合約到幾時呢？

「斷線行動」(上)

元宵佳節新年流流，電話公司整番劑新春第一炮「斷線行動」，唔少庶民怨聲載道「媽」聲四起。由於事故發生時間正值放學高峰期，唔少家長同子女失去聯絡後不知所措。當然，其他靠等電話搵食嘅人就更加大鑊，運貨、運人等嘅運輸業首當其衝即時無晒Call。其他金融保險業亦被波及，講講吓保單無晒聲。不幸中之大幸係剛剛大市收咗工，若果唔係就算當小城嘅交成量只及鄰埠十分之一，停咗六粒鐘算佢半日計就足足唔見咗十五億，真係賣埋間公司都唔夠賠。因為斷嘅唔止「聲線」咁簡單，就連「網線」都斷埋。以為唔用電話落盤改做網上交易，唔好意思一樣行唔通。電話公司另一個好彩嘅係，小城仲未有網絡遊戲公司進駐，受影響嘅最多係無得打機嘅小朋友，可惜嘅係外傭幫襯開嘅網吧就多得佢唔少，成班鄉里坐定定睇住熒幕完全無晒反應。最大劑係唔少連鎖店舖依靠網絡與總部連接，先至可以進行庫存甚至銷售。無聲無網之外連最原始嘅短訊都死埋，加上「生滋」無線又落唔番「易滋」，大家手上部「智能手機」即刻變成「低能廢物」只可以玩遊戲。結果受影響用戶直情變咗城中孤島求救無門，因為連緊急求救線路都無，慶幸其間無人被困升降機，或者喺家中病發，否則人命關天就更嚴重。「斷線行動」唯一有益嘅係即時阻止咗好多人網上投注，而老虎機嘅聯網失效，又減少咗大家落注嘅意慾一陣，多多少少都幫咗班問題賭徒。一間獨攬小城絕大部分對內對外溝通嘅通訊公司，竟然發生咁大範圍嘅功能失效事故，今時今日仲係咁嘅服務態度，專營時代係時候作個了斷。

過唔到三代（下）

間選嘅協商方式本來唔係咁差，亦都好切合小城庶民嘅生活態度「我嘈完你幫我講，但唔好話係我講」嘅心態。但正正就係呢種態度下形成嘅制度，令到代表唔成代表，而個制度又無得改善，一路都係一班人去維護自己利益而漠視業界整體，至會發展到庶民今日只會追求直選，起碼條友做唔掂下屆可以搵過另外一個。以今天小城咁樣嘅間選規則，議會內真會五十年不變都唔止，但外面就變到九彩，咁樣又點可能迎合到未來小城發展呢？若果唔係，京城大官又點會開到口，叫知縣檢討吓小城政制點樣改丫？點解阿爺會無端端開口叫知縣檢討政制要唔要改，就係連阿爺都睇唔過眼，京城每次換屆，上嚟投票嘅小城代表，竟然都係同一班人，京官至發現呢班漁村代表，竟然在位仲可以長過我，差啲比烏炊村更加厲害以為官位終身制。眼見連烏炊村代表都係一人一票所產生，身為國家定位「世界級休閒娛樂中心」嘅小城代議士，係唔係應該慚愧呢！就算今日能夠過到關保駕持航，成功維護富二代嘅利益，結果搞到「大袋」嘅身分充其量都只係打手一名，除咗有負祖宗為你開拓嘅政經人脈，亦有負「大袋」呢個咁高嘅身分，想阿爺唔出手都幾難。小城唔係一個獨立自主嘅國家，就算今次護航成功後有幾多利益，都難逃未來知縣同代議士都係由普選產生嘅命運。到時雖然「大袋」可以話過咗海就神仙，但佢嘅富三代就更加跳唔出「富不過三代」嘅宿命，反而更加犯眾憎，事關就係呢一代嘅不肖祖宗一手一腳造成。

有幾充分代表？（上）

小城政改風潮繼續吹，日日都有唔同人物出嚟講嘢，最新玩大咗嘅有「全國大袋」。佢直接了當講咗句：「而家講一人一票選知縣，無必要討論」。無錯，依家咁早傾定一人一票選知縣，學佢老人家口吻，確實係有啲嘥氣。但呢位「大袋」貴為紈褲子弟，依靠祖宗蔭庇，喺小城以至內地早就參與政治，以其「廠佬」背景能夠攀上「大袋」官位，非一般人能及也。不過既然「大袋」喺政圈打滾咗咁多年，竟然咁無政治智慧講出句咁嘅嘢，真係估佢唔到。誠然依家傾好似有啲多餘，但都唔可以宣之於口。事關依家風頭火勢連基本腳嘅大社團，都要轉軚表示要增加議會參與性，佢咁樣講似乎真係以為「大袋」比代議士更高幾班，可以用更高角度去「俾意見」大家。睇番今日嘅垃圾會真係要幾廢有幾廢，但主要係有呢位大袋喺度廢Up阻住地球轉，至會令垃圾會變到咁垃圾。作為「廠佬」富二代，要維護二世祖利益我哋都好明白，不過連代議士都唔可以全體直選，你班間選究竟點樣「充分代表」業界利益呢？慈文體教間選代表最叻嘅，就係每年都捧走議會缺席率冠軍，大家直頭未喺鏡頭上見過佢，而呢位垃圾代議士嘅出席率同最勤力嗰位直選代議士，相差咗成兩倍有多，雖然佢大把錢唔志在份糧，但咁嘅出席率連幼稚園都要踢出校啦，點解仲可以存在喺垃圾會內，都係因為「間選」等於唔使選仲衰過官委，佢至可以霸位霸足咁多年，「大袋」有本事就請發掘吓佢代表過慈文體教做過乜講過乜！

係龍定係蟲

剛剛踏入「龍年」，公仔箱照例報道今屆第一個跑出嘅龍仔龍女，鄰埠第一個跑出嘅龍仔就係「雙非龍」，父母好識做地唔接受訪問，唯有訪問第二位嘅「雙港龍女」。幸好小城無「雙非」問題，就算兩家醫院出世嘅小龍父母都未講得正廣東話，但都係小城嘅一份子，大家自然替佢高興。傳統落嚟國人都對龍呢樣神話動物情有獨鍾，甚至每到呢個生肖年，出生率都特別高。可能以前係皇帝都以龍做代表，連著件衫都要指定係「龍袍」。由於大家都對下一代有極高期望，「望子成龍」或者要佢做「人中之龍」，所以揀生仔都要喺呢一年至生。但當大家都揀同一年生仔女，對社會資源嘅壓力自不然增大。就算小城無鄰埠「雙非」問題，高出生率亦都對產房、醫護保健等各方面造成壓力。而且龍年出世嘅小朋友唔一定特別叻，只不過有一樣嘢就一定叻啲，就係同人爭嘢。事關同期咁多小朋友一齊出世，大家將來都要面對爭學位、爭書簿，大個咗又要爭工作爭女友，做龍仔龍女其實都唔多好受。呢啲都只能夠怪上一代對「龍」呢個名太過沉迷，搞到小朋友越 嚟越辛苦。再加上今時今日「怪獸家長」橫行，一個口靚仔有成四五個大人去照顧，十歲連自己綁鞋帶都唔識，就算唔係龍仔龍女，個細路喺屋企都已經係太上皇。難怪唔少人對新一代擔心又傷心。除咗擔心佢哋嘅競爭力低下之外，更傷心嘅係上一代投入咗咁多資源去培養佢哋，竟然得出咁嘅結果，所以係龍係蟲都好，最緊要係正確培育小朋友，唔好成為社會未來嘅負累。

無腦發龍鈔

繼「盲搶鹽」後小城又一曠世混亂事件。年尾流流官府失驚無神，安排兩家主要銀號發行「十蚊龍」紀念鈔，俾庶民進行換領，結果搞到正常金融活動癱瘓。雖然今次官府係諗住趁年尾搞吓氣氛，攞個好意頭整番張紀念鈔等大家開心吓。只可惜整體安排無腦兼混亂，根本就睇唔出官府有認真安排過。首先推出紀念鈔換領安排喺銀號最忙、現金流轉最高峰嘅年尾時間，將銀號經已繁忙嘅櫃位工作量再增加幾倍。而官府安排兩家發鈔銀號出鈔，又唔發出換領指引，任由兩家銀號自行安排。結果一家發鈔銀號以該行存戶至可以換領，而另一家銀號則每人限換「一舊水」。終於令到兩家銀號各大小分行門口都大排長龍，而且仲排足幾日。另外官府極度低估呢張「龍鈔」對內地同胞嘅吸引力，結果引發炒家深夜排隊輪候，亦有排隊黨見有數圍即時加入戰團，導致上午銀號未開門就已經有幾百人喺門口等。而一般年尾正常要存錢、提款、入票找數嘅人都要混埋一齊，搞到好多人連門口都埋唔到，導致有人最後等到銀行關門都換唔到「龍鈔」而鼓譟，更甚係當銀號宣佈經已換晒之後惹嚟唔少不滿，竟然某發鈔行全線要關門一日「唔做生意」，呢個時候官府至有人出嚟話唔可以咁樣，財爺又要出口術即時表明加碼出多二千萬紀念鈔供庶民換領，至可以將事件平息。事件反映官府對民情同鄰近地區世情掌握有限，至會諗到出「十蚊龍」呢條屎橋去贈慶。事關小城出品嘅紀念鈔呢類「有價證券」，一直都係內地炒家及收藏家嘅恩物，貪其國際唔通用發行量小，有腦嘅問吓郵局職員小城出嘅紀念郵票全部去晒邊就知。

到時唔好怪阿爺

官府進行嘅「政改諮詢」，各界均熱烈進行討論同發表意見，只不過係意見當中唔少不乏無腦廢話，刻意擾亂庶民意見水平，除咗別有用心之外，就連阿爺嘅心思都想刻意曲解。例如有意見認為阿爺只係通知知縣，而家係適當時候對政改進行探討，阿爺無話實一定要改定係唔改咁話。當然小城有人唔想改變現狀影響既得利益，呢樣嘢大家都明白。任何改變總會有得有失，但係害怕改變而刻意曲解阿爺意思，呢樣就係某名筆嘅所謂「小農心態」，大家嘻嘻哈哈過日子就算數。
　小城近年嘅變化咁大，就連阿爺都睇唔過眼要親自開口叫大家檢討吓，即係話要改啦，使唔使阿爺兜口兜面咁叫你哋改至算數呢？以小城近年嘅轉變咁急速，無錯會令到官府以至唔少人都忙咗好多，無太多時間去理要唔要政改。阿爺正係因為睇見咁樣，先至好意提醒吓大家係時候諗諗佢。不過懶慣嘅一班既得利益者，梗係唔想喺呢段最著數嘅時期討論政改，以免影響自身利益。但係你哋懶係你哋嘅事，絕對唔可以因為小部分人嘅利益而斷送小城嘅前途。小城經濟環境快速發展，人口增加物價急升，反而其他重要基礎則越變越落後，法律滯後思維守舊，都係阻礙小城進一步發展嘅因素。若果仲任由呢班驚轉變嘅怕死鬼繼續阻住地球轉，相信到最後阿爺唯有親自出手。阿爺今次俾面大家好言相勸，都係想俾大家有個落台階，免得被國際社會指過度干預小城事務，識趣者應該盡早放開胸襟迎接轉變，否則不久將來被小城嘅發展所遺棄，到時唔好怪阿爺唔理你。

身分危機（下）

近期熱爆嘅除咗鄰埠挑機之外，最受庶民關注嘅梗係「三步或五步」嘅政改。大家期待已久嘅政改由京官拍板，知縣終於提出討論同諮詢。結果班手下搞到不倫不類，只安排八場諮詢會，而向公眾開放嘅竟然得一場，結果又係被人插到上天花板。喺聲討不斷之下公開諮詢會地點一改再改，由三百幾人嘅禮堂改到去可容成千人嘅劇院進行諮詢，好明顯官府低估咗庶民對政改嘅關注度。加上近日官府連番小動作疑似操控民意，今次官府只係安排一場公眾諮詢會，民間嘅反彈情緒自然會出現。事關政改牽涉議會地盤 分額問題，點樣改法自然挑動唔少人嘅神經，因為除咗討論官毀存廢之外，大圍意見仲會講間選同直選嘅議席分佈，結果唔少社團同組織都發表意見，最重要嘅係連傳統嘅工運社團，眼見庶民反應咁大，唯有紛紛轉軚，由表示官委有一定嘅協調作用，改口為支持普選循序漸進。點解社團態度可以有咁大轉變？同樣都係身 分危機作怪。以作為維護低下層工友利益為依歸嘅社團，眼見今日咁樣嘅議會制度，都仲可以唔出聲支持官委嘅存在價值，有乜法子唔改口風順應民意呢！只係今次官府諮詢得咁閃縮，反而更加激發庶民關心政改。原本官府以為庶民唔係點多理乜嘢政治，但求有兩餐溫飽就算數，家陣越搞越差，反而令到原本想保住既得利益，變為庶民嘅反彈點，令到官府民望更加低下。另外工運社團所憂慮嘅直選體制，會演變成商人政治。都係因為身分危機，擔心小城會進入另一個黑暗期。呢樣都係對庶民同自己無信心嘅表現，其實只要做好自己，又何懼變化呢！

身分危機（上）

鄰埠國際品牌「名店」，疑因禁止路人於店外櫥窗拍照甚至進行驅趕，引發市民網上進行聲討，又加上保安員及店員嘅不當處理，搞到連日嚟唔少鄰埠人士拎機出嚟挑戰該店，更有人駕駛數百萬名車出現店外違例停泊踩場，任由在場市民影相兼交警發牛肉乾。其實所謂「名店」禁止攝影，一般都係店內商品及陳設，至於店外櫥窗都禁攝的確係少有。不過事件嘅導火線唔單止係禁影咁簡單，而係懷疑有人講咗句「大陸人影就得，香港人影就唔得！」，令到好多港人尊嚴受到傷害，所以引發出迫爆挑戰嘅抗議行動。原本所謂「名店」禁止攝影根本就唔係新聞，喺鄰埠直頭係傳統嚟添！從前就算係衣著較差，或者係唔夠乾淨企喺人家店外，都會被保安或者店員驅趕，指其「影響市容」。不過，從前嘅「名店」無而家咁多，而且都只會係上流社會人士或者係洋人出入嘅地方，基於當時仲係被外國人管，所以大家都無聲出。但係家陣人權高漲加上本土意識強勁，咁樣做自然唔會放過你。不過事件背後其實有另一個因素，就係關乎大陸人同香港人嘅身分問題。以往鬼婆統治下鄰埠在華人地區確實擁有優越位，被驅趕者大多係從大陸走難落嚟等嘅低下層，而執行驅趕者正正就係鄰埠本土人。而今天時移勢易國內富強，大陸有錢客比本地人更多亦都更豪爽，所以近年鄰埠累積唔少被售貨員白眼嘅怨氣，至少一開口就用普通話問候你，明明係廣東話地區反而開口埋口都普通話，早就埋下咗地緣衝突嘅種子。今次搞到咁大純粹係接受唔到優越地位消失後，身分危機所引發嘅必然產物。好彩小城庶民從未有過自我優越感，否則唔使做國際休閒旅遊城市。

擾民宣傳（下）

小城嘅控煙法，同鄰埠最大唔同嘅地方，就係將違法吸煙嘅責任，將場地負責人都拖埋落水。即係唔單止違例者要罰，店東或者管理人都要罰埋一份。但係店東除咗唔阻止違例者要罰之外，仲有一樣未見煙都要罰嘅，就係要喺店內當眼地方貼上官府所派發指定嘅禁煙標誌貼紙。官府所派禁煙標誌大抵有直橫兩款，直度尺寸差唔多A4大小，「雞乸咁大隻字」寫明禁煙同埋罰六百，另一款橫度尺寸稍細，字體大小不遑多讓，有商販或零售店員工，為免未同客人嘈架先受罰，紛紛即時把官府派發嘅特大貼紙張貼喺櫥窗面當眼位置，不過問題即刻出現。有零售店店主返回店舖，見同事貼咗張咁大張嘅貼紙喺櫥窗飾櫃，嫌佢阻礙顧客視線兼破壞櫥窗美觀，叫同事將貼紙移到其他位置，當同事們移除之際，就會發現呢張貼紙係唔可以輕易除下，而且一撕就爛，結果廢盡九牛二虎之力至可以除去。老闆問員工搞掂未，員工話搞掂一半，佢問點解，同事答拆走之後無第二張新嘅，有可能會被罰。官府要將檢舉責任加諸於店舖身上本身就十分之唔合理，仲要印埋一批質量咁差而又大而無當嘅禁煙標貼，難怪店東們對官府呢次禁煙怨聲載道。禁煙標誌早就世界通行，官府早前提出嘅指定禁煙標誌根本就係多鬼餘。而呢款自家製標誌連同「雞乸咁大隻字」嘅標語要強制貼出，各大信用卡公司嘅標貼加埋都唔夠佢大，徹底破壞一眾名店等之櫥窗擺設。最慘嘅係貼錯咗係無得返轉頭，即係要貼佢一世，如果唔係就等交罰款，官府嘅宣傳差就預咗，宣傳到咁擾民就真係第一次。

選擇性執法又一例（上）

新控煙法執行首日就發咗五張「牛肉乾」俾唔守規矩之煙民，官府話效果理想，庶民同煙民都好自律同配合，無發生不愉快事件。當天官府大鑼大鼓，派副局到北區發傳單，更約邀傳媒一同出巡，鏡頭下有邊個會唔守規矩丫！不過官府用呢招嚟「提醒」煙民要自律，都不失為一個好方法，因為至少喺佢哋到場前，煙民都有機會整熄支煙免被檢控，最多轉頭至再點過，所以按常理係唔應該發生不愉快事件。事實上，官府選擇喺周邊地區都經已立法，明令禁止公眾場所吸煙之後至實施禁煙，小城庶民以至一眾旅客，早就適應咗唔會亂嚟，反而有旅客於禁煙前到訪時反問點解仲可以食煙。只不過今次選擇喺北區同遊客區做「騷」，除咗係避重就輕減少衝突場面出現之外，仲要係俾一個良好形象大家條例係獲得好多人支持。不過馬上就有網民反駁官府做「騷」真係做個樣，根本就唔係有心執法，事關官府早就公佈咗無寬限期而係立即執法，即開單即罰錢。對於一般收入唔多嘅煙民嚟講，被人罰六舊水就算半價收費，都差唔多成條煙嘅價錢，肯定會忍咗佢。但係對於收入豐盛嘅「江湖中人」，就算你即場開單俾佢，佢好禮貌咁收你罰單都好，依然會照樣喺你面前食埋成支煙仔或者雪茄。再講話到明係「江湖中人」，班控煙督察莫講話開罰單，就連有無機會埋到身都成為問題，有網友直指官府只敢到北區「蝦」老弱煙民，叫佢哋有本事就去「Ｄ2」「Ｄ3」執法，睇吓佢哋有無咁容易走得返出嚟。好明顯班官都知道要保障個人人身安全，所以繼續選擇性執法。